Երևանի «Արարատի» պաշտոնական ֆան-ակումբը՝ «Արարատ հուպ տուր» ՀԿ-ն պաշտոնապես դիմել է ՀՖՖ Բողոքարկման կոմիտեին՝ մաքսիմալ նվազեցնելու «Փյունիկի» ու Հայաստանի Ազգային հավաքականի ֆուտբոլիստ Էրիկ Վարդանյանի որակազրկման ժամկետը:
Հիշեցնենք, որ ֆուտբոլիստը ոչ-ֆուտբոլային պահվածք էր դրսևորել Հայաստանի առաջնության Բարձրագույն խմբի «Արարատ»-«Փյունիկ» հանդիպման ժամանակ՝ հարվածելով մրցակցին, մրցավարին, միջնամատ և հայհոյանքներ ուղղելով երկրպագուներին, հանդերձարանի ճանապարհին դուռ կոտրելով: Այս արարաքների համար ՀՖՖ կարգապահական կոմիտեն Վարդանյանին որակազրկել է 6 ամսով:
«Հարգելի՛ ֆուտբոլասերներ
Հայաստանի ֆուտբոլի առաջնության 12-րդ տուրի «Արարատ»-«Փյունիկ» հանդիպման 2-րդ կեսի միջնամասում և դրանից հետո տեղի ունեցած հայտնի իրադարձությունները լայն քննարկման առարկա դարձան ֆուտբոլային հանրության շրջանակներում։ Որոշ անհատներ ու կառույցներ, չունենալով կատարվածի վերաբերյալ իրական տեղեկատվություն, հանիրավի մեղադրանքներ հնչեցրեցին «Արարատի» երկրպագուներին՝ դրանով փորձելով ինքնահաստատման անհաջող փորձեր կատարել։
Հարկ ենք համարում այս առումով շեշտել, որ լինելով հայկական ամենահին ակումբի, ինչպես նաև հայկական ֆուտբոլի երկրպագուներ, մենք ամենաշատն ենք մտահոգ մեր ֆուտբոլի ներկա և ապագա վիճակով։ Հստակ գիտակցելով պահի լրջությունը, անիմաստ ենք համարել որոշների անհիմն քննադատություններին, ինչպես նաև «խորհուրդներին» անդրադառնալ, քանի որ «ԱՐԱՐԱՏ ՀՈՒՊ ՏՈՒՐ»-ում ընդգրկված են այնպիսի նվիրյալ երկրպագուներ, ովքեր մշտապես առաջնորդվել են ի շահ հայկական ֆուտբոլի և բնավ էլ կարիք չունեն հետևել որևէ մեկի «բարոյականության հորդորներին»։
Ստեղծված իրավիճակում ընդգծենք մեր մարզական լրագրողների և մեկնաբանների հստակ և անկողմնակալ դիրքորոշումը, բացառությամբ առանձին դեպքերի։ Կատարվածն, իրոք, աննախադեպ էր և ստեղծված իրավիճակի հանգուցալուծումն ի վերջո տեղի ունեցավ առողջ բանականության համատեքստում։
Հաշվի առնելով «Փյունիկ» ակումբի և Հայաստանի հավաքականի երիտասարդ կիսապաշտպան Էրիկ Վարդանյանի հայտարարությունը, առաջնորդվելով Հայաստանի ֆուտբոլի հավաքականի և առհասարակ հայկական ֆուտբոլի շահերով, սույն հայտարարությամբ «ԱՐԱՐԱՏ ՀՈՒՊ ՏՈՒՐ» ֆուտբոլասերների միություն հասարակական կազմակերպությունը պաշտոնապես դիմում է Հայաստանի ֆուտբոլի ֆեդերացիայի Բողոքարկման կոմիտեին՝ մաքսիմալ նվազեցնել ֆուտբոլիստի նկատմամբ սահմանված 6-ամսյա որակազրկման ժամկետը։
Հարգանքներով՝ «ԱՐԱՐԱՏ ՀՈՒՊ ՏՈՒՐ» ֆուտբոլասերների միություն
հասարակական կազմակերպություն», — գրված է երկրպագուների տարածած հայտարարության տեքստում:
Միջադեպից հետո «Արարատ հուպ տուր» ֆուտբոլասերների միություն ՀԿ-ն հայտարարություն էր տարածել՝ դատապարտելով ֆուտբոլիստի արարքն ու պահանջելով ներողություն խնդրել իրենցից: Ֆուտբոլիստը ներողությունը խնդրել է Կարգապահական կոմիտեի որոշումից հետո:
