Արցախյան պատերազմից հետո ամենադժվարը ապրելու ցանկության մեջ մոտիվացիա գտնելն ու այդ թելը բաց չթողնելն է: Ցավ, որը մինչ օրս կա ցանկացած հայի սրտում: Բացառություն չեն նաև մարզիկները, որոնք պատերազմի օրերից սկսած տարատեսակ մարզաձևերում հաղթանակներով շարունակում են ուրախության պահեր պարգևել հայ ազգին: Հերթը հասավ նաև ծանրորդներին:
Ծանրամարտի Եվրոպայի առաջնության Հայաստանը մեկնեց գերմարտական կազմով՝ նաև թիմային հաշվարկում առաջին տեղը գրավելու համար:
Տղամարդկանց բոլոր քաշային կարգերում մեր ծանրորդները մեդալների հավակնորդներ էին: Տոկիո-2020-ից առաջ Եվրոպայի առաջնությունը վերջին ստուգատեսն էր:
Տղամարդկանց հավաքականի կազմում առաջինը հարթակ դուրս եկավ 81 կգ քաշային Ռաֆիկ Հարությունյանը: Ռաֆիկը հանդես եկավ B խմբում, որտեղ գրավեց առաջին տեղը՝ սահմանելով երիտասարդների նոր ռեկորդ: Երիտասարդ ծանրորդը շքեղ տեսք ուներ հրում վարժությունում ու հրեց 196 կգ-անոց ծանրաձողը՝ երկրորդ մատուցմամբ ու հրաժարվեց երրորդ մոտեցումից: Այս արդյունքը բավարար էր, որպեսզի Հարությունյանը A խմբի ելույթից հետո նույնիսկ կանգներ պատվո հարթակին: Ավելին, երկամարտում ևս Ռաֆիկը կարող էր մեդալակիր դառնալ, սակայն 1 կգ-ով պարտվեց լատվիացի Ռիտվարս Սուխարևսին:
89 կգ քաշային կարգում Եվրոպան նոր չեմպիոն ունի: Հայաստանն այստեղ 2 մասնակից ուներ՝ ի դեմս Անդրանիկ Կարապետյանի ու Կարեն Ավագյանի: Կարենը պոկում վարժությունում ցույց տվեց 175 կգ արդյունք ու երկրորդ տեղը գրաված Ռևազ Դավիթաձեին գերազանցեց 4 կգ-ով: Կարապետյանը 170 կգ արդյունքով երրորդն էր: Հրում վարժությունում Ավագյանն առաջին մոտեցմամբ հրեց 200 կգ-անոց ծանրաձողը, սակայն երկրորդ ու երրորդ մոտեցումները ձախողեց։ Ամեն ինչ Դավիթաձեի ձեռքերում էր, սակայն վրացի ծանրորդը չկարողացավ գլխավերևում պահել 205 կգ-անոց ծանրաձողն ու բավարարվեց երկրորդ տեղով: Հրում վարժությունում Կարապետյանը միայն առաջին մոտեցումը հաջողեց ու 6-րդն էր, սակայն երկամարտում դարձավ բրոնզե մեդալակիր: Հայաստան վերադառնալուց հետո Կարապետյանը նշեց, որ սա մեծ հաջողություն է իր համար՝ հիշելով վերջին տարիների անհաջողությունները: Հիշեցնենք, որ Անդրանիկը Ռիոյի ՕԽ-ի ընթացքում կոտրեց ձեռքը, իսկ հետագայում՝ վերկանգնվելուց հետո, մեկը մյուսի հետևից ձախողեց մրցումները՝ տարբեր պատճառներով, չնայած նրան, որ միշտ իր քաշային կարգում ֆավորիտների թվում է եղել: «Սև գիծը» հաղթահարված է ու ամեն ինչ առջևում է, իսկ Կարեն Ավագանը մեծահասակների առաջին իսկ առաջնությունում դարձավ չեմպիոն:
Դավիթ Հովհաննիսյան ու Հակոբ Մկրտչյան. նրանք մեր ծանրորդներն էին՝ 96 կգ քաշային կարգում: Բաթումիում կայացած Եվրոպայի նախորդ առաջնության ժամանակ նրանք հանդես եկան 89 կգ քաշային կարգում: Այնտեղ Հակոբը դարձավ Եվրոպայի չեմպիոն, իսկ Դավիթը երրորդն էր: Հակոբը նաև 89 կգ քաշային կարգում աշխարհի գործող չեմպիոնն է: Հասկանալի է, որ նոր քաշային կարգում ոսկու համար պայքարելը բարդ կլիներ ու այստեղ մեր ծանրորդները դեռ պետք է հարմարվեն: Մեր 2 ծանրորդն էլ ավելի ուժեղ են հրում վարժությունում: Պոկում վարժության ժամանակ Դավիթը վնասվածք ստացավ ու կարողացավ մեկ մոտեցում հաջող կատարել՝ պոկելով 165 կգ, իսկ Հակոբը, կրկին մեկ մոտեցում հաջողելով, բարձրացրեց 160 կգ: 180 կգ արդյունքով վարժության հաղթողը Վրաստանից Անտոն Պլիսնոյն էր: Հրում վարժությունում Դավիթը ձախողեց բոլոր մոտեցումները՝ վնասվածքի պատճառով. մեր ծանրորդի ծնկները չէին ծալվում, իսկ Հակոբը ցույց տվեց իր որակներն ու 212 կգ արդյունքով վարժությունում նվաճեց փոքր արծաթե մեդալ ու Պլիսնոյին պարտվեց 1 կգ-ով: Երկամարտում Հակոբը կանգնեց պատվո հարթակի երրորդ աստիճանին:
102 կգ քաշային կարգում ամենաշքեղ ելույթը Հայաստանինն էր: 2 ծանրորդ՝ չեմպիոն ու փոխչեմպիոն: Արսեն Մարտիրոսյանը մինչ այս առաջնությունը մեծահասակների մրցաշարերում մեդալ չուներ, սակայն Մոսկվայում դարձավ Եվրոպայի փոխչեմպիոն՝ երկամարտի 380 կգ արդյունքով: Պոկում վարժությունում պայքար ծավալվեց Սամվել Գասպարյանի ու ադրբեջանցի Դադաշ Դադաշբայլիի միջև, որտեղ 1 կգ-ով հաղթեց Դադաշբայլին, սակայն հրում վարժությունում Սամվելը նրան թիկունքում թողեց մի ամբողջ 12 կգ-ով ու դարձավ Եվրոպայի չեմպիոն: 2019-ին Բաթումիում Սամվելը դարձել էր Եվրոպայի փոխչեմպիոն՝ զիջելով միայն Չումակին, ով այս տարի հանդես եկավ 109 կգ քաշային կարգում: Պարգևատրման արարողության լուսանկարներով կարելի է անվերջ հիանալ:
Ամենասպասված չեմպիոնությունը 109 կգ քաշային կարգում էր: Աշխարհի ու Եվրոպայի կրկնակի չեմպիոն, ՕԽ-ի արծաթե մեդալակիր Սիմոն Մարտիրոսյանը, կարելի է ասել, երկամարտում մրցակից չուներ, սակայն վնասվածքը թույլ չտվեց Սիմոնին լիարժեք մասնակցել Եվրոպայի առաջնությանը: Պոկում վարժությունում միայն երրորդ մատեցմանը Սիմոնը բարձրացրեց 190 կգ-անոց ծանրաձողը, բայց դա բավարար էր փոքր ոսկե մեդալ նվաճելու համար: Հրում վարժությունում Սիմոնը մեկ մոտեցմամբ կարող էր դառնալ Եվրոպայի չեմպիոն, սակայն 3 մոտեցումն էլ հաջող չստացվեց՝ նույն պատճառով: Հիշեցնենք, որ Սիմոնը ծնկի վնասվածք էր ստացել, վիրահատվել էր ու վերջերս էր սկսել լիարժեք մարզվել: Նրան անհրաժեշտ էր մասնակցել ԵԱ-ին, քանի որ ՕԽ-ին մասնակցելու համար 6 քվոտա պետք է ունենալ, և սա վերջին ստուգատեսն էր Տոկիո-2020-ից առաջ: Մինչ այս Սիմոնը 5 մրցման էր մասնակցել: Մարտիրոսյանն այժմ արդեն հնարավորություն ունի մասնակցել Տոկիո-2020-ին:
Գերծանր քաշային կարգում կրկին հավասարը չուներ Լաշա Տալախաձեն: Վրացին նոր ռեկորդներով Եվրոպայում նվաճեց 5-րդ չեմպիոնությունը: Այս անգամ էլ մեր ծանրորդներին՝ աշխարհի ու երիտասարդների Եվրոպայի ու աշխարհի չեմպիոն Վարազդատ Լալայանին ու ՕԽ-ի արծաթե մեդալակիր Գոռ Մինասյանին չհաջողվեց հավասար պայքար մղել Տալախաձեի հետ: 21-ամյա Լալայանը դարձավ բրոնզե, իսկ Մինասյանը՝ արծաթե մեդալակիր: Լալայանն առաջին անգամ էր մասնակցում մեծահասակների առաջնությանը:
Կանանց շրջանում հաջող ելույթ ունեցավ Լիանա Գյուրջյանը՝ դառնալով ԵԱ բրոնզե մեդալակիր: Պոկում վարժությունում Լիանան 6-րդն էր՝ 98 կգ արդյունքով, իսկ հրում վարժությունում 129 կգ արդյունքով նվաճեց փոքր արծաթե մեդալ՝ երկամարտում գրավելով երրորդ հորիզոնականը: 18-ամյա ծանրորդը խոստանում է ապագայում ավելի մեծ հաջողություններ գրանցել:
55 կգ քաշային կարգում Իզաբելա Յայլյանն անչափ մոտ էր երկամարտի մեդալին: 90 կգ արդյունքով պոկում վարժությունում Իզաբելան նվաճեց փոքր արծաթե մեդալ, սակայն հրում վարժությունում 2 անգամ չկարողացավ հրել 110 կգ ծանրաձողը ու երկամարտում գրավեց 4-րդ հորիզոնականը:
Տաթև Հակոբյանն ու Արփինե Դալալյանը գրավեցին համապատասխանաբար 9-րդ ու 4-րդ հորիզոնականները՝ երկամարտի՝ 221-ական կգ արդյունքով:
Այսպիսով, Հայաստանի հավաքականը մեդալային պայքարում գրավեց երրորդ հորիզոնականը, իսկ երկամարտի մեդալներով զիջեց միայն Ռուսաստանին:
Արմեն Գարամյան
