Դեկտեմբերի 18-19-ը Մոսկվայում կայացած սամբոյի Աշխարհի գավաթի խաղարկությունում Հայաստանի հավաքականը նվաճեց 5 մեդալ:
«Աշխարհի գավաթի խաղարկությանը մասնակցեցինք 8 մարզիկով և նվաճեցինք 2 արծաթե, 3 բրոնզե մեդալ: Աշխարհի ու Եվրոպայի չեմպիոն Տիգրան Կիրակոսյանը հանդես եկավ իր քաշից բարձր և այդ քաշային կարգում եզրափակիչ դուրս եկավ, որտեղ պարտվեց ռուս մարզիկին ու զբաղեցրեց 2-րդ տեղը: Իր ելույթը բավարար եմ գնահատում, քանի որ իր համար անսովոր քաշում էր հանդես գալիս:
62 կգ քաշային կարգում Արամ Աղաջանյանն առաջին անգամ էր մասնակցում գավաթի խաղարկությանն ու բրոնզե մեդալ նվաճեց: Լավ հանդես եկավ նաև Վահագն Չալյանը: Վարսիկ Գրիգորյանը հնարավորութուն ուներ եզրափակիչ մտնելու, բայց մրցավարական կողմնակալության պատճառով միայն 3-րդ տեղի համար պայքարեց: Մի քանի առաջատար պետություններ չէին մասնակցում աշխարհի գավաթին: Ընդհանուր մրցաշարի մակարդակը վատ չէր, բայց կային երկրներ, որ մասնակցում էին առաջին անգամ ու շատ հաջող հանդես եկան:»,-ArmSport-ի հետ զրույցում ասաց սամբոյի հավաքականի գլխավոր մարզիչ Վովիկ Խոջայանը:
Սամբիստների համար այս տարին հագեցած չէր: Անցկացվել են մարզային ու Հայաստանի առաջնություններ, սակայն Հայաստանի հավաքականը չի մասնակցել Աշխարհի առաջնությանը:
«Այս տարի անց ենք կացրել մարզային առաջնություններ, որտեղից ընտրել ենք լավագույններին և անցկացրել ենք Հայաստանի առաջնությունները, որի արդյունքներով ձևավորվել է տարբեր տարիքային հավաքականները, սակայն չենք կարողացել մասնակցել Եվրոպայի ու Աշխարհի առաջնություններին: Եվրոպայի առաջնությունը հետաձգվել էր մեկ տարով, իսկ Աշխարհի առաջնությունը տեղի ունեցավ Սերբիայում, սակայն չմասնակցեցինք պատերազմի պատճառով: Հավաքական թիմի մոտ 25 մարզիկ Արցախում էին, որից 7-ը վիրավորում է ստացել: Մեծ մասն տԱՉՐարդեն ապաքինվել է: Ամենածանրը Արցախցի Սերգեյ Կարապետյանի վիճակն է, ով կոմայի մեջ է: Մնացած տղաներն արդեն վիրահատվել են և լավ են զգում իրենց»,-ասաց Խոջայանը:
Խոջայանի խոսքով, կորոնավիրուսի համավարակը մեծ վնաս հասցրեց իրենց:
«Կառավարության որոշմամբ ամբողջ տարվա ընթացքում մարզադպրոցները փակ էին, այդ պատճառով պատրաստվածությունը ցածր մակարդակի վրա էր, ինչը երևաց Աշխարհի Գավաթի խաղարկությունում: Բացի այդ երկու մարզիկ ունեինք Արցախից: Հոգեբանորեն դժվար էր իրենց համար վերականգնվել: Կորոնավիրուսը շատ վնաս տվեց, երկար դադար ունեցանք: Աշխարհի Գավաթի խաղարկությունում ամբողջ օրն անցկացնում էինք մարզադահլիճում` երեկոյան գալիս էինք հյուրանոց, առավոտ նորից գնում մարզադահլիճ»,-նշեց հավաքականի մարզիչը:
Վովիկ Խոջայանը նշեց, որ գալիք տարվա օրացուցային պլանն արդեն կա: Նախատեսված է, որ գալիք տարում հավաքականը լիարժեք մասնակցի բոլոր մրցաշարերին:
Երվանդ ՀԱԿՈԲՅԱՆ
