Կատալոնական «Բարսելոնայի» կիսապաշտպան Ռոդրին հերքել է շրջանառվող լուրերն այն մասին, թե ինքը հրաժարվել է տեղափոխվել Մադրիդի «Ռեալ»՝ ակումբի կողմից «Ոսկե գնդակի» մրցանակաբաշխությունը բոյկոտելու պատճառով։
Հիշեցնենք, որ օգոստոսին իսպանացի ֆուտբոլիստը «Մանչեսթեր Սիթիից» տեղափոխվեց «Բարսելոնա»: Ավելի վաղ հաղորդվում էր, որ Իսպանիայի հավաքականի կիսապաշտպանի ծառայություններով ակտիվորեն հետաքրքրված է եղել նաև Մադրիդի «Ռեալը»:
«Ճիշտ չեն այն խոսակցությունները, թե ես մերժել եմ Մադրիդի «Ռեալի» առաջարկը նրանց կողմից «Ոսկե գնդակը» բոյկոտելու պատճառով։ Այդ ժամանակ դա ինձ վրա որևէ ազդեցություն չի թողել։ Դա իմ յուրահատուկ օրն էր, և իմաստ չկա խոսել մարդկանց մասին, ովքեր ներկա չէին արարողությանը։ Դա հիանալի պահ էր ինձ և իմ ընտանիքի համար։
Ես ստիպված էի հաշվի առնել բազմաթիվ գործոններ և որոշում կայացնել աշխարհի երկու լավագույն ակումբների միջև։ Ընտրությունս կատարել եմ զուտ սպորտային տեսանկյունից՝ ելնելով նրանից, թե որտեղ ինձ ավելի շատ ոգեշնչված կզգայի, և որտեղ, ըստ իս, կկարողանամ ավելի շատ հաղթանակների հասնել ու աճել որպես ֆուտբոլիստ»,- Ռոդրիի խոսքերն է մեջբերում Mundo Deportivo-ն։
Հիշեցնենք, որ 2024 թվականին Ռոդրին արժանացավ «Ոսկե գնդակին», սակայն Մադրիդի «Ռեալի» պատվիրակությունը հրաժարվեց մեկնել Փարիզ և մասնակցել արարողությանը՝ համարելով, որ գլխավոր անհատական մրցանակը պետք է բաժին հասներ վինգեր Վինիսիուս Ժունիորին։
