UFC-ի թեթև քաշային կարգի դասակարգման երկրորդ համար Արման Ծառուկյանը կիսվել է իր սպասումներով՝ կապված Իսլամ Մախաչևի և Ջեք Դելա Մադդալենայի միջև UFC-ի կիսամիջին քաշային կարգում կայանալիք տիտղոսային մենամարտի հետ։
«Մադդալենային շատ են թերագնահատում։ Արդեն ասում են. «Եթե Իսլամը նվաճի տիտղոսը, կմենամարտի Թոփուրիայի հետ»։ Մարդիկ անտեսում են Մադդալենային։ Բայց նա շատ լուրջ մարտիկ է։ Նրա բռնցքամարտը լավագույններից է․ շատ լավ է զգում ձեռքի աշխատանքը, արագ հարվածներ է գործում, թեև բնույթով մաքուր հարվածող չէ։ Չգիտեմ, որտեղից է նա այդքան լավ հարվածում, շրջանցում, զգում տարածությունը։ Պատի մոտ էլ հաջողությամբ է պաշտպանում իրեն պայքարի ժամանակ։ Կարծում եմ՝ Իսլամը մեծ խնդիրներ չի ունենա տեյքդաունների ժամանակ։ Հետաքրքիր է՝ կկարողանա՞ նա պահել մրցակցին գետնին և ինչպե՞ս է Մադդալենան գործելու ներքևում»,- ասել է Ծառուկյանը Ասլանբեկ Բադաևին տված հարցազրույցում։
Նշենք, որ Մախաչևի և Մադդալենայի տիտղոսային մենամարտը կկայանա UFC 322 մրցաշարում, որը նախատեսված է նոյեմբերի 16-ին Նյու Յորքում (ԱՄՆ):
