Չեմպիոնների լիգայի լիգայի փուլի 4-րդ տուրի՝ «Ասթոն Վիլայի» դեմ հանդիպման նախօրեին «Բարսելոնայի» անգլիացի հարձակվող Էնթոնի Գորդոնը մասնակցել է նախախաղային մամուլի ասուլիսին։ Ֆուտբոլիստը խոսել է առաջիկա մրցակցի ուժեղ կողմերի, կատալոնական ակումբում իր հարմարվողականության, վերջին պարտությունների և սեփական հոգեբանական պատրաստվածության մասին։
Նոյեմբերի 3-ին կայանալիք տնային խաղից առաջ Գորդոնը բարձր է գնահատել անգլիական թիմի ներուժն ու գլխավոր մարզիչ Ունայ Էմերիի աշխատանքը, սակայն նշել է, որ հայրենակիցների դեմ խաղալու հանգամանքն իր համար լրացուցիչ մոտիվացիա չէ.
«Ես մի քանի անգամ խաղացել եմ «Ասթոն Վիլայի» դեմ․ նրանք հիանալի թիմ ունեն, որը գլխավորում է աշխարհի լավագույն մարզիչներից մեկը։ Պրեմիեր լիգայի ակումբները ֆիզիկապես շատ ամուր են, իսկ «Վիլան» այդ առումով առաջնության ամենաուժեղ թիմերից է։ Նրանք խաղի ընթացքում մշտապես պայքարի մեջ են, համբերատար սպասում են իրենց շանսին և պատրաստ են ցանկացած սցենարի։ Մեզ լուրջ մարտահրավեր է սպասվում»։
Անդրադառնալով կատալոնական ակումբում անցկացրած առաջին երեք ամիսներին՝ անգլիացի վինգերը 10-բալանոց սանդղակով իր ելույթները գնահատել է 7 կամ 7,5 միավոր՝ խոստովանելով, որ դեռ ամբողջությամբ չի բացահայտել իր ներուժը.
«Հաշվի առնելով, թե ինչ մեծ փոփոխություն էր սա ինձ և ընտանիքիս համար՝ կարծում եմ՝ վատ չեմ սկսել։ Փոխվել է երկիրը, թիմը, ամբողջ միջավայրը։ Այնուամենայնիվ, ինձ դեռ ժամանակ է պետք լիարժեք հարմարվելու համար, և երբ դա տեղի ունենա, դուք կտեսնեք իմ լավագույն տարբերակը, որը դեռ չեք տեսել»։
Գորդոնը հատուկ շնորհակալություն է հայտնել թիմակիցներին, մասնավորապես՝ Էրիկ Գարսիային, լեզվական ու կենցաղային հարցերում իրեն աջակցելու համար, ինչպես նաև հիացմունքով է խոսել քաղաքի և երկրպագուների ջերմ վերաբերմունքի մասին.
«Ընդամենը երեք ամիս է անցել, բայց տեղի բնակիչներն ինձ և ընտանիքիս անչափ երջանիկ են դարձրել։ Անկեղծ ասած՝ նման ընդունելություն չէի սպասում։ Դա պարտավորեցնում է ավելի շատ բան տալ ակումբին ու երկրպագուներին։ Հուսով եմ՝ կկարողանամ նրանց փոխհատուցել նվաճած տիտղոսներով»։
Խոսելով ՊՍԺ-ից և Մադրիդի «Ռեալից» կրած վերջին պարտությունների մասին՝ Գորդոնը վստահություն է հայտնել, որ այդ մրցակիցները խաղամակարդակով չեն գերազանցում «Բարսելոնային».
«Չեմ կարծում, թե նրանք մեզնից ուժեղ են։ ՊՍԺ-ի դեմ խաղից առաջ մրցակիցը հանգստյան օրերին հանդիպում չէր անցկացրել և ֆիզիկապես վերականգնվելու ավելի շատ ժամանակ ուներ։ Իսկ «Ռեալի» դեմ խաղում մենք պարզապես պարտավոր էինք հաղթել․ ավելի շատ էինք տիրում գնդակին, ավելի լավ պահեր ստեղծեցինք, պարզապես ինչ-որ բան չբավականացրեց։ Պետք է դասեր քաղենք այս պարտություններից։ Ես սիրում եմ նման մեծ խաղերը, քանի որ դրանք հնարավորություն են տալիս ապացուցելու, որ մենք ի զորու ենք հաղթել ցանկացած մրցակցի»։
Ֆուտբոլիստը նշել է, որ իր գլխավոր մրցակիցն ինքն է, և խաղադաշտում առավելագույն արդյունավետության հասնելու համար պետք է վերանայի իր խաղաոճի որոշ տարրեր.
«Ես ինքս ինձնից միշտ պահանջում եմ գոլեր խփել, արդյունավետ փոխանցումներ կատարել և լինել այն խաղացողը, որը փոխում է հանդիպման ընթացքը․ պատմության լավագույն ֆուտբոլիստները հենց այդպես են վարվել։ Երբեմն, թերևս, պետք է մի փոքր ավելի եսասեր լինեմ, քանի որ որոշ դրվագներում չափազանց հաճախ եմ փոխանցում կատարում հարվածելու փոխարեն»։
Ասուլիսի վերջում անգլիացին պատմել է, թե ինչպես է պահպանում հոգեկան հավասարակշռությունն ու կենտրոնացումը ժամանակակից ֆուտբոլի լարված ռիթմում.
«Թե՛ ֆուտբոլում, թե՛ կյանքում ամենաբարդը կայունություն պահպանելն է։ Փոքր տարիքից շատ եմ կարդում՝ գեղարվեստական գրականությունից մինչև ինքնազարգացման գրքեր։ Ընթերցանությունը, մեդիտացիան և զբոսանքներն օգնում են մաքրել միտքս ու վայելել իրական կյանքը։ Իսկ երբ սոցցանցերում, օրինակ՝ TikTok-ում, անընդհատ գտնվում ես էժանագին դոֆամինի ազդեցության տակ, կտրվում ես այն ամենից, ինչն իրականում կարևոր է»։
Հիշեցնենք, որ Չեմպիոնների լիգայի առաջին երեք տուրերում «Ասթոն Վիլան» երեք հաղթանակ է տարել և «Կամպ Նոու» է ժամանում առաջատարների խմբում, մինչդեռ կատալոնական ակումբը ձգտում է վերականգնել դիրքերը լավագույն ութնյակում։
