Հայաստանի ազգային հավաքականի գլխավոր մարզիչ Եղիշե Մելիքյանն Աշխարհի 2026թ․ առաջնության եվրոպական գոտու որակավորման փուլի F խմբի վերջին տուրի՝ Պորտուգալիայի ընտրանու հետ կայանալիք խաղից առաջ կայացած նախախաղային մամուլի ասուլիսի ժամանակ պատասխանել է լրագրողների հարցերին։
«Դուք ասում եք՝ ճնշում չկա, բայց ես զգում եմ, որ թիմը պատասխանատվություն է կրում։ Իսկ երբ կա պատասխանատվություն, զգում ես նաև ճնշում, որովհետև մենք պետք է ներկայացնենք մեր երկիրը և մեր ֆուտբոլը։
Այո, ճիշտ եք ասում, որ սա մեր համար լուրջ մրցակից է։ Այսօր մենք չենք կարող հասնել այնպիսի արդյունքի, որ հանգիստ լինենք այս թիմի դեմ։ Սակայն այս հանդիպումը կարող է այն օգուտը տալ, որն անհրաժեշտ է մեր երիտասարդ ֆուտբոլիստներին։ Դա մեր նպատակն է, որովհետև մենք գտնվում ենք կառուցողական աշխատանքի փուլում։
Այս թիմը մեզ կառաջացնի լրջագույն ճնշում, և ճնշման տակ ես պետք է հասկանամ, թե թիմային և անհատական ինչ մակարդակի վրա է մեր աշխատանքը։ Իմ համար էլ է հետաքրքիր, թե ինչպես ենք փոխվել երկու-երեք ամսվա ընթացքում՝ հաշվի առնելով անհաջող առաջին խաղը և այդ վատ խաղն ու հաշիվը։
Սա լավ քննություն է։ Մենք պատրաստ ենք։ Ճիշտ է, ունենք շատ կորուստներ, բայց պատրաստ ենք պայքարելու, և ես որպես մարզիչ կաշխատեմ մեր թիմից առավելագույնը ստանալու ուղղությամբ։
Իռլանդիայի դեմ Պորտուգալիայի խաղը ցույց տվեց, որ ֆուտբոլում ամեն ինչ հնարավոր է, սակայն տեսականորեն մեր և Պորտուգալիայի հավաքականների միջև տարբերությունը շատ մեծ է։
Ինչ վերաբերում է Ռոնալդուին, ապա պետք է ասեմ, որ Պորտուգալիայի հավաքականն այնքան ռեսուրս և ֆուտբոլիստ ունի իր երկրում, որ նրանք միշտ հավաքում են լավագույններին։ Համոզված եմ, որ Ռոնալդուի փոխարեն կարող է շատ լավ ֆուտբոլիստ լինել, և ես չեմ կարող ուրախանալ կամ հանգիստ լինել, որ Ռոնալդուն չկա։ Կա Պորտուգալիայի հավաքական, որը շատ ուժեղ է, և մենք աշխատում ենք, որպեսզի կարողանանք պայքարել այս թիմի դեմ։
Անկեղծ ասած՝ այո՛, խոսել եմ ֆուտբոլիստների հետ։ Թե ինչի մասին՝ չեմ կարող ասել. դա եղել է հանդերձարանում և այնտեղ էլ կմնա։ Բայց որ ջղայնացած եմ եղել և այդ ամենը նկատել եմ, այո՛, դա այդպես է։
Ես ինքս հարգում եմ Պորտուգալիայի հավաքականին, նա արժանի է հարգանքի, բայց, ինչպես դուք եք ասում, երբ ոտքդ դնում ես խոտածածկին, մոռանում ես ամեն ինչ։ Այո՛, ֆուտբոլի օրենքն այդպիսին է. դու պետք է մոռանաս մրցակցի հեղինակությունը և պարզապես գնաս ու պայքարես ու պատերազմես քո դիմացի թիմի հետ՝ հաղթող դուրս գալու համար։
Առաջին խաղը ինձ դուր չի եկել, և խոշոր հաշվի պատճառներից մեկը հենց դա է եղել։ Հուսով եմ, մեր տղաները հասկացել են, և ես չեմ ուզում երկրորդ անգամ տեսնել նման հարգանք մեր կողմից Պորտուգալիայի հանդեպ։ Ես ուզում եմ տեսնել մրցակցություն։
Ցավոք, փորձարկումներ եմ անում պաշտոնական խաղերի ընթացքում։ Վաղը նույնպես պատրաստվում եմ ռիսկի գնալ։ Վաղը դուք կտեսնեք, որ ես ինչ-որ փոփոխություններ եմ կատարել։
Ես չեմ վախենում սխալվելուց, քանի որ սխալվելը ևս անհրաժեշտ է, որպեսզի հասկանամ, թե որտեղ է եղել սխալը և ինչպես ուղղել այն։ Բայց ես պետք է հասկանամ, թե ճնշման տակ արդյոք ֆուտբոլիստների և թիմի կողմից ստացվո՞ւմ է այն, ինչ ես ուզում եմ, թե՞ ոչ։
Մեծ փոփոխություններ են եղել մթնոլորտի, պայքարի, տրամադրվածության, կարգապահության և հայրենասիրության մեջ, քանի որ դուք չեք պատկերացնի, թե որքան եմ խոսում այդ հարցի մասին՝ մեր եռագույնի, ազգի և երկրպագուի համար։ Ես նրանց մեջ պետք է ներարկեմ այն, ինչ անհրաժեշտ է։ Պետք է աչքերի տակ ներկեն ու մտնեն դաշտ. այ այդքան պետք է անեմ։
Պատկերացում ունեմ, բայց դեռ շուտ է խոսել այդ մասին։ Ավելի կոնկրետ կամ հստակ կարող եմ ասել, որ գարնանը կփորձեմ Բանդիկյանին։ Առայժմ ես ուսումնասիրության փուլում եմ և շատ բան չեմ կարող հայտնել։
Գեորգի Հարությունյանը շատ լավ ֆուտբոլիստ է, ով ինձ շատ է դուր գալիս և մեր առանցքային խաղացողներից մեկն է։ Սակայն այդ անհաջող խաղից հետո ես փոփոխություն կատարեցի։ Հիմա Ստյոպա Մկրտչյանը արդարացնում է իրեն և լավ է խաղում։
Սա մրցակցություն է, և Գեորգին հիմա պետք է համբերի։ Նրա՝ պահեստայինների նստարանին գտնվելը լավ ազդանշան է մյուսների համար. մեկ վատ խաղի դեպքում նրանք բաց են թողնում մեկնարկային կազմում հանդես գալու հնարավորությունը։ Գեորգին մեզ համար շատ պետքական ֆուտբոլիստ է։
Ես ասել եմ և հիմա էլ եմ ասում. վաղը շատ դժվար է լինելու մրցակցել Պորտուգալիայի դեմ։ Սակայն սա փորձություն է, և մենք պետք է հոգեբանորեն ուժեղ լինենք և հասկանանք, որ նրանց երեք միավորը շատ անհրաժեշտ է, և նրանք դրա համար ամեն ինչ անելու են։
Բայց այս խաղը մեզ էլ է շատ բան տալու, մեզ էլ է պետք։ Դրա համար պետք է պայքարենք, անպայման պայքարենք։ Ես լիովին գիտակցում եմ լրջությունը և դժվարությունը և հասկանում եմ, թե ինչպիսի թիմի հետ գործ ունենք։ Ուրախ եմ, որ ունենք նման առիթ՝ նման թիմի դեմ պայքարելու։
Ամեն դեպքում, մենք այս թիմի դեմ խաղից շատ բան կշահենք. եթե ոչ դրական արդյունք, ապա գոնե մեր ապագայի համար»,- ասել է Մելիքյանը։
Հիշեցնենք, որ մրցող ընտրանիների միջև կայանալիք հանդիպումը վաղն է՝ նոյեմբերի 16-ին, Երևանի ժամանակով 18։00-ին։
