ԱԱ-2026-ի եվրոպական գոտու որակավորման փուլի F խմբի երկրորդ տուրում Հայաստանի ազգային հավաքականը Վազգեն Սարգսյանի անվան «Հանրապետական» մարզադաշտում 2:1 հաշվով հաղթանակ է տարել Իռլանդիայի ընտրանու նկատմամբ:
Խաղից հետո Իռլանդիայի ազգային ռադիոհեռուստատեսության սպորտային բաժինը վերլուծական հոդված է հրապարակել: Ահա դրա մանրամասները.
«Հայաստանի հաղթանակը ստվեր է գցել Իռլանդիայի հավաքականի գլխավոր մարզիչ Հեյմիր Հադլգրիմսոնի պաշտոնավարման վրա: Հադլգրիմսոնը դժվար ժամանակներ է ապրում այն պահից, ինչ մեկ տարի առաջ ստանձնել է թիմի ղեկավարումը: Այդուհանդերձ, նա մշտապես լավատեսություն է ցուցաբերել՝ վստահորեն խոսելով երկարաժամկետ նպատակների և հաջորդ տարի մրցաշարին մասնակցելու հնարավորության մասին:
Անգամ Հունգարիայի դեմ խաղում առաջին 15 րոպեներին երկու գոլ բաց թողնելու անհաջող մեկնարկից հետո Հալգրիմսոնը դրական էր գնահատել իրավիճակը՝ նշելով, որ թիմը ցույց է տվել պայքարի ոգի և կարողացել է վաստակել մեկ միավոր:
Հայաստանի դեմ խաղը, որի հավաքականը օրեր առաջ 0:5 հաշվով պարտություն էր կրել, պետք է լիներ հեշտ մեկնարկ Իռլանդիայի համար՝ երեք միավոր վաստակելու և հոկտեմբերյան խաղերին թափով պատրաստվելու համար: Իռլանդիան վստահորեն մեկնարկեց՝ առաջին րոպեին վտանգավոր հարվածով և քիչ անց դարպասագծից խուսափած գնդակով:
Հայաստանի հավաքականը լիովին համապատասխանում էր ՖԻՖԱ-ի վարկանիշի 105-րդ հորիզոնականին՝ թույլ տալով բազմաթիվ սխալներ և ցուցաբերելով անվստահ խաղ: Դարպասապահը գրեթե յուրաքանչյուր գործողությամբ հնարավորություն էր ընձեռում Իռլանդիային՝ խոտածածկի վատ պայմաններում:
Երբ Հայաստանը 15-րդ րոպեին առաջին անգամ հարձակվեց, Իռլանդիայի պաշտպանությունը թվում էր անառիկ՝ փակելով բոլոր տարածքները: Սակայն հաջորդ հարձակումը ձախողվեց, և Հայաստանը, ինչպես կանխատեսվում էր, վտանգավոր դարձավ արագ հակագրոհով: Իռլանդիան, սկզբնական ճնշումից հետո, այլևս չէր կարողանում վերահսկել խաղը և սպասում էր Հայաստանի սխալներին:
35-րդ րոպեին մեկ երկար փոխանցում ամբողջությամբ ջախջախեց Իռլանդիայի պաշտպանությունը: Դարա Օ’Շին սայթաքեց, իսկ Հայաստանը երկու անգամ հարված կատարեց. առաջինը փրկեց Ջեյմս Քոլինսը, երկրորդը՝ դարպասաձողը: Այդ պահից Հայաստանն ու նրա երկրպագուները զգացին խաղի ընթացքը և վերցրին նախաձեռնությունը: Առաջին խաղակեսում Հայաստանը գոլ խփեց 11-մետրանոցից, իսկ երկրորդ խաղակեսի սկզբում կրկնապատկեց առավելությունը:
Իռլանդիան կարողացավ մեկ գոլ հետ բերել Էվան Ֆերգյուսոնի ջանքերով, և ժամանակը բավական էր առնվազն հաշիվը հավասարեցնելու համար: Սակայն Հայաստանը շարունակում էր ճեղքել Իռլանդիայի պաշտպանությունը: Եթե չլիներ դարպասապահ Կուիվին Կելեհերի փրկող խաղը, Իռլանդիան կարող էր պարտվել ավելի խոշոր հաշվով:
Հադլգրիմսոնը փորձեց արժանապատվորեն ընդունել պարտությունը՝ խոստովանելով, որ դժվար է լավատես մնալ խաղից հետո, երբ ամեն ինչ սխալ է ընթացել: Ֆուտբոլիստները պարտվում էին մենամարտերում և բազմաթիվ սխալներ թույլ տալիս: «Իհարկե, սա մարզչի գործն է», — ասաց նա՝ պատասխանելով իր ապագայի մասին հարցին: — «Եթե թիմը արդյունք չի ցույց տալիս, մարզիչը միշտ հարցականի տակ է: Ես անմիտ չեմ: Այս խաղի համար ես եմ մեղավոր»:
«Մենք պետք է կենտրոնանանք հաջորդ հավաքի վրա», — ավելացրեց նա՝ ակնարկելով, որ առայժմ հեռանալու մտադրություն չունի: Ճակատագրի հեգնանքով՝ Հունգարիան պարտվեց Պորտուգալիային, ինչի շնորհիվ Հայաստանը պահպանեց խմբի երկրորդ հորիզոնականը առաջին տուրից հետո:
Հադլգրիմսոնը դեռ հույս ունի, որ Պորտուգալիայի ուժեղ խաղը կօգնի իր թիմին առաջ ընթանալ:=
Հունգարիայի դեմ խաղից հետո նա նշել էր, որ թիմը դեռ ձևավորում է իր խաղային ոճը: Սակայն այժմ ավելի տեղին է ասել, որ նրա պաշտոնավարումը հայտնվել է ճգնաժամի մեջ»։
