ՄԼՍ-ը ներկայացնող «Ինտեր Մայամիի» և Արգենտինայի ազգային հավաքականի հարձակվող Լիոնել Մեսսին լիարժեք իրավունք և հնարավորություն ունի հավակնելու 2026 թվականի «Ոսկե գնդակին»: Այս մասին պաշտոնապես հայտնել է հեղինակավոր մրցանակաբաշխության մամուլի ծառայությունը։
Աշխարհի 2026 թվականի առաջնության խմբային փուլի ավարտից հետո 39-ամյա արգենտինացին արդեն իսկ գլխավորում է «Ոսկե գնդակի» ֆավորիտների ցուցակը՝ ըստ The Athletic-ի վարկածի:
Շատերի մոտ հարց էր առաջանում՝ արդյո՞ք Եվրոպայից դուրս հանդես գալը չի խանգարի լեգենդար ֆուտբոլիստին, ինչին ի պատասխան կազմակերպիչները հանդես են եկել պարզաբանմամբ.
«Այո՛, միանգամայն հնարավոր է նվաճել «Ոսկե գնդակը»՝ առանց եվրոպական թիմում հանդես գալու: Պատմականորեն դա գուցե ավելի բարդ խնդիր է թվում, սակայն Եվրոպայից դուրս որոշ լիգաների աճող մրցունակությունը փոխում է իրավիճակը։ Երբ խոսքը վերաբերում է այս մրցանակին, անհնարին ոչինչ չկա։ Տեխնիկապես այն կարող է ստանալ ցանկացած ֆուտբոլիստ՝ անկախ նրանից, թե որ լիգան է ներկայացնում», — նշված է հաղորդագրության մեջ:
Որպես նախադեպ՝ կազմակերպիչները հիշեցրել են 2019 թվականի օրինակը, երբ մրցանակին արժանացավ ամերիկուհի Մեգան Ռապինոն՝ լինելով ամերիկյան «Սիեթլի» ֆուտբոլիստ։ Այդ տարի նա ԱՄՆ-ի կանանց հավաքականի հետ դարձավ աշխարհի չեմպիոն՝ ճանաչվելով մրցաշարի լավագույն խաղացող և գլխավոր ռմբարկու։
Հիշեցնենք, որ Լիոնել Մեսսին «Ոսկե գնդակի» բացարձակ ռեկորդակիր է՝ 8 տիտղոսով: Նա իր վերջին մրցանակը ստացել է 2023 թվականին, երբ արդեն տեղափոխվել էր «Ինտեր Մայամի»։
Սակայն այն ժամանակ քվեարկության արդյունքների վրա որոշիչ ազդեցություն էր ունեցել նրա՝ ՊՍԺ-ում անցկացրած մրցաշրջանը և 2022 թվականին Կատարում նվաճած աշխարհի չեմպիոնի տիտղոսը։
