Երևանի «Փյունիկի» վաճառքի հետ կապված գործարքն ավարտին կհասցվի մինչև տարեվերջ: Այս մասին ArmSport.am-ի հետ զրույցում հայտնել է թիմի սեփականատեր Արթուր Սողոմոնյանը՝ միաժամանակ հերքելով ռուսական մամուլում տեղ գտած այն տեղեկությունը, թե Ուրալի մետալուրգիական ընկերություններից մեկը մոտ է հայկական ակումբը գնելուն:
«Չգիտեմ՝ որտեղից են տարածվել այդ լուրերը: Ինձ համար շատ կարևոր է՝ այն մարդը, որը կգնի «Փյունիկը», հասկանա՝ դա պատասխանատվություն է, ոչ թե հոբբի կամ բարեգործություն: «Փյունիկը» Հայաստանի ամենաճանաչված ակումբներից մեկն է, երկրի 16-ակի չեմպիոնը, իսկ մեր ֆուտբոլիստները պարբերաբար ներկայացնում են Հայաստանի հավաքականը: Այս պահին ես, իսկապես, բանակցություններ եմ վարում, բայց անձերի, ոչ թե ընկերությունների հետ, այն էլ՝ ոչ Ռուսաստանից: Մինչ այս երկու ֆուտբոլային ընկերությունների հետ եմ բանակցել Անգլիայից, բայց նրանք, ուսումնասիրելով Հայաստանի առաջնությունը, դեռևս նպատակահարմար չգտան ներդրումներ կատարել հայկական ֆուտբոլում»,- պատմում է Արթուր Սողոմոնյանը:
-Նշեցիք, որ այս պահին բանակցությունների մեջ եք: Ովքե՞ր են ակումբի հնարավոր գնորդները:
-Անհատներ են, իսկ առաջին դեմքը Եվրոպայից է, ոչ թե Ռուսաստանից: Բանակցությունները դրական կերպով են ընթանում. կարծում եմ՝ մինչև դեկտեմբերի 20-ը գործարքը կիրականացնենք ու կհայտարարենք այդ մասին: Հունվարից թիմն արդեն նոր փուլ է սկսելու՝ ուսումնամարզական հավաքների ու նախապատրաստության առումով, և այդ ամենի հետ ես արդեն կապ չեմ ունենալու: Ինձ համար, իսկապես, շատ կարևոր է, թե ով է շարունակելու իմ գործը: Այս ընթացքում շատ լուրջ հետաքրքրություն կար Կիպրոսի բուքմեյքերական ընկերություններից մեկի կողմից, առաջարկում էին շատ լավ գումարներ, ընդ որում՝ մի քանի անգամ, բայց մերժեցի, քանի որ չեմ ցանկանում՝ «Փյունիկը» հայտնվի բուքմեյքերական ընկերությունների ձեռքում: Դա ինձ համար սխալ է: Ինքս նախատեսում եմ որոշակի կարգավիճակում մնալ ակումբում ու շարունակել աշխատանքս ակումբի ակադեմիայում՝ մանակապատանեկան թիմերի զարգացման ուղղությամբ: Գլխավոր թիմի հետ ես գործ չեմ ունենա. այդ ամենը կփոխանցեմ նոր բաժնետերերին, բայց ակադեմիայի հարցերով կզբաղվեմ ես: Այս առումով ևս կարևոր է, թե ով կլինի նոր գնորդը, որպեսզի կարողանանք միասին աշխատել: Ես շատ եմ ցանկանում, որ «Փյունիկը» շարունակի իր վերելքի ուղին: Ակումբի հիմքն ակադեմիան է. մենք ունենք 6-12 տարեկան 2000-ից ավելի երեխաներ, ու ես շատ եմ ցանկանում, որ նրանք հասնեն իրենց ֆուտբոլային երազանքներին: Խոսքը ոչ թե գործարքի, այլ ապագայի մասին է: Այն մարդիկ, որոնց հետո հիմա բանակցություններ են ընթանում, հիանալի գիտակցում են, որ «Փյունիկը» առաջին հերթին պատասխանատվություն է. թիմը պետք է պայքարի ամենաբարձր տեղերի համար և մրցունակ լինի ոչ միայն Հայաստանում, այլև՝ Եվրոպայում:
-Ռուսական ընկերության վերաբերյալ լուրերն այդ դեպքում որտեղի՞ց են տարածվել:
-Իսկապես, չգիտեմ: Դժվար է պատկերացնել, թե ռուսական մետալուրգիական ընկերությունն ինչ հետաքրքրություն կարող է ունենալ հայկական ֆուտբոլային ակումբ ձեռքբերելու հարցում: Յուրաքանչյուրն իր գործը պետք է անի: Այստեղ պետք է լինեն մարդիկ, որոնք սիրահարված են ֆուտբոլին, կապ ունեն ֆուտբոլի հետ ու մտածում են ֆուտբոլի զարգացման մասին: Այս գործարքը կոմերցիա չէ: Այն գումարները, որ ես այս 7,5 տարվա ընթացքում ծախսել եմ, մտադիր չեմ հետ ուզել: Ֆինանսի խնդիր չկա. կարելի է ասել՝ գործարքը միայն գույքի գումարն է ներառում: Բացի գումարից այս ակումբում ես նաև հոգի եմ ներդրել, սեր ու ժամանակ: Կցանկանամ, որ այդ մոտեցումը շարունակվի:
-Պարոն Սողոմոնյան, նշեցիք, որ հունվարին նախատեսվող գործընթացների հետ արդեն կապ չեք ունենալու: Թիմին արդեն հանդիպե՞լ եք:
-Այո, նոյեմբերին եկա Երևան ու հրաժեշտ տվեցի գլխավոր թիմին, մարզչական շտաբին: Ջերմ զրուցեցինք: Մենք, իսկապես, շատ երկար ու հետաքրքիր ճանապարհ ենք անցել միասին, այդ թվում՝ մեր երկրպագուների հետ: Ինձ համար սա շատ ցավալի որոշում էր, բայց այսօրվա իրավիճակն ինձ ստիպեց նման որոշում կայացնել: Բայց իմ մնալը, կարծում եմ, ավելի շատ վնաս է բերում ֆեդերացիայի հետ այսօրվա հարաբերություններին:
-Ակումբը վաճառքի հանելու որոշման մասին հայտարարեցիք սեպտեմբերին՝ ֆուտբոլի ֆեդերացիայի հետ հարաբերությունների պատճառով: Դրանից հետո, հետաքրքիր է, արձագանքներ ստացե՞լ եք ֆեդերացիայից:
-Ոչ, ընդհակառակն ինձ ամեն կերպ փորձում էին հեռացնել այս ամենից: Հիմա էլ մեկ տարով որակազրկել են: Աբսուրդային որոշում է ինձ արգելել ներկա լինել անգամ մանկապատանեկան խաղերին: Չեմ հասկանում: Նման նախադեպ չի եղել, որ մարդն իր սեփական գումարները ծախսի և չկարողանա գալ ու խաղ դիտել: Սա ինձ համար շատ ցավալի է: Չեմ ցանկանում, որ իմ պատճառով ֆուտբոլիստներն ու պատանի խաղացողները տուժեն: Ոչ պրոֆեսիոնալ ու աբսուրդային որոշում է: Այն մարդկանց, ովքեր իրենց անձնական գումարն են պատրաստ ծախսել հայկական ֆուտբոլում, ֆեդերացիան ամեն կերպ փորձում է ֆուտբոլից հանել: Ես արդեն 7-րդ ներդրողն եմ, որ հեռանում է: Ցավալի է, բայց հայկական ֆուտբոլում այսօրվա իրավիճակը սա է: Վստահ եմ՝ Հայաստանը մեծ ապագա ունի, ու ոչնչով չի զիջում օրինակ Վրաստանին: Բայց որպեսզի ընթանանք զարգացման ճանապարհով, առաջին քայլը պետք է լինի ֆեդերացիայի ղեկավարության հրաժարականը:
Նշենք՝ այս օրերին «Փյունիկի» ակադեմիան ներկայացնող «Փյունիկ 2011-1» թիմը Մոսկվայում մասնակցում է «Կոնստանտին Սարսանիայի 4-րդ մանկապատանեկան միջազգային հուշամրցաշարին»:
