Պատերազմից հետո Արցախի ֆուտբոլային զարկերակը կանգ չի առել

Պատերազմի սարսափներն ու հետևանքները դեռ բաց վերքի պես կրող Արցախն իր մեջ ուժ է գտել ֆուտբոլով զբաղվելու և աշխարհին իր ձայնը լսելի դարձնելու նաև ֆուտբոլի միջոցով։ 

«Շատ վնասներ ենք կրել, բայց… Արցախի ղեկավարությունն ու մեր հովանավորներն ամեն ինչ արել են, որ Արցախում ֆուտբոլը կայանա: Հիմա շատ բարձր մակարդակով ամեն ինչ կատարվում է: Ունենք շատ ֆուտբոլիստներ, ովքեր զոհվել են կամ անհայտ կորած են, սա շատ մեծ ազդեցություն է թողել Արցախում ֆուտբոլի վրա: Ամեն ինչ անում ենք, որ շատ արագ վերականգնենք ամեն ինչ»,-ArmSport-ի հետ զրույցում ասում է  Արցախի ֆուտբոլի լիգայի գործադիր տնօրեն Մհեր Ավանեսյանը:

Ֆուտբոլի Արցախի լիգային այս տարի մասնակցում է 9 թիմ: Սա արցախյան լիգայի 4-րդ առաջնությունն է: Նախորդ տարի չի կայացել կորոնովիրուսի համավարակի պատճառով: Առաջնության մասնակից թիմերի առավելագույն քանակը եղել է 12-ը, սակայն այս տարի առաջնությանը չեն մասնակցում մի քանի թիմեր՝ այդ թվում Հադրութի ու Քարվաճառի թիմերը։

Առաջնության 8-րդ տուրից հետո մրցաշարային աղյուսակը գլխավորում է Ստեփանակերտի «Երազանքը»: Առաջնությունն անցկացվում է 3 շրջանով:  Առաջնությանը մասնակցում են նաև Ստեփանակերտի մինչև 17 տարեկանների թիմը, «Ավո-Մարտունի», «Բերդ Ճարտար», «Բերդ Ասկերան», «Վանք Գանձասար», «Ջրաբերդ», «Մարտակերտ»  և «Քիրս Շուշի» թիմերը: 

«Այս տարի առաջնության մակարդակը ավելի բարձր է ու տարեց տարի զգում ենք որակական աճ:  Արցախի ֆուտբոլի լիգան Արցախում ֆուտբոլը զարգացնելու ծրագրի մի մասն է: Մեծ հույսեր կան, որ ամեն ինչ ավելի բարձր մակարդակի կլինի, ու այս թիմերը հետագայում կդառնան պրոֆեսիոնալ ակումբներ: Կարող ենք ասել, որ պրոֆեսիոնալ ֆուտբոլ գնալու ճանպարհին ենք: Բոլոր ակումբները ֆինանսավորվում են Արցախի լիգայի կողմից: Հովանավորներ ունենք դրսից, անուններ չեմ տա, բայց բարերարների կողմից ֆինանսավորում կա»,-ներկայացնում է լիգայի գործադիր տնօրենը:

Արցախի լիգան անկախ կառույց է Արցախի ֆուտբոլի ֆեդերացիայից: Լիգայի նախագահն է Հայաստանի հավաքականի նախկին ֆուտբոլիստ Հրաչ Յագանը: Խաղերն անցկացվում են Ստեփանակերտում, Ասկերանում: Մյուս ամսվանից նաև Մարտունին ու Մարտակարետը կընդունեն լիգայի հանդիպումներ, քանի որ այս մարզադաշտերը պատերազմի ընթացքում տուժել են և դեռ վերանորոգման աշխատանքեր կան: 

«Լիգան առանձին համակարգ է: Միտքն այն է, որ  խթան լինի ֆուտբոլի զարգացման համար, ու ամբողջ աշխարհում իմանան, որ Արցախում կա ֆուտբոլ: Մյուս չճանաչված պետությունների համեմատ մենք ավելի բարձր մակարդակով ենք անցկացնում, որովհետև հետևողականությունը շատ բարձր է: Հատկանշական է, որ հետաքրքրություն ունենք նաև այլ երկրներից, ու մոտ 8 լեգիոներ ունենք, որոնք մասնակցում են ԱՖԼ-ին»,-ձեռքբերումներով կիսվում է Մհեր Ավանեսյանը:

Նրա խոսքով այս տարի լիգային պետք է մասնակցեր նաև ռուս խաղաղապահների թիմը, բայց տեխնիկական խնդիրների պատճառով չստացվեց:

Արցախի ֆուտբոլի լիգան ավարտվելու է նոյեմբերի վերջին:

Մհեր Ավանեսյանը նաև Հայաստանի Առաջին խմբում հանդես եկող «Լեռնային Արցախ ՖԱ»-ի տնօրենն է:

Ամփոփելով թիմի ելույթներն Առաջին խմբում նա նկատում է.

«Առաջնությունը լավ էինք սկսել, բայց պատերազմի սկսվելուց հետո թիմը կանգնեց հայրենիքի պաշտպանության գործին: Պատերազմից հետո թիմը նորից կազմավորվեց, մասնակցել ենք բաց թողնված խաղերին: Մեծ փոփոխություններ ենք արել թե՛ մարզչական շտաբում, թե՛ ֆուտբոլիստների կազմում: Փառք Աստծո, ճիշտ ճանապարհի ու ճիշտ ուղղու վրա ենք: Նույն կերպ նաև մանկապատանեկան թիմերի մասին կարող եմ ասել: Նշեմ, որ պետության ղեկավարությունը Ֆուտբոլի ֆեդերացիայի հետ ամեն ինչ անում է, որ ակումբը ոչ մի խնդիր չունենա»:

Առաջին խմբի թիմերից Պրեմիեր լիգայի արտոնագիր են ստացել միայն «Սևանն» ու «Վեստ Արմենիան», իսկ «Լեռնային Արցախը» հաջորդ մրցաշրջանում նորից հանդես կգա Առաջին խմբում.

«Մենք չենք դիմել ՀՊԼ-ին մասնակցելու համար, հաջորդ տարի հանդես կգանք Առաջին խմբում, ու միանշանակ կպայքարենք Բարձրագույն խմբի համար: Եթե պատերազմը չլիներ, անպայման այս տարի էլ էինք դիմելու հավատարմագրման համար: Խնդիրները շատ մեծ էին կապված պատերազմի հետ: Թիմը երեք ամիս չմարզվեց, ու պատկերացրեք, թե ինչ խնդիրների առաջ կանգնեցինք:  Դրա համար նորից կազմավորեցինք թիմը: Ամեն ինչ անելու ենք հաջորդ տարի ՀՊԼ-ին մասնակցելու համար»,-վստահություն է հայտնում Ավանեսյանը:

Երվանդ ՀԱԿՈԲՅԱՆ