«Կրասնոդարի» գլխավոր մարզիչ Մուրադ Մուսաևը ամփոփել է ՌՊԼ-ի 22-րդ տուրում «Ֆակելի» նկատմամբ 5:0 հաշվով հաղթանակը և խոսել կիսապաշտպան Էդուարդ Սպերցյանի վերադարձի մասին։
Հանդիպումը կայացել է Կրասնոդարում, որտեղ բոլոր գոլերը խփվել են երկրորդ խաղակեսում։ Սպերցյանը, որը վնասվածք էր ստացել մարտի 1-ին «Կրիլյա Սովետովի» հետ խաղում (1:1), վերադարձել է խաղադաշտ երկրորդ կեսում՝ խփելով գոլ և կատարելով գոլային փոխանցում։
Մուսաևը խաղի մասին․
— Մինչև հաշվի բացվելը «Ֆակելն» ավելի հարմարավետ էր զգում. նրանք խիտ էին պաշտպանում, ինչը դժվարացնում էր մեր աշխատանքը։ Առաջին գոլից հետո մրցակիցն սկսեց ավելի բաց խաղալ, և դա մեզ ձեռնտու էր։ 27 հազար հանդիսատես կար, հիանալի մթնոլորտ, և տղաները ճիշտ արեցին, որ չկանգնեցին ու շարունակեցին հարձակվել։
Փոխարինումներն իրենց դերը խաղացին, բայց նաև նրանց, ում փոխարինեցին, պետք է արժանին մատուցել․ նրանք մեծ աշխատանք կատարեցին։ «Ֆակելն» մարտական թիմ է, ուստի ուրախ ենք այս հաղթանակի համար։
Սպերցյանի վերադարձի մասին․
— Չեմ ասի, որ Էդիկը մենակ փոխեց խաղը, սա ամբողջ թիմի վաստակն էր։ Բայց ակնհայտ էր, որ նա կարոտել էր ֆուտբոլը։ Ճիշտ որոշում կայացրինք՝ նրան դաշտ դուրս բերելով երկրորդ կեսում․ նա գոլային փոխանցում կատարեց և գոլ խփեց։ Ամենակարևորը՝ առողջության հետ խնդիր չունի։ Շարունակում ենք առաջ շարժվել։
«Կրասնոդարը» 49 միավորով շարունակում է գլխավորել Ռուսաստանի առաջնության մրցաշարային աղյուսակը։
