Երեկ տեղեկացրել էինք, որ Լատվիայի չեմպիոն «Ռիգան» պայմանագիր է կնքել Հայաստանի ազգային հավաքականի կիսապաշտպան Էդգար Բաբայանի հետ, ով նախկինում խաղում էր Դանիայում:
Սակայն հեղինակավոր Transfermarkt-ը հայտնում է, որ ֆուտբոլիստը մերձբալթյան ակումբում հանդես կգա մինչև այս տարվա հուլիսի 1-ը։
Ըստ պորտալի, նա կարիերան կշարունակի Կիպրոսի «Պաֆոս» ակումբում, որը հանդես է գալիս կիպրոսյան Բարձրագույն խմբում։ Ներկա պահին թիմը զբաղեցնում է մրցաշարային աղյուսակի 9-րդ հորիզոնականը։
Էդգարը ծնվել է 1995 թվականի հոկտեմբերի 28-ին Բեռլինում, Գերմանիա: Վաղ տարիքում Բաբայանը տեղափոխվել է Դանիա: Էդգարը Հայաստանի և Դանիայի քաղաքացի է:
Հայաստանի ազգային հավաքականի կազմում նա իր ակտիվում ունի 11 խաղ և մեկ գոլ: Էդգարը մեկ խաղ է անցկացրել նաև Դանիայի Մ 20 հավաքականում:
