Հայաստանի ազգային հավաքականի և «Ուրալի» պաշտպան Վարազդատ Հարոյանը Sport24-ին տված անկեղծ հարցազրույցում խոսել է Իտալիայի հավաքականից կրած 1-9 հաշվով խայտառակ պարտության, գլխավոր մարզիչ Աբրահամ Խաշմանյանի հայտարարության և այլնի մասին.
«Իտալացիների հետ խաղը մեզ համար սարսափելի դասավորվեց, շատ, շատ վատ խաղացինք: 5 պաշտպանով երկրորդ խաղն էինք անցկացնում, և մեկնարկն արդեն իսկ սարսափելի էր` մեկ րոպեում 2 գոլ բաց թողեցինք ու այդպես էլ ուշքի չեկանք: Երբ խաղի ժամանակ նայում էի ցուցատախտակին, չէի հավատում աչքերիս, իսկ խաղից հետո մեզնից ոչ մեկն առհասարակ չէր հասկանում, թե ինչ տեղի ունեցավ: Ես մինչև հիմա շոկի մեջ եմ, արդեն 4-րդ օրն է` չեմ կարողանում տեղս գտնել:
Հիմա ամբողջ աշխարհը, հավանաբար, խոսում է այդ պարտության մասին: Մենք չպետք է պարտվեինք այդպիսի հաշվով: 1-9-ը անթույլատրելի է Հայաստանի հավաքականի համար` մրցունակ թիմ, որի կազմում բարձրակարգ ֆուտբոլիստներ են հանդես գալիս:
Պատկերացրեք իմ զգացողությունները. նման մղձավանջից հետո, երբ դու դեռ չես հասկանում, թե ինչ է տեղի ունեցել, Աբրահամ Խաշմանյանն ասուլիս է տալիս ու հայտարարում, որ դա ոչ թե Հայաստանի ազգային հավաքականն էր, այլ` սովորական մի հավաքական: Նման խոսքերից հետո զայրույթն ավելի մեծ է: Հավաքականի գլխավոր մարզիչն իրավունք չունի նման բաներ ասելու իր ֆուտբոլիստների հասցեին:
Այս հավաքականում բացի ինձնից խաղում են նաև իմ ընկերները` ամենաուժեղ ֆուտբոլիստները: Երբ քեզ նշանակում են հավաքականի գլխավոր մարզչի պաշտոնում, իսկ դու գալիս ու նման բաներ ես ասում այդպիսի խաղից հետո, դա անընդունելի է:
Նշանակություն չունի`ինչ հաշվով է ավարտվել խաղը, թեկուզ 1:9, թեկուզ 0:15`դու իրավունք չունես այդ կերպ արտահայտվելու: Չեմ պատկերացնում է`ինչպես է հնարավոր աշխատել նման մարզչի հետ: Ընդ որում, խաղից հետո Խաշմանյանը մեզ հետ առհասարակ չի շփվել, ոչ մի բառ չի ասել:
Հայաստանի ներկայիս հավաքականը մեղավոր չէ ստեղծված իրավիճակում: Եթե մարզիչն է հավաքել այս կազմը, հրավիրել 21 ֆուտբոլիստի, ապա այդ ֆուտբոլիստները ներկայացնում են Հայաստանի հավաքականը: Ես մեր հավաքականի բոլոր տղաներին լավ եմ ճանաչում, նրանք բոլորը պրոֆեսիոնալներ են, բարձրակարգ ֆուտբոլիստներ: Մենք լավ կոլեկտիվ ունենք և հիանալի մթնոլորտ հավաքականում, բայց երբ կարդում ես գլխավոր մարզչի նման հարցազրույցը, հասկանում ես, թե ինչու ամեն ինչ այսպես ստացվեց:
Խոսել եմ հավաքականի տղաների հետ ու պետք է նշեմ, որ բոլոր ֆուտբոլիստները վրդովված են Խաշմանյանի այդ խոսքերից. ես դա հաստատ գիտեմ: Վստահ եմ` ֆուտբոլիստները կաջակցեն ինձ այս հարցազրույցից հետո: Մարզիչը դա ասաց նաև իմ հասցեին, իմ թիմակիցների հասցեին:
Գալիս ենք հավաքական մեծ ցանկությամբ ու նախևառաջ խաղում ենք մեր երկրի, մեր դրոշի և հայ երկրպագուների համար, և հետո միայն մարզչի ու ինքներս մեզ համար:
Հայաստանի հավաքականի ֆուտբոլիստների անունից կարող եմ հայտարարել, որ մենք առանձնահատուկ վերաբերմունք ունենք ազգային թիմի նկատմամբ:
Այո, այս ընտրական փուլն այնքան էլ լավ չսկսեցինք, բայց հետո կարևոր հաղթանակներ տարանք Հունաստանի ու Բոսնիայի նկատմամբ ու խմբից դուրս գալու իրական շանսեր ունեինք: Պետք է հաղթեինք Լիխտենշտեյնին ու Ֆինլանդիային, բայց մենք չկարողացանք դա անել, իսկ վերջին խաղում պարտվեցինք իտալացիներին նման հաշվով, իհարկե` խայտառակ:
Բայց ֆուտբոլիստները քրտինք են թափում, նույնիսկ եթե 1:9 հաշվով պարտվում են: Մեր քրտինքը մնում է դաշտում. թե ում մոտ ինչպես է ստացվում, դա արդեն առանձին թեմա է: Հասկանում եմ` նման հաշվին արդարացում չկա, բայց արդարացում չկա նաև այդպիսի խոսքերին: Իսկ եթե ֆեդերացիան գլխավոր մարզչի է նշանակում, որը հետո նման բաներ է ասում, նշանակում է`նա չի հարգում իր թիմին:
Ես հայրենասեր եմ ու շատ եմ սիրում իմ ազգին: Ինչ էլ` լինի, ամեն ինչ կտամ իմ ազգային թիմի մարզաշապիկի համար, բայց երբեք նման վերաբերմունք չեմ հանդուրժի իմ թիմի հանդեպ: Հատկապես, երբ տեսնում եմ, որ իմ թիմակիցը ամբողջովին ու մինչև վերջ նվիրվում է:
Այդ մասին ասել է նաև Հայաստանի հավաքականի նախկին պաշտպան Ռոբերտ Արզումանյանը` հիանալի ֆուտբոլիստ ու հիասքանչ մարդ:
«Նման խոսքերից հետո ֆեդերացիան պետք է որոշում կայացնի: Իսկ յուրաքանչյուր ֆուտբոլիստ իր համար արդեն ամեն ինչ որոշել է»: Ռոբերտն այսպես է ասել, քանի որ նույնպես խաղացել է հավաքականում, նա այստեղ ընկերներ է ունեցել:
Մեր հավաքականում արժանի ֆուտբոլիստները շատ են, ովքեր շատ բաների են հասել` Հենրիխ Մխիթարյանը կուժեղացներ ցանկացած թոփ-հավաքական: Ցավում եմ` Հենրիխը`ընկերս, վնասվածք է ստացել վերջին խաղերում: Մխիթարյանը միշտ մեզ հետ է, նա մեր ավագն է, սարի պես մեր թիմի թիկունքում է: Եվ նա, ինչպես նաև մենք բոլորս, դեռ մեր վերջին խոսքը չենք ասել դաշտում:
Կարծում եմ` ով թեմայի մեջ է, հիանալի հասկացել է, թե ինչ էր նշանակում իմ գրառումը Instagram-ում: Որոշ պահի տեսնում էի այդ նկարը, ու այն ճշգրտորեն փոխանցում է իմ այսօրվա մտքերը: Հարցազրույցս էլ դրա ապացույցն է:
Չգիտեմ, թե ինչ է տեղի ունենում ֆեդերացիայում, բայց ես, երկար ժամանակ խաղալով Հայաստանից դուրս, մեկ բան կարող եմ ասել. հիմա ամբողջ հայկական ֆուտբոլի համար շատ ծանր օրեր են: Մենք պետք է միասին հաղթահարենք այս օրերը: Բոլորը գիտեն, որ հայերը մեծ հաղթանակներ են տարել ուժեղագույն թիմերի դեմ: Մեր հավաքականը երբեք գաճաճ չի համարվել, որպեսզի որևէ մեկի համար հեշտ լինի մեր դեմ խաղալը:
Բոլոր ֆուտբոլիստների անունից կցանկանայի ներողություն խնդրել բոլոր հայ երկրպագուներից: Իմացեք` բոլոր ֆուտբոլիստները հավաքական են գալիս, որպեսզի հաղթեն ու ուրախացնեն իրենց ազգին: Հայաստանի հավաքականին երկրպագում են աշխարհի բոլոր ծայրերից, այն միավորում է մարդկանց, և մեր թիմը չի կարող հուսախաբ անել նրանց»,- ասել է Հարոյանը:
