Մադրիդի «Ռեալի» գլխավոր մարզիչ Ժոզե Մոուրինյուն մեկնաբանել է 2026 թվականի «Ոսկե գնդակի» արդյունքները։ Մրցանակին արժանացել է Անգլիայի հավաքականի և Մյունխենի «Բավարիայի» հարձակվող Հարի Քեյնը։
Պորտուգալացի մասնագետը խոստովանել է, որ պատիվ է ունեցել աշխատելու Քեյնի հետ՝ ընդգծելով նրա թե՛ ֆուտբոլային որակները, թե՛ մարդկային հատկանիշները։
«Ինձ բախտ է վիճակվել աշխատել Հարի Քեյնի հետ։ Նա հիանալի ֆուտբոլիստ է, հիանալի պրոֆեսիոնալ և հրաշալի մարդ։ Չնայած հիասթափությանը, որ իմ ֆուտբոլիստը չհաղթեց, պետք է անկեղծ ասեմ՝ շատ ուրախ եմ Հարիի համար։ Նա՝ թե՛ որպես ֆուտբոլիստ, թե՛ որպես մարդ, արժանի է այդ երջանկությանը և իր կարիերայում այս մրցանակն ունենալու իրավունքին»,– Մոուրինյուի խոսքերը մեջբերում է «Ռեալի» պաշտոնական կայքը։
Մարզիչը նաև առանձնացրել է Կիլիան Մբապեին՝ նրան անվանելով եզակի ֆուտբոլիստ։ Մոուրինյուն հիշեցրել է, որ պատմության ընթացքում մի շարք մեծագույն ֆուտբոլիստներ, այդ թվում՝ Լիոնել Մեսսին, Կրիշտիանու Ռոնալդուն և Միշել Պլատինին, «Ոսկե գնդակին» արժանացել են մեկից ավելի անգամ։
«Ամեն տարի «Ոսկե գնդակ» են հանձնում, բայց աշխարհի առաջնությունների պատմության լավագույն ֆուտբոլիստը միայն մեկն է»,– նշել է նա։
Մոուրինյուն անդրադարձել է նաև Ջուդ Բելինգհեմի արդյունքին։ Անգլիացի կիսապաշտպանը քվեարկության արդյունքում զբաղեցրել է 11-րդ տեղը, ինչը զարմացրել է «Ռեալի» գլխավոր մարզչին։
