Ֆուտբոլի միջազգային ֆեդերացիան (ՖԻՖԱ) պատրաստվում է կոշտ միջոցներ կիրառել 2026 թվականի աշխարհի առաջնությունում։ Ըստ հեղինակավոր The Times պարբերականի՝ մրցաշարում կգործեն նոր, խիստ կանոններ, որոնք անմիջականորեն կվերաբերեն ֆուտբոլիստների վարքագծին։
Աղբյուրի տեղեկություններով՝ գլխավոր նորամուծությունն այն է, որ մրցակցի հետ կոնֆլիկտի կամ վիճաբանության ժամանակ իրենց բերանը ձեռքով կամ մարզաշապիկով փակող ֆուտբոլիստները անմիջապես կպատժվեն կարմիր քարտով։
Բացի այդ, ՖԻՖԱ-ն մտադիր է անզիջում պայքար մղել մրցավարների որոշումների դեմ ցուցադրական բողոքների դեմ։ Ֆուտբոլիստները, ովքեր ի նշան անհամաձայնության ինքնակամ կլքեն խաղադաշտը, նույնպես կհեռացվեն խաղից։
Սպասվում է, որ այս արմատական փոփոխությունների մասին ՖԻՖԱ-ի նախագահ Ջանի Ինֆանտինոն պաշտոնապես կհայտարարի ապրիլի 30-ին՝ հինգշաբթի օրը, Վանկուվերում կայանալիք կազմակերպության կոնգրեսի ժամանակ։
Ընդգծվում է, որ այս կոշտ կանոնակարգը փորձարկման կարգով կկիրառվի բացառապես գալիք համաշխարհային ստուգատեսում՝ ԱԱ-2026-ի շրջանակներում:
