Իտալացի լեգենդար նախկին մարզիչ Արիգո Սակին կիսվել է իտալական ակումբների վերաբերյալ իր կարծիքով, ինչպես նաև խորհուրդ է տվել «Նապոլիին» և «Ինտերին» կենտրոնանալ Ա Սերիայում ելույթների վրա, այլ ոչ թե Չեմպիոնների լիգայում։
«Իտալիայում ստեղծված իրավիճակին նայելով՝ կարծում եմ, որ կարող եմ խորհուրդ տալ «Նապոլիին» և «Ինտերին»՝ իտալական երկու այն ակումբներին, որոնք այս պահին ամենաշատն են պատրաստ պայքարելու մի քանի ճակատներում, կենտրոնանալ հիմնականում Ա Սերիայի վրա։ Իմ կարծիքով՝ նրանք դեռևս պատրաստ չեն հավասար պայմաններով մրցել եվրոպական առաջատար թիմերի հետ, և դա անելու փորձը կարող է վտանգել նրանց ներքին առաջնությունում պայքարը։
Շաբաթական երեք անգամ բարձր մակարդակով խաղալու համար անհրաժեշտ է շատ մեծ թիմ՝ տեխնիկական և ֆիզիկական որակներով խաղացողներով, ինչպես նաև այնպիսի փորձով և ռեսուրսները կառավարելու կարողությամբ, որը, անկեղծ ասած, չեմ կարծում, որ «Նապոլին» և «Ինտերը» դեռ ունեն։
Դուք կասեք. «Ինտերը» հասավ եզրափակիչ, և եթե ՊՍԺ-ն չլիներ, ամեն ինչ կարող էր այլ կերպ լինել»։ Տրամաբանական է։ Բայց ճշմարտությունն այն է, որ իտալական ակումբները զիջում են արտասահմանյան ակումբներին՝ թե՛ խաղաոճով, թե՛ ֆինանսներով։ Նայեք ՊՍԺ-ի, «Չելսիի», «Բարսելոնայի», «Լիվերպուլի», «Մանչեսթեր Սիթիի», «Բավարիայի», «Ռեալի» բյուջեներին։ Նրանք գնում են լավագույնը, վճարում են հսկայական աշխատավարձեր։
Մենք Չեմպիոնների լիգան չենք հաղթել 2010 թվականից ի վեր, այնպես որ՝ կան պատճառներ։ Մեզ ոչ միայն փող է պակասում, այլև՝ գաղափարներ։ Իտալական ֆուտբոլը դժվարին ժամանակաշրջան է ապրում, դա փաստ է»,- Սակիի խոսքերն է մեջբերում Football Italia-ն։
