📷 Դանիա — Ուկրաինա խաղն ընդհատվել է. Էրիկսենը կրկին կորցրել է գիտակցությունը

Դանիայի և Ուկրաինայի ազգային հավաքականների միջև ընկերական հանդիպումն անավարտ է մնացել։ Խաղն ընդհատվել է Դանիայի ընտրանու կիսապաշտպան Քրիստիան Էրիկսենի ուշագնացության պատճառով։

Միջադեպը գրանցվել է երկրորդ խաղակեսի միջնամասում՝ 75-րդ րոպեին: Ֆուտբոլիստի անկման բուն դրվագը չի ցուցադրվել հեռուստահեռարձակման ուղիղ եթերում։

Դեպքից անմիջապես հետո նորվեգացի գլխավոր մրցավար Սիգուրդ Կրինգստադը դադարեցրել է հանդիպումը, որն այդպես էլ չի վերսկսվել։

Խաղի դադարեցման պահին դաշտի տերերը հաղթում էին 2:1 հաշվով։ Դանիայի Օդենսե քաղաքի «EWII Պարկ» մարզադաշտում կայացած խաղի հաշիվը 13-րդ րոպեին բացել էր Պատրիկ Դորգուն, իսկ 36-րդ րոպեին պաշտպան Յոակիմ Մելեն կրկնապատկել էր դանիացիների առավելությունը։ Հյուրերի կազմում ընդմիջումից առաջ՝ 44-րդ րոպեին, միակ պատասխան գնդակը հեղինակել էր Վիկտոր Ցիգանկովը։

Հիշեցնենք, որ այս երկու հավաքականներն էլ չեն կարողացել նվաճել ԱԱ-2026-ի ուղեգիր։ Եվրոպական գոտու որակավորման փուլի C խմբում Դանիան զբաղեցրել էր երկրորդ տեղը և փլեյ-օֆֆում դրամատիկ պայքարում զիջել էր Չեխիային (2:2, հետխաղյա 11-մետրանոցներով՝ 1:3)։

Ուկրաինան նույնպես իր խմբում (D խումբ) գրավել էր երկրորդ հորիզոնականը, սակայն փլեյ-օֆֆի կիսաեզրափակիչում 1:3 հաշվով պարտվել էր Շվեդիայի ընտրանուն։