Հայաստանի ազգային հավաքականի ու «Ալաշկերտի» կիսապաշտպան Արտակ Գրիգորյանը թիմի՝ Հայաստանի չեմպիոն դառնալուց հետո ArmSport-ի հետ զրույցում կիսվել է տպավորություններով։
«Իհարկե չեմպիոն դառնալը մի ուրիշ հաճույք է, ու նոր նպատակներ է դնում քո առաջ, քանի որ խաղալու ես Չեմպիոնների լիգայում ու ավելի պետք է արդարացնես սպասելիքները: Իհարկե, առաջին մրցափուլը Եղիշե Մելիքյանի հետ անցկացրեցինք ու շատ լավ շրջան էր, հետո դժվարություններ առաջացան, բայց կարողացանք միավորներ հավաքել: Ամենակարևորը վերջին երեք հանդիպումներն էին, որ բոլորս հավաքվեցինք ու նպատակ դրեցինք, որ անպայման պետք է դառնանք չեմպիոն»,-ասաց «Ալաշկերտի» ավագը:
Խոսելով մրցաշրջանի ընթացքում մարզչական փոփոխությունների ու թիմի ելույթների մասին Արտակ Գրիգորյանն ասաց.
«Մարզչական փոփոխությունների հետ կապված կարող է ասել ակումբի նախագահը: Իհարկե Մելիքյանի գլխավորությամբ լավ հանդես եկանք ու այդ մրցափուլն ավարտեցինք առաջին տեղով: Մելիքյանը հենց ինքն է ցանկացել հեռանալ: Խաշմանյանի մասով երևի կապված էր մի քանի անհաջող խաղերի հետ»,-ասաց Գրիգորյանը:
