Մադրիդի «Ռեալի» կիսապաշտպան Ջուդ Բելինգհեմը կարող է պատժվել Լա Լիգայի 30-րդ տուրի՝ «Վալենսիայի» դեմ խաղից հետո (1:2) դրսևորած վարքի համար: Այս մասին հայտնում է Goal-ը։
Երբ անգլիացին հեռանում էր խաղադաշտից՝ մրցավարի եզրափակիչ սուլիչից հետո, նա զայրույթից ոտքով հարվածեց VAR համակարգի մոնիտորի համար նախատեսված հենակին՝ այն կառուցվածքին, որի վրա հանդիպման գլխավոր մրցավարը դիտում է խաղի վիճելի դրվագները՝ օգնականի ազդանշանից հետո։
Աղբյուրի համաձայն՝ Լա Լիգայի կանոնակարգը նախատեսում է պատիժներ՝ այդ թվում տուգանք, նախազգուշացում և անգամ որակազրկում՝ մեկից երեք խաղի տևողությամբ այն դեպքերում, երբ խաղացողը ագրեսիա է դրսևորում տեխնիկական սարքավորումների նկատմամբ։ Բելինգհեմին ամենախիստ պատժից կարող է փրկել այն հանգամանքը, որ VAR-ի մոնիտորի հենակը, թեև շարժվել է, սակայն չի տապալվել գետնին և, ամենայն հավանականությամբ, չի վնասվել։
Ընթացիկ մրցաշրջանում 21-ամյա անգլիացին «սերուցքայինների» կազմում մասնակցել է 41 հանդիպման՝ դառնալով 13 գոլի և 13 գոլային փոխանցման հեղինակ։
