«Ուրարտու» ֆուտբոլային ակումբն ավարտված մրցաշրջանը մի կերպ եզրափակեց 4-րդ հորիզոնականում, թեպետ նախորդ առաջնությունում նվաճել էր չեմպիոնական տիտղոսն ու տիրել երկրի գավաթին։ Թվում էր՝ ամառային տրանսֆերային պատուհանի ընթացքում թիմը կուժեղանա և հնարավորություն կունենա պայքարել եվրագավաթներում որքան հնարավոր է՝ հեռուն գնալու և նոր մեկնարկող առաջնությունում առնվազն պահպանելու սահմանված նշաձողը։ Նախորդ ամռանը երևանյան ակումբը կատարեց տրանսֆերներ, որն, առաջին հայացքից, պետք է օգտակար լինեին թիմի համար։
Պավել Մոգիլևեց
Առաջին կասկածելի տրանսֆերը գրանցվեց Ռուսաստանից։ Կազմը համալրեց կիսապաշտպան Պավել Մոգիլևեցը, որը երիտասարդ տարիքում համարվել է Ռուսաստանի հավաքականի անդամ և հրավեր է ստացել տարբեր մարզիչների օրոք, նաև խաղացել է «Ռուբինում»։ Պայմանագիր կնքելու պահին 31 տարեկան էր՝ շատ լավ տարիք կարիերայում նոր ընթացք ստանալու համար։ Մինչև հոկտեմբերի վերջին օրերը, Մոգիլևեցը ստանում էր խաղաժամանակ, թեպետ սեպտեմբերին վերականգնվել էր Սերբիայում մկանային թեթև վնասվածքից։ «Փյունիկի» հետ հոկտեմբերի 25-ի խաղից հետո Մոգիլևեցն այլևս չհայտնվեց «Ուրարտուի» կազմում։ Ընդ որում, սկզբնական շրջանում նրա՝ հայտացուցակում չհայտնվելը որևէ զարմանք չէր առաջացնում. «վնասվածքն է էլի եղել խնդիր», — մտածել են լրագրողները։
Այնուհետև, նոյեմբերի 4-ին «Ուրարտուն» պաշտոնական հայտարարություն տարածեց առ այն, որ ակումբը և Պավել Մոգիլևեցը խզել են կնքված պայմանագիրը երկկողմ համաձայնությամբ։ Ձմեռային դադարից հետո, երբ առաջնությունը վերսկսվեց, ռուսական ԶԼՄ-ներում Մոգիլևեցը «ռումբ» գցեց՝ հայտարարելով, որ իրեն ակումբից հեռացրել է Գունկոն և այդ արարքը որակել է «զազրելի»։
«Սեպտեմբերի կեսերին «Վանի» հետ հանդիպումից առաջ թիմի սպորտային տնօրեն Դմիտրի Կուդրյաշովն ինձ ասաց, որ ակումբի նախագահը՝ Ջևան Չելոյանցը, դժգոհ է ինձնից և հռետորական (կամ, գուցե, ոչ հռետորական). հարց է բարձրացրել՝ ինչու են պայմանագիր կնքել ինձ հետ։ Ես բացատրեցի, որ անում եմ առավելագույնը և հաստատ չեմ նախատեսում ավարտել կարիերաս: Ու ամենակարևորը՝ Կուդրյաշովն ինձ ասում է, որ մարզիչը չգիտի նախագահի այս խոսքերի մասին. Գունկոն հավատում է ինձ և աջակցում է։ Այս խոսակցությունը տեղի է ունենում «Վանի» հետ խաղից երկու ժամ առաջ։ Այդ խաղում հաղթեցինք, ես դաշտ դուրս եկա 1-1 հաշվի ժամանակ և օգնեցի հաղթել։ Հաջորդը երկու խաղում նույնպես հաղթեցինք՝ «Արարատին» ու «Նոային», ես մեկնարկային կազմում եմ եղել, շտաբից դեռ բողոքներ չկային իմ դեմ։ Հոկտեմբերի 25-ին պարտվում ենք «Փյունիկին»։
Խաղից հետո հանգստյան օր էր։ Մարզման օրը հասնում եմ մարզաբազա, հանգիստ պատրաստվում եմ մարզադահլիճում, լռություն էր։ Մարզումից 10 րոպե առաջ Գունկոն կանչում է իր մոտ։ Նա խոսում էր ինչ-որ կտրուկ ու մեղադրական տոնով. «Մենք տեսնում ենք, որ մարզումների ընթացքում ինչ-որ բան քեզ չի բավարարում, քեզ դուր չեն գալիս մեր գաղափարները։ Կարծում ենք, որ պետք է բաժանվենք»: Ես մի քիչ չհասկացա ու հարցրի. «Խնդրում եմ՝ ասեք՝ սա Ձե՞ր որոշումն է, թե՞ նախագահի»։ «Ոչ,- պատասխանեց նա,- ես եմ այդպես որոշել»:
Եվ այս ամենը` մարզումից 10 րոպե առաջ: Բայց չէ՞ որ նախորդ օրը հանգստյան օր էր, ուրեմն այդ ժամանակ թող զանգահարեին։ Ես միշտ կապի մեջ եմ եղել նրա հետ, թող զանգահարեր, բացատրեր իրավիճակը։ Ավելին՝ նրա օգնականները տեսան, որ ես արդեն մոտ կես ժամ է մարզվում եմ մարզասրահում, մոտեցան, բարևեցին։ Ինչու՞մն է խնդիրը։
Գունկոյի հիմնական արտահայտությունն այսպիսին էր. «Կարծում եմ, որ ավելի լավ կլինի թե՛ մեզ, թե՛ քեզ համար»: Ինչպե՞ս «ավելի լավ» կլինի ինձ համար: Ո՞ւմ եմ հիմա պետք ես: Որտե՞ղ կարող եմ թիմ գտնել մրցաշրջանի կեսին: Ես նույնիսկ չեմ կարողանա որևէ թիմի հետ մարզվել։ «Ուրարտուն» ինձ նույնիսկ չի առաջարկել տեղափոխվել երկրորդ թիմ։ Ստոր և զզվելի էր։ Հատկապես տարօրինակ է լսել, որ դա նրա որոշումն է, ոչ թե նախագահի։ Հետո տղաներն ինձ ասացին, որ տեսականորեն «Փյունիկից» հետո նա ինձ պարտության համարյա գլխավոր պատճառ դարձրեց։ Անձամբ Գունկոյի դեմ ես ոչինչ չունեմ, դժվար թե դա իր որոշումն էր։ Սա ֆուտբոլ է, ամեն բան կարող է տեղի ունենալ, այդ թվում՝ այսպիսի իրավիճակներ, բայց կարելի էր ամեն ինչ շնորհքով կազմակերպել, ոչ թե այսպես ստորաբար, — Sport24-ի հետ զրույցում գարնան սկզբին պատմել է Մոգիլևեցը։
Վլադիսլավ Պանտելեև
Այս տարվա հունվարի 16-ին ակումբը գեղեցիկ կերպով ներկայացրեց հերթական նորեկին՝ Ռուսաստանի Պրեմիեր լիգան ներկայացնող Կազանի «Ռուբինի» և Տուլայի «Արսենալի» նախկին ֆուտբոլիստ Վլադիսլավ Պանտելևին, որը նաև «Սպարտակ-2»-ի կազմում դարձել էր Ռուսաստանի երկրորդ առաջնության հաղթող։ Ըստ վիճակագրության՝ Պանտելեևը դաշտ է դուրս եկել «Ուրարտուի» մեկնարկային կազմում միայն 1 անգամ՝ Գյումրիում անցկացնելով 86 րոպե։ Դրանից հետո դաշտում անցկացրել է 1 խաղակես՝ «Վեստ Արմենիայի» դեմ, այնուհետև 12 րոպե խաղացել է «Վանի» հետ տնային խաղում։ Դրանից հետո Պանտելևը դաշտում չի հայտնվել։ Ավելին՝ նա չի հայտավորվել «Ուրարտուի» հաջորդ 12 խաղերից 11-ին։ Որևէ տեղեկություն նրա հավանական վնասվածքի կամ ապաքինման ժամկետների մասին չի հրապարակվել։
Եվ ահա, մրցաշրջանի ավարտից հետո Պանտելեևի հետ պայմանագիրը երկկողմանի համաձայնությամբ խզելու մասին «Ուրարտուն» հայտարարություն է տարածել։ Ըստ շրջանառվող լուրերի, Պանտելեևը ակումբի հետ այլևս կապ չի ունեցել արդեն ապրիլի կեսերից, սակայն դրա մասին հայտարարվել է միայն մրցաշրջանի ավարտից հետո։ Եթե ուշադրությամբ թերթենք ակումբի սոցիալական ցանցերում տեղադրված նկարները ապրիլի 13-ից ի վեր, չենք կարողանա այնտեղ գտնել Պանտելեևի լուսանկար մարզումային ընթացքից։ Հետևաբար, կարելի է ենթադրել, որ շրջանառվող տեղեկությունները համապատասխանում են իրականությանը։ Ինչի՞ համար թիմ եկավ այս ֆուտբոլիստը, ի՞նչ օգուտ տվեց, ինչի՞ համար աշխատավարձ ստացավ։ Այս հարցերը հռետորական են թերևս։
Դենիս Գլուշակով
Նույն հռետորական հարցերը կարելի է շրջանառության տակ դնել Դենիս Գլուշակովի պարագայում։ Ռուսաստանի հավաքականի նախկին ֆուտբոլիստի գալն «Ուրարտու» մեծ աղմուկ հանեց ձմեռային տրանսֆերային պատուհանի փակման օրը։ «Սպարտակի» նախկին ֆուտբոլիստն, իհարկե, տարբերվում էր իր կարգով, սակայն 38 տարեկան լինելու հանգամանքը նրան խանգարում էր բարձր որակով հանդիպում անցկացնել 90 րոպեի ընթացքում։ Բայց մոտ 10 հազար ԱՄՆ դոլար աշխատավարձ ստացող ֆուտբոլիստից ակնկալիքներն ավելի շատ էին։ Սակայն Գլուշակովը թիմին օգնելու փոխարեն հայտնվեց հնչեղ և «յուղոտ» սկանդալի կենտրոնում, որի մասին արդեն տեղեկացրել էինք օրերս։
Ակումբում առաջիկայում սպասվում են լուրջ փոփոխություններ։ Ձմռանը կամ նախորդ ամռանը միացած ո՞ր ֆուտբոլիստները կմնան երևանյան թիմում և որո՞նք կհեռանան, ցույց կտա ժամանակը։ Դմիտրի Գունկոյի օրերն էլ, ըստ լուրերի, ցավոք, հաշված են։ Բավական բարդ իրավիճակում են հիմա Հայաստանի նախորդ առաջնության հաղթողն ու Ջևան Չելոյանցը։ Խնդիրներ, որոնք պետք է լուծվեն մինչև հունիսի միջնամասը, երբ ակումբը սկսի նախապատրաստվել Կոնֆերենցիաների լիգայի որակավորման փուլի խաղերին, որպեսզի գոնե այս անգամ առաջին մրցափուլից դուրս չմնա։
