Իսպանիայի Լա Լիգայի 11-րդ տուրում կատալոնական «Բարսելոնան» հոկտեմբերի 31-ին սեփական հարկի տակ 6։1 հաշվով ջախջախեց «Ալավեսին»։
Այս հաղթանակը հոբելյանական և պատմական դարձավ «կապտանռնագույնների» գլխավոր մարզիչ Հանս-Դիտեր Ֆլիկի համար, սակայն գերմանացի մասնագետը խաղից հետո դժգոհություն է հայտնել 84-րդ րոպեին բաց թողած գոլի կապակցությամբ։
«Ընդմիջմանը մենք խոսեցինք այն մասին, որ ցանկանում ենք դարպասը պահել անառիկ։ Շատ կարևոր էր երկրորդ խաղակեսում ևս պահպանել նույն տրամադրվածությունը։ Ես դժգոհ եմ, ինչպես և հենց իրենք՝ ֆուտբոլիստները»,- Ֆլիկի խոսքերն է մեջբերում իսպանական Marca-ն։
Չնայած բաց թողած գնդակին՝ «Ալավեսի» նկատմամբ տոնած հաղթանակը 100-րդն էր Հանսի Ֆլիկի համար «Բարսելոնայի» գլխավոր մարզչի պաշտոնում։ Այս ցուցանիշին հասնելու համար գերմանացի մասնագետից պահանջվեց ընդամենը 131 հանդիպում։ Հաղթանակների 76.33 տոկոս ցուցանիշով Ֆլիկն ամրապնդեց իր կարգավիճակը՝ որպես «Բարսելոնայի» ողջ պատմության ընթացքում հաղթանակների ամենաբարձր տոկոս ունեցող մարզիչ։
Հավելենք, որ 100 հաղթանակի շեմը հաղթահարելու արագությամբ Ֆլիկը երկրորդն է կատալոնական ակումբի պատմության մեջ․ նրան գերազանցում է միայն Լուիս Էնրիկեն, որն այդ նշաձողին հասել էր 126 խաղում։
Հիշեցնենք, որ այս հաղթանակից հետո «Բարսելոնան» վաստակեց 30 միավոր և վերադարձավ Լա Լիգայի մրցաշարային աղյուսակի առաջին հորիզոնական։ Հաջորդ տուրում կատալոնական թիմը նոյեմբերի 8-ին հյուրընկալվելիս ուժերը կչափի Մադրիդի «Ատլետիկոյի» հետ։
