Ֆուտբոլային սկաուտ․ Վալենսիան շարունակում է մնալ ֆուտբոլային քաղաք

Այսօր Ֆուտբոլային սկաուտ շարքում կանդրադառնանք Վալենսիա քաղաքի երկու ակումբների՝ «Վալենսիայի» և «Լևանտեի» ամենահեռանկարային ֆուտբոլիստներին։ «Չղջիկների» և «գորտերի» ո՞ր ֆուտբոլիստներին է սպասվում ֆուտբոլային մեծ ապագա․․․

Մաքսի Գոմես

🇺🇾 Ուրուգվայ
«Վալենսիա»
23 տարեկան

Եթե «Վալենսիայի» համար 2019/20 մրցաշրջանը ընդհանուր առմամբ կարելի է ոչ այդքան ստացված համարել, ապա թիմի գլխավոր ռմբարկուի համար այն այնքան էլ վատ չդասավորվեց։ Մինչ «Վալենսիա» տեղափոխվելը՝ Գոմեսը փայլում էր համեստ «Սելտայի» կազմում՝ երկու տարի անընդմեջ խփելով 10-ից ավելի գնդակ․ այս մրցաշրջանում նա ևս ապացուցեց, որ բավականին արդյունավետ ֆուտբոլիստ է՝ դառնալով իր թիմի գլխավոր ռմբարկուն։ Լատինամերիկացի ֆուտբոլիստը դեռ 23 տարեկան է, և ակներև է, որ «Վալենսիան» նրա գագաթնակետը չէ. նման արդյունավետությամբ շարունակելով հանդես գալ ևս մեկ-երկու մրցաշրջան՝ մենք անկասկած նրան կտեսնենք որևէ գրանդ ակումբի կազմում։

Էնիս Բարդի

🇲🇰 Հյուսիսային Մակեդոնիա
«Լևանտե»
25 տարեկան

Էնիսը արդեն երրորդ մրցաշրջանն է անցկացնում Լա Լիգայում․ դեռ 2017/18 մրցաշրջանում նա համալրեց «Լևանտեի» կազմը՝ տեղափոխվելով հունգարական «Ույպեշտից»։ Մակեդոնացին արագ ադապտացվեց նոր առաջնությունում և դարձավ Վալենսիա քաղաքի ամենահին ակումբի (հիմնադրվել է «Վալենսիայից» 10 տարի ավելի վաղ) առաջատարներից մեկը։ Այս մրցաշրջանում էլ նա «գորտերի» առանցքային ֆուտբոլիստներից մեկն էր, ու նրա 7 գոլերն ու 3 գոլային փոխանցումները զգալի դեր խաղացին այն հարցում, որ համեստ ակումբը կարողացավ ամրապնդվել մրցաշարային աղյուսակի միջնամասում։

Բարդին ունիվերսալ ֆուտբոլիստ է, ով հիմնականում հանդես է գալիս կիսապաշտպանության կենտրոնում, իսկ հարկ եղած դեպքում խաղում է կիսապաշտպանության ձախ եզրում, երեմն էլ «10» համարի դիրքում։ Վերջերս անգլիական մամուլում լուրեր էին շրջանառվում, որ «Արսենալի» գլխավոր մարզիչ Միկել Արտետան անձամբ հետաքրքրված է Էնիսի ծառայություններով։ Շուտով թոփ-5 լիգաներում կբացվի տրանսֆերային պատուհանը և հետաքրքիր է՝ արդյունքում որտեղ կշարունակի իր կարիերան մակեդոնացի ֆուտբոլիստը։

Խոսե Գայա

🇪🇸 Իսպանիա
«Վալենսիա»
25 տարեկան

Գրեթե ամեն տասնամյակ «Վալենսիայի» ակադեմիան ֆուտբոլային աշխարհին նվիրում է մի քանի ֆուտբոլիստների, ովքեր հետագայում կամ դառնում են համաշխարհային աստղեր, կամ էլ իրենց հետքն են թողնում իսպանական ֆուտբոլում։ Ձախ պաշտպան Խոսե Լուիս Գայան կարող է համալրել ֆուտբոլային «բեթմենների» շարքը։ Ներկայումս, «Վալենսիայի» նախկին ֆուտբոլիստ Խորդի Ալբայի («Բարսելոնա») հետ միասին նա համարվում է լավագույն իսպանացի ձախ եզրային պաշտպաններից մեկը, ու եթե հաշվի առնենք, որ Գայան 6 տարով ավելի երիտասարդ է, ապա շուտով հենց նա կդառնա հավաքականի հիմնական ձախ պաշտպանը (չնայած կան ևս մի քանի մեծ պոտենցիալ ունեցող ֆուտբոլիստներ՝ Գրիմալդո, Անխելինո, Ֆիրպո)։ Հավանաբար, նման կարգի պաշտպանը երկար չի մնա «Վալենսիայի» կազմում և նրան ևս շուտով կտեսնենք որևէ գրանդ ակումբում:

Բորխա Մայորալ

🇪🇸 Իսպանիա
«Լևանտե»
23 տարեկան

«Ռեալի» ֆուտբոլիստը, ով արդեն երկրորդ մրցաշրջանն է անցկացնում «Լևանտեում», այս ամառ, ամենայն հավանականությամբ, կփորձի տեղափոխվել կարգով ավելի բարձր ակումբ։ Այս մրցաշրջանը թերևս լավագույնն էր իսպանացի հարձակվողի համար, ով կարողացավ 8 գոլի հեղինակ դառնալ Լա Լիգայի շրջանակում։ Մադրիդյան գրանդը դժվար թե վերադարձնի իր ֆուտբոլիստին մայրաքաղաք, և անձամբ ֆուտբոլիստն էլ հասկանում է, որ Զիդանը չի դիտարկում նրան որպես «Ռեալի» հիմնական կազմի խաղացող: Խոսակցություններ կան իտալական ակումբների, մասնավորապես «Լացիոյի» կողմից հետաքրքրության մասին: Այնպես որ, շուտով պարզ կդառնա՝ որտեղ կշարունակի կարիերան Բորխան՝ Հռոմո՞ւմ, թե՞ մեկ այլ ակումբում:

Ֆերան Տորես

🇪🇸 Իսպանիա
«Վալենսիա»
20 տարեկան

«Չղջիկների» ամենաթանկարժեք ակտիվը։ Ֆերանը համարվում է իսպանական ֆուտբոլի ապագա աստղը, ֆուտբոլիստ, ով ֆուտբոլային աշխարհին իր մասին լսեցնել տվեց Հայաստանում կայացած Մ19 Եվրոպայի առաջնությունից հետո։ Տորեսը ներկայիս «Վալենսիայի» առաջատարներից մեկն է, ում, անկասկած, մեծ ֆուբոլային ապագա է սպասվում։ Ֆուտբոլային ինտելեկտ, խաղադաշտը տեսնելու ունակություն, լավ տեխնիկա․ այս ամենը առկա է Տորեսի զինանոցում և պատահական չէ, որ «Մանչեսթեր Սիթին» և «Յուվենտուսը» նրան դարձրել են իրենց տրանսֆերային գլխավոր թիրախներից մեկը․ թե որտեղ կշարունակի կարիերան երիտասարդ իսպանացին՝ կիմանանք արդեն աաջիկա տրանսֆերային պատուհանի ժամանակ։

Վար Բաբայան

Շարքի նախորդ մասերը

Աֆրիկայի ամենաթանկարժեք 5 ադամանդները

5 ռմբարկուներ ոչ թոփ առաջնություններից

ՌԲ Լայպցիգը՝ ապագա աստղերի դարբնոց

Դեղձանիկները դեռ կճախրեն ֆուտբոլային երկնակամարում

Շոտլանդիայի առաջնության ամենահեռանկարային ֆուտբոլիստները

Լավագույնները Ա Սերիայի նկուղում

Ամերիկացիների երիտասարդ դեսանտը Եվրոպայում

Բեռլինում նոր աստղեր են հասունանում

Այս հիանալի Զալցբուրգը․․․

Երիտասարդ գլադբախցիներն ու դեղագործները՝ համաշխարհային ֆուտբոլի ապագա աստղեր