Գևորգ Նռանյան․ Համոզվեցի, որ առանց ֆուտբոլի կյանք չկա․ անհնար է

Նրա հետ խոսելիս՝ կյանքն առանց ֆուտբոլի ու կարիերան ավարտելու վերաբերյալ մտքերը լսելուց հետո, ուզում ես, որ ինչ-որ ուժ նրան անընդհատ առաջ տանի, ու նա երբեք ստիպված չլինի կանգնելու ֆուտբոլիստի կարիերան ավարտելու բարդ որոշման առաջ։ 

ArmSport-ի այսօրվա զրուցակիցը 34-ամյա պաշտպան Գևորգ Նռանյանն է, որի հետ խոսել ենք մարզումների վերսկսման, առանց ֆուտբոլի կյանքի և ինչ-որ չափով հետևում մնացած կարանտինային կյանքի մասին։

Ֆուտբոլիստը կարիերան սկսել է «Փյունիկում», այնուհետև հանդես եկել «Արարատում», «Իմպուլսում», «Ուլիսում», «Բանանցում», «Ալաշկերտում», իսկ 2017 թվականից պաշտպանում է «Գանձասար-Կապանի» գույները։

-Ինչպե՞ս են անցնում մարզումները։

-Շատ լավ, կարոտած։ Դե, ամիսուկես է՝ ընդհանրապես թիմային մարզումներ չէինք անցկացրել։ Անհատական պարապմունքներ, իհարկե, անում էինք։ Հիմա ամեն ինչ շատ լավ է անցնում, բուռն մարզումներ են ընթանում։

-Իսկ այս պայմաններում ինչպե՞ս է կազմակերպվում մարզումային պրոցեսը։

-Հիմա երկու խմբով ենք մարզվում՝ տարբեր ժամերի։ Կարելի է ասել, որ իրար նույնիսկ չենք հանդիպում։ Հիմնական տարբերությունը սա է։

-Տարբեր խմբերով մարզվելն արդեն խաղերի ժամանակ խնդիրներ կստեղծի՞, օրինակ՝ խաղակցվածության։

-Միանշանակ, այո։ Քանի որ միասին ողջ թիմով մարզվելը լրիվ այլ է։ Բայց ես կարծում եմ, որ սա ժամանակավոր բնույթ է կրում, ու մոտ մեկ շաբաթից թույլ կտան անցնել սովորական լիարժեք թիմով մարզումներին։

-Երկար ժամանակ դաշտում չպարապելն իրեն զգացնել տալի՞ս է։

-Մենք այս ընթացքում մարզիչների տված անհատական ծրագրերով մարզվում էինք։ Որքան կարողացել ենք՝ պահել ենք մարզավիճակը։ Բայց թիմով դաշտում մարզվելն այլ է։ Այսպես, թե այնպես հիմա մարզավիճակի որոշակի խնդիր կունենանք։ Մարզիչներն ամեն ինչ անում են, որ հնարավորինս շուտ լավ մարզավիճակի վերադառնանք։

-Գևո՛րգ, Արմեն Պետրոսյանը մեր կայքի հետ զրույցում ասել էր, որ խաղացողներից ոմանք հիմա քաշի խնդիր ունեն․ դու այդ խաղացողների մեջ կա՞ս։

-Ո՛չ, կարծում եմ՝ ես քաշի խնդիր չունեմ։ Ինձ այդպիսի բան չեն ասել (ծիծաղում է՝ հեղ․)։

-Բացի մարզվելը, այս ընթացքում սննդակարգիդ է՞լ էիր հատուկ ուշադրություն դարձնում։

-Միանշանակ, հետևում էի։ Այս վիճակը բոլոր մարզիկների համար խորթ էր, որովհետև ես արդեն 20 տարի է սպորտի բնագավառում եմ ու այսպիսի բանի չէի հանդիպել, որ այսքան երկար տանը մնայինք, այն էլ՝ խաղերի շրջանում։ Ամեն դեպքում, ամեն ինչ արել ենք, որ հնարավորինս քիչ ազդի այս վիճակը մեր մարզավիճակի վրա։

-Դժվա՞ր էր առանց ֆուտբոլի։

-Շատ, շատ։ Ահավոր դժվար էր։ Հիմա հասկանում եմ, որ առանց ֆուտբոլի կյանք չկա։ Ես դա գիտեի, բայց հիմա, որ դադար եղավ, համոզվեցի, որ այդպես է։ Անհնար է առանց ֆուտբոլի։

-Իսկ այս ընթացքում մտածե՞լ ես այն մասին, թե ինչ պետք է անես կարիերայիդ ավարտից հետո։

-Ճիշտն ասած, ես իմ մեջ դեռ չեմ անդրադարձել այն թեմային, թե ինչ եմ անելու ֆուտբոլից հետո։ Ես հիմա վայելում եմ ֆուտբոլը, ուզում եմ շատ խաղալ ու զգում եմ, որ կարող եմ անել դա․ ունեմ այդ ներուժը։ Իսկ երբ ժամանակը գա, կմտածեմ այդ մասին։ Հիմա ընդհանրապես չեմ ուզում մտածել այդ ուղղությամբ, որովհետև եթե մտածեմ, կարող է շատ վատ բան լինել։ Ուզում եմ հնարավորինս շատ խաղալ ու լավ խաղալ։

-Ինչո՞վ էիր զբաղվում այս ընթացքում։

-Ամենաշատը ընտանիքիս հետ էի ժամանակ անցկացնում։ Շատ բան չկար անելու։ Հնարավորինս շատ պարապում էի, ֆիլմեր դիտում, խաղեր խաղում։ 

-Նոր հոբբիներ ձեռք բերեցի՞ր։

-Սկսեցի շատ գիրք կարդալ։ Որքան մեծանում ես, կարդալու ժամանակն այնքան քչանում է։ Լավ է, որ հիմա երկար ժամանակ ունեցանք դրա համար։ Նոր հոբբի չէի անվանի, ուղղակի, եթե առաջ քիչ էի կարդում, հիմա սկսեցի ավելի շատ կարդալ։

-Կարդացածդ գրքերից որևէ մեկը կառանձնացնե՞ս։

-Ոչ մեկը չեմ առանձնացնի, միայն կասեմ, որ շատ գիրք կարդալը միայն օգուտ է։

-Մեր առաջնության նոր ձևաչափը քեզ դուր գալի՞ս Է։

-Վեցնյակի մասին է խոսքը․․․Ես 20 տարի է ֆուտբոլի բնագավառում եմ, բայց այս ձևով չեմ խաղացել։ Այս ձևաչափն ընտրել է ֆեդերացիան, մեզ մնում է միայն ընդունել այն։ Բայց շատ օրինակներ կան, երբ նախկին ձևաչափով, թիմն առաջին շրջանում վատ է հանդես եկել, երկրորդում հավաքվել է ու լավ տեղ գրավել։ Այս ձևով խորթ է։

-Դուք հիմա վեցնյակում չկաք։ Մրցաշրջանի վերսկսումից հետո ո՞րն է լինելու ձեր թիմի մոտիվացիան։

-Մեր մոտիվացիան միշտ հաղթանակն է եղել։ Կարևոր չէ, թե խաղն ինչով է առանձնանում կամ ինչ յուրահատկություն ունի․ մենք պիտի դուրս գանք դաշտ ու հաղթենք։ Առաջնության մնացած խաղերում էլ, Գավաթի խաղում էլ այդ միտքն է մեզ հետ լինելու։

-Ըստ քեզ՝ առաջնությունը ե՞րբ կվերսկսվի։ Գործկոմի նիստում հստակ ժամկետներ չարձանագրվեցին։

-Այս հարցին չեմ կարող պատասխանել։ Ամեն ինչ շատ անորոշ է։ Սպասում ենք ֆեդերացիայի հայտարարությանը։

-Վերսկսվելու դեպքում, ըստ ամենայնի, խաղերն առանց հանդիսականի կանցնեն․ դա ինչ-որ կերպ կազդի՞ ֆուտբոլիստների վրա։

-Ֆուտբոլը հանդիսականներով է գեղեցիկ։ Նրանք լրացուցիչ լիցք են հաղորդում խաղին։ Բայց եթե անկեղծ լինեմ, մեր առաջնությունում հանդիսականները շատ քիչ են, բայց ինչքան էլ որ լինում են, դրական են անդրադառնում ու երկրորդ մոտիվացիա են հանդիսանում։

-Ի՞նչ կփոխվի մարդկանց կյանքում այս ամենի ավարտից հետո, օրինակ՝ քո կյանքում։

-Չեմ կարող ասել ինչ կփոխի, բայց առաջնայինն այն է, որ դրա ավարտից հետո այն մարդկային կյանքեր այլևս չի խլի։ Անձամբ ես ամենից շատ դրա համար կուրախանամ։ Բացի դրանից, այս ամենի ավարտից հետո, կարծում եմ, ամբողջ աշխարհը կարթնանա նորից։

Ստելլա Բաբլոյան