Ֆուտբոլի 2026 թվականի աշխարհի առաջնությունում ավարտվեցին J խմբի երրորդ տուրի հանդիպումները, որոնք աչքի ընկան և՛ պատմական ռեկորդներով, և՛ դրամատիկ հանգուցալուծմամբ։
ԱՄՆ-ի Դալաս քաղաքում կայացած խաղում Արգենտինայի հավաքականը 3:1 հաշվով վստահ հաղթանակ տարավ Հորդանանի նկատմամբ: Հարավամերիկացիների կազմում գոլերի հեղինակ դարձան Ջովանի Լո Չելսոն, Լաուտարո Մարտինեսը (11-մետրանոցից) և Լիոնել Մեսսին: Հորդանանի հավաքականի միակ գնդակը խփեց Մուսա Ալ-Թամարին: Հանդիպման լավագույն խաղացող ճանաչվեց խաղադաշտում 60 րոպե անցկացրած և հաշիվը բացած Լո Չելսոն։
Այս խաղը պատմական դարձավ Արգենտինայի հավաքականի ավագ Լիոնել Մեսսիի համար։ Նա դարձավ աշխարհի առաջնությունների պատմության առաջին ֆուտբոլիստը, որին հաջողվել է գոլի հեղինակ դառնալ մունդիալների 7 անընդմեջ խաղերում: Նախկին ռեկորդը պատկանում էր ֆրանսիացի Ժյուստ Ֆոնտենին (1958) և բրազիլացի Ժաիրզինյոյին (1970), ովքեր աչքի էին ընկել 6 անընդմեջ խաղում:
Բացի այդ, Լեոն շարունակում է բարելավել իր անհատական ցուցանիշները. Մեսսին այս մրցաշարում իր գոլերի քանակը հասցրեց 6-ի։ Արգենտինացին նաև ամրապնդեց իր առաջատարությունը՝ մունդիալներում խփած գոլերի ընդհանուր քանակը հասցնելով 19-ի։
Արգենտինան 3 խաղում տոնեց 3 հաղթանակ և վաստակած 9 միավորով զբաղեցրեց J խմբի առաջին հորիզոնականը: 1/16 եզրափակիչում «ալբիսելեստեն» կմրցի Կաբո-Վերդեի ընտրանու հետ։ Խաղը կկայանա հուլիսի 4-ին Մայամիում։ Հորդանանը առանց միավոր վաստակելու եզրափակեց աղյուսակն ու լքեց մրցաշարը։
Տեսանյութը՝ ԱՅՍՏԵՂ
WHAT A FREEKICK GOAL MESSI https://t.co/HLd0bzI0Ae pic.twitter.com/kfULFKLScI
— m 🇧🇷🇪🇸🇦🇷 (@pedrizard) June 28, 2026
Խմբի մյուս հանդիպումը, որտեղ մրցում էին Ավստրիայի և Ալժիրի հավաքականները, ավարտվեց իսկական գոլահրավառությամբ՝ 3:3։ Ավստրիացիների կազմում աչքի ընկան Մարսել Զաբիտցերը, Սաշա Կալաջիչը և Մարկո Արնաուտովիչը, իսկ Ալժիրին պարտությունից փրկեց Ռիյադ Մարեզի դուբլն ու Ռաֆիկ Բելգալիի դիպուկ հարվածը։
Այս արդյունքը բավարար էր երկու թիմերին էլ փլեյ-օֆֆի ուղեգիր նվաճելու համար. Ավստրիան վաստակեց 4 միավոր և լրացուցիչ ցուցանիշներով զբաղեցրեց 2-րդ տեղը։
Ալժիրը, նույնպես վաստակելով 4 միավոր, հայտնվեց 3-րդ տեղում, սակայն այս արդյունքի շնորհիվ ընդգրկվեց լավագույն երրորդ տեղ գրաված ութ թիմերի ցանկում՝ դուրս գալով 1/16 եզրափակիչ։
Ավստրիա-Ալժիր խաղի ոչ-ոքին ճակատագրական եղավ Իրանի հավաքականի համար: Իրանցիները (3 միավոր) հավակնում էին 1/16 եզրափակիչի վերջին ուղեգրին, և այս խաղում գրանցված ցանկացած այլ արդյունք նրանց դուրս կբերեր փլեյ-օֆֆ, սակայն Ալժիրի վաստակած միավորը Իրանին դուրս թողեց հետագա պայքարից:
Տեսանյութը՝ ԱՅՍՏԵՂ
