Պորտուգալիայի հավաքականի ավագ և հարձակվող Կրիշտիանու Ռոնալդուն ԱԱ-2026-ի 1/16 եզրափակիչում Խորվաթիայի նկատմամբ տարած դրամատիկ հաղթանակից (2:1) հետո կիսվել է տպավորություններով, խոսել իր սահմանած պատմական ռեկորդի և Իսպանիայի հետ սպասվող սկզբունքային բախման մասին։
Խորվաթների դեմ խաղի 68-րդ րոպեին 41-ամյա Ռոնալդուն անվրեպ իրացրեց 11-մետրանոցը՝ դառնալով աշխարհի առաջնությունների փլեյ-օֆֆի պատմության ամենատարեց գոլահեղինակը: Բացի այդ, ըստ Squawka-ի, նա դարձավ ֆուտբոլի պատմության առաջին խաղացողը, որը խոշոր մրցաշարերում (Աշխարհի և Եվրոպայի առաջնություններ) հատում է 25 գոլի սահմանագիծը (ԱԱ-2026-ում պորտուգալացին արդեն ունի 3 գոլ)։
Խոսելով վճռորոշ հարվածի մասին՝ Ռոնալդուն նշել է.
«Դեռ ցերեկն ինձ մոտ զգացողություն կար, որ հանդիպման ելքը կվճռվի 11 մետրանոցով: Մենք պատրաստվում էինք իրադարձությունների նման զարգացմանը։ Սիրտս շատ արագ էր բաբախում, բայց փորձեցի վստահել ինտուիցիայիս ու հավատալ, որ կխփեմ: Ես միշտ հավատացել եմ դրան»:
Հանդիպման 61-րդ րոպեին մրցավարը խաղից դուրս վիճակի պատճառով չեղարկել էր Կրիշտիանուի գոլը, իսկ 81-րդ րոպեին նրան փոխարինել էին։ Լրագրողի հարցին, թե որն է ավելի հիասթափեցնող՝ չեղարկված գո՞լը, թե՞ փոխարինումը, լեգենդար հարձակվողը կարճ պատասխանել է.
«Ես ավելի շատ հիասթափվում եմ, երբ խաղադաշտ դուրս չեմ գալիս մեկնարկային կազմում»:
1/8 եզրափակիչում Պորտուգալիան ուժերը կչափի Իսպանիայի հետ, որը նախորդ փուլում 3:0 հաշվով վստահորեն հաղթահարել էր Ավստրիայի արգելքը։ Պիրենեյան դերբին կկայանա հուլիսի 6-ին և կմեկնարկի Երևանի ժամանակով 23:00-ին։
«Իսպանիայի հավաքականն աշխարհի առաջնությունում հաղթելու գլխավոր հավակնորդներից մեկն է: Բարդ հանդիպում է լինելու, ինչպես և մնացած բոլորը: Բայց մենք պատրաստ կլինենք դրան, քանի որ շատ լավ ծանոթ ենք նրանց թիմին: Կարծում եմ՝ շատ հավասար խաղ է սպասվում»,- եզրափակել է Ռոնալդուն:
