Միլանի «Ինտերի» գլխավոր մարզիչ Քրիստիան Կիվուն Չեմպիոնների լիգայի խաղարկության լիգայի փուլի մեկնարկային տուրի՝ Մադրիդի «Ռեալի» դեմ խաղից առաջ կայացած մամուլի ասուլիսի ժամանակ խոսել է սպասվող դիմակայության, թիմի ֆիզիկական վիճակի և մադրիդցիների գլխավոր մարզիչ Ժոզե Մոուրինյուի հետ ունեցած կապի մասին։
««Սանտյագո Բերնաբեուում» խաղալը հեշտ չէ որևէ թիմի համար։ «Ինտերն» այստեղ չի հաղթել արդեն 60 տարի։ Շատ թիմեր են այստեղ դժվարությունների բախվել։ Մենք կանենք հնարավոր ամեն ինչ, բայց չենք հրաժարվի մեր խաղաոճից. ցանկանում ենք գերիշխել և ցույց տալ, որ ավելի ուժեղ ենք դարձել։ Ընդ որում, «Ռեալի» դեմ խաղալու որևէ մեկ իդեալական տարբերակ գոյություն չունի»,- նշել է ռումինացի մասնագետը՝ հավելելով, որ մարզադաշտն այժմ ավելի գեղեցիկ ու ժամանակակից է դարձել։
Անդրադառնալով նախորդ հանգստյան օրերին Իտալիայի առաջնությունում «Նապոլիի» նկատմամբ տարած ծանր հաղթանակին (3-2), որտեղ միլանցիները հաղթական գոլը խփել էին երկրորդ խաղակեսի ավելացված ժամանակում, Կիվուն խոստովանել է, որ կնախընտրեր լրացուցիչ հանգստյան օր ունենալ.
«Նման բարդ, բայց միևնույն ժամանակ հիանալի հանդիպումից հետո ես կգերադասեի ևս մեկ օր հանգստանալ, բայց օրացույցն օրացույց է, և մենք պետք է հարմարվենք դրան։ Նախորդ երկու խաղարկություններում մենք հասկացանք, թե որքան միավոր է անհրաժեշտ լավագույն ութնյակում հայտնվելու համար։ Մենք նաև հասկացանք, թե ինչ է նշանակում չհայտնվել այդ ութնյակում. անցումային խաղերը շատ բարդ են»։
Խոսելով «Ռեալի» գլխավոր մարզիչ Ժոզե Մոուրինյուի մասին՝ «Ինտերի» գլխավոր մարզիչն ընդգծել է պորտուգալացու բացառիկ դերը իր կյանքում.
«Մոուրինյոն ինձ համար յուրահատուկ մարդ է։ Նրան հանդիպելը մեծ հաջողություն էր։ Նա օգնել է ինձ կյանքիս ամենադժվար պահին, և ես դա երբեք չեմ մոռանա»։
Չնայած այս ջերմ վերաբերմունքին՝ Կիվուն շեշտել է, որ մարզչական աշխատանքում երբեք ոչ մեկի չի կրկնօրինակել. նա ունի ֆուտբոլային իր սեփական տեսլականը, որը ձևավորվել է դեռևս ֆուտբոլիստի կարիերայի և երիտասարդական թիմերում աշխատելու տարիներին, որտեղ հնարավորություն է ունեցել փորձարկել տարբեր մոտեցումներ։
Հիշեցնենք, որ «Ռեալ» — «Ինտեր» հանդիպումը կկայանա վաղը՝ սեպտեմբերի 8-ին, և կմեկնարկի Երևանի ժամանակով 23:00-ին։
