ՀՖՖ նախագահ Արմեն Մելիքբեկյանն այսօր կայացած ասուլիսի ընթացքում խոսել է վերջերս վերաբացված Արմավիրի մարզադաշտի, ինչպպես նաև Վանաձորի ու Աբովյանի մարզադաշտերի մասին, որոնք պետք է շահագործման հանձնվեն գալիք տարում.
«Արմավիրում Սարդարապատ ֆուտբոլային ակումբը 4 թիմ ունի ու մարզվում է այնտեղ։ Մենք հիմա Սարդարապատի հետ քննարկում ենք նախագիծը։ Բացի այդ, նախատեսում ենք, որ ՀՊԼ թիմերից մեկն այնտեղ կխաղա և, իհարկե, նույնը կխոսենք, երբ շահագործվեն Աբովյանի ու Վանաձորի մարզադաշտերը։
Շենգավիթը մասնավոր դպրոց է, ՀՖՖ-ն կապ չունի, բայց կարծում եմ, որ դա նույնպես թիմերի համար լավ ելք է, վարձակալելու և այնտեղ խաղալու:
«Միկա» մարզադաշտը ՀՖՖ-ին դեռ չի հանձնվել և երբ որ հանձնվի, կհասկանանք ինչ ենք անելու։ Ամեն դեպքում, գործընթացը մոտ է ավարտին: Այնտեղ մարզվում են «Միկա» ակումբի թիմերը, բայց եկեք տարանջատենք մարզադաշտն ու ակումբը, քանի որ դա ընդամենը վարձակալած է: Ընդհանուր առմամբ մենք դրական ենք գնահատում այդ դպրոցի աշխատանքն ու քննարկումներից հետո կհասկանանք անելիքները»,-ասաց ՀՖՖ նախագահը:
