Այսօր կկայանա Չեմպիոնների Լիգայի կիսաեզրափակիչ փուլի երկրորդ դիմակայությունը․ միմյանց կհանդիպեն Եվրոպայի ամենահարուստ ակումբներից երկուսը՝ ֆրանսիական ՊՍԺ-ն ու անգլիական «Մանչեսթեր Սիթին»։
Այս դիմակայությանը հավանաբար սպասում էին շատերը։ Երկու ակումբ, որոնք այդքան էլ հարուստ եվրագավաթային պատմություն չունեն, սակայն այս պահին ունեն շատ հարուստ սեփականատերեր, ովքեր արդեն մեկ տասնամյակ է, ինչ ահռելի գումարներ են ներդնում այս ակումբներում։
Թերևս տեղին է շեշտելը, որ «Մանչեսթեր Սիթիի»՝ վերջին տարիների ընթացքում ծախսած գումարը թիմի պաշտպանությունն ուժեղացնելու համար ավելի մեծ է, քան որոշ երկրների ռազմական բյուջեն։
Ընդհանրապես, երկրպագուների մի մասը բացասական է վերաբերվում այսպես ասած «փողի պարկերին»․ շատերը երկրպագում են ավանդույթներ և պատմություն ունեցող ակումբներին։ Բայց դա չի նշանակում, որ այս թիմերի դիմակայությունը այդ պատճառով կորցնում է իր հմայքը։ Երկու թիմերն էլ արդեն քանի տարի պայքարում են բաղձալի տիտղոսի համար, ներքին առաջնություններում նրանք արդեն իսկ նվաճել են բոլոր հնարավոր տիտղոսները, սակայն ՉԼ-ն նրանց համար դեռ շարունակում է մնալ ցանկալի «արգելված պտուղ»։
⚔ Պատմություն
Այս թիմերն անձնական դիմակայությունների հարուստ պատմությամբ աչքի չեն ընկնում։ Թիմերը հանդիպել են երեք անգամ, և բոլոր հանդիպումներն էլ կայացել են ոչ վաղ անցյալում։ Նախ թիմերը հանդիպել են 2008թ ԵԼ խմբային փուլում և գոլազուրկ ոչ-ոքի էին գրանցել։ Իսկ ահա 2016թ ՉԼ 1/4 եզրափակչում առավելությունն անգլիական ակումբի կողմն էր (1-0, 2-2): Այսպիսով, «շեյխերի դիմակայությունում» ֆրանսիական ակումբը դեռ հաղթանակ չունի իր ակտիվում, ինչը կարող է շտկել արդեն այսօր։
⚽ ՊՍԺ և Սիթի
Նեյմարն ու ընկերները նախորդ տարի մոտ էին Չեմպիոնների Լիգայի գավաթը գլխավերևում պահելուն, սակայն նրանց այդ երազանքից զրկեց «Բավարիան»։ Այս տարի փարիզյան ավազակախումբն իր «մուռը» հանեց Ֆլիկի կոլեկտիվից՝ հաղթահարելով գործող չեմպիոնների արգելքը քառորդ եզրափակչում։ Իսկ մինչ այդ նրանք պայքարից դուրս էին թողել «Բարսելոնային»։ Նախորդ տարի շատերն էին ասում․ «Ո՞ւմ է անցել փլեյ-օֆֆում ՊՍԺ-ն, որ հասել է եզրափակիչ։ Նրանք արժանի չէին եզրափակչին»։ Եթե նախորդ տարի իսկապես մրցակիցներն այդքան ահեղ չէին, ապա այս տարի, համաձայնվե՛ք՝ ՊՍԺ-ն արժանիորեն է իր տեղը զբաղեցնում կիսաեզրափակչում։
Նույնը կարելի է ասել նաև Գվարդիոլայի թիմի մասին․ «քաղաքաբնակները» պարզապես հիանալի են այս մրցաշրջանում՝ թե՛ ներքին առաջնությունում, թե՛ Չեմպիոնների Լիգայում։ Վերջերս նրանք նվաճեցին նաև Անգլիայի Լիգայի գավաթը՝ ևս մեկ անգամ ցույց տալով, որ թիմը շատ լավ մարզավիճակում է գտնվում։ «Սիթին», ի տարբերություն ՊՍԺ-ի, ներքին առաջնությունում չունի լուծելու խնդիրներ․ նրանք միանձնյա առաջատարն են ԱՊԼ-ում, չեմպիոնությունը, կարելի է ասել, արդեն նրանց գրպանում է, և մակունիանցիների ամբողջ ուշադրությունը սևեռված է դեպի ՉԼ-ն։ ՊՍԺ-ն Ֆրանսիայի առաջնությունում համառ պայքար է մղում չեմպիոնության համար, բայց կարծում եմ, ակումբի ղեկավարությունը դեմ չի լինի զոհաբերել լոկալ տիտղոսը հանուն ՉԼ-ի։ Համենայն դեպս, եթե ՊՍԺ-ն կարողանա այս տարի ակումբի տիտղոսների թանգարանը համալրել ամենաթանկարժեք նմուշով, ոչ ոք ուշադրություն չի էլ դարձնի ներքին առաջնությունում թիմի զբաղեցրած տեղին։
Գվարդիոլան և Պոչետինոն՝ այսօրվա խաղի մասին
Գվարդիոլա․ «Նախորդ գիշեր ես ցանկանում էի լավ քնել ու չեմ մտածել Մպաբեի ու Նեյմարի մասին: Մենք կփորձենք լավ պաշտպանվել: Իհարկե, լրացուցիչ ուժեր պետք կլինեն նրանց դիմագրավելու համար, բայց դա չի նշանակում, որ մենք պետք է մտածենք միայն նրանց մասին»
Պոչետինո․ «Անգլիայում աշխատելու ժամանակներից շատ լավ գիտեմ Ֆիլ Ֆոդենին: Պիտի հսկենք այդ խաղացողը: Մտքեր ունենք, թե ինչպես դա անենք, բայց առաջադրանքը բարդանում է: Բայց նույնքան դժվար կլինի նաև Ռիյադ Մահրեզի, Կևին դե Բրույնեի, Ռահիմ Ստերլինգի, Սերխիո Ագուերոյի ու Գաբրիել Ժեզուսի դեմ Այն աշխարհի ամենալավ թիմն է: Նրանք հիանալի խաղացողներ ունեն և գերազանց մարզչական շտաբ: «Սիթին» երկրագնդի լավագույն թիմերից մեկնարկը, նրանք լավագույն մարզիչն ունեն: Իհարկե, ավելի դժվար է լինել, քան «Բավարիայի» դեմ, բայց տեսնենք, ով գիտի: Ամենակարևորը 180 րոպե է, քանի որ որոշվում է, ով դուրս կգա եզրափակիչից: Մենք պետք է ավելի լավ խաղանք»։
ՊՍԺ- «Մանչեսթեր Սիթի» (ապրիլի 28). Գլխավոր մրցավար ՝ Ֆելիքս Բրիխ, օգնականներ ՝ Մարկ Բորշ և Ստեֆան Լուպ, պահեստային ՝ Դանիել Զիբերտ, VAR – Մարկո Ֆրից, VAR օգնական ՝ Բաստիան Դանկերտ:
Ինչո՞ւմն է ՊՍԺ-ի առավելությունը «Սիթիի» նկատմամբ, կամ հակառակը․․․ Առանձնապես ոչ մի բանում, միայն կարելի է նշել այն փաստը, որ ՊՍԺ-ի ներկայիս մարզիչը՝ Պոչետինոն, արդեն ունի ՉԼ-ում Գվարդիոլայի թիմի արգելքը հաղթահարելու փորձ «Տոտենհեմի» հետ։ Իսկ ընդհանրապես, մենք ներկա պահին մեր դիտակետում ունենք երկու հրաշալի թիմ, հրաշալի ֆուտբոլիստներով, կոլորիտային մարզիչներով և․․․ լավ, շեյխերին այս անգամ շրջանցենք։ Մեզ սպասվում է շա՜տ թեժ ու հետաքրքիր դիմակայություն այս երեկո (23:00 Երևանի ժամանակով), այնպես որ, զինվում ենք համեղ ուտելիքներով ու ըմպելիքներով, ու երկու ժամ վայելում ֆուտբոլային բլոքբասթերը․․․
Վար Բաբայան
