UFC-ի կրկնակի չեմպիոն, ռուսաստանցի Իսլամ Մախաչևն անդրադարձել է Աբու Դաբիում տեղի ունեցած աղմկահարույց միջադեպին՝ հանդես գալով ի պաշտպանություն PFL-ի թեթև քաշային կարգի անպարտելի չեմպիոն Ուսման Նուրմագոմեդովի, որը թիմակիցների հետ հարձակվել էր UFC-ի նախկին չեմպիոն, վրացի մարտիկ Մերաբ Դվալիշվիլիի վրա։
Մախաչևը սոցիալական ցանցերում գրառում է կատարել՝ դիմելով Նուրմագոմեդովին քննադատողներին.
«Նրանք, ովքեր հիմա դատապարտում են Ուսմանին ու տղաներին, վիրավորանքներ են գրում նրանց հասցեին․ ինչո՞ւ էիք լռում, երբ Մերաբն առանց պատճառի հարվածեց դաղստանցի ըմբիշին և վիրավորեց նրա պատիվը։ Մարդը մոտեցել էր նրան զրուցելու՝ առանց չար դիտավորության։ Այն, ինչ տեղի ունեցավ այսօր, Մերաբն ինքն է սկսել իր հայրենիքում՝ իրեն թույլ տալով հարվածել հյուրին և անպատվել նրա մորը»։
Մախաչևն իր խոսքում ակնարկում է 2026 թվականի հուլիսին Թբիլիսիում կայացած RAF մրցաշարի ժամանակ տեղի ունեցած միջադեպը։ Այն ժամանակ Դվալիշվիլին ապտակել էր դաղստանցի ըմբիշ Ախմեդ Գաջիմագոմեդովին, որը մոտեցել էր նրան Ումար Նուրմագոմեդովի հասցեին վրացի մարտիկի հնչեցրած արտահայտություններից հետո։ Ավելին, ըստ Մախաչևի հայտարարության, Դվալիշվիլին նաև հայհոյել ու վիրավորել է դաղստանցի մարզիկի մորը, ինչն էլ փաստացի դարձել է Աբու Դաբիի հարձակման և այս կոնֆլիկտի գլխավոր դրդապատճառը։
Ինչպես արդեն հայտնի է, նոյեմբերի 11-ին Աբու Դաբիի հյուրանոցներից մեկի սրահում ռուսաստանցի Ուսման Նուրմագոմեդովը մի խումբ անձանց հետ մոտեցել էր Դվալիշվիլիին ու հարվածել նրա դեմքին, ինչին հաջորդել էր զանգվածային ծեծկռտուք։
Ավելի ուշ տեղեկություններ տարածվեցին, որ ԱՄԷ-ի իրավապահ մարմինները ձերբակալել են Ուսմանին և նրան ուղեկցող անձանց։
