Հոկտեմբերի 29-ին Հայաստանի Առաջին խմբի առաջնության 13-րդ տուրի ևս 4 հանդիպում է կայացել:
«Վանը» սեփական հարկի տակ ընդունել է «Ուրարտու-2»-ին և 2 անպատասխան գնդակ ուղարկել վերջինիս դարպասը: Չարենցավանում կայացած խաղում գոլեր են հեղինակել Մուսլիմ Բամմատգերեևը և Էզա Կուասի Ուիլֆրեդը, ովքեր աչքի են ընկել 50-րդ և 55-րդ րոպեներին համապատասխանաբար:
Այս հաղթանակի շնորհիվ Կարեն Բարսեղյանի թիմն իր միավորների թիվը հասցրել է 31-ի ու բարձրացել մրցաշարային աղյուսակի առաջին հորիզոնականը՝ հավասար միավորներ ունենալով «Լոկոմոտիվի» և «Վեստ Արմենիայի» հետ:
«Ուրարտու-2»-ը 21 միավորով 6-րդ տեղում է:
«Վան»-«Ուրարտու-2»` 2:0 (0:0)
Չարենցավան, «Քաղաքային» մարզադաշտ
Մրցավար՝ Շահեն Աղայան
Գոլերը՝ Մուսլիմ Բամմատգերեև, 50, Էզա Կուասի Ուիլֆրեդ, 55
Տուրի մյուս խաղում «Արարատ-Արմենիա-2»-ն Ավանի ակադեմիայի մարզադաշտում ընդունել է «Դիլիջանին» ու 7:1 հաշվով ջախջախիչ հաղթանակ է տարել մրցակցի նկատմամբ:
«Արարատ-Արմենիա-2»-ի կազմում դուբլեր են ձևակերպել Հակոբ Խաչատրյանն ու Էրիկ Ավետիսյանը, գոլեր են հեղինակել նաև Արամ Խամոյանը, Վազգեն Սարիբեկյանը և Արման Պողիկյանը:
Դիլիջանյան թիմի կազմում մեկ գոլ ետ է բերել Յաո Սիլվեն Կուասին:
«Արարատ-Արմենիա-2»-«Դիլիջան» 7:1 (2:0)
Երևան, Ֆուտբոլի ակադեմիա
Մրցավար՝ Էրիկ Գալստյան
Գոլերը՝ Հակոբ Խաչատրյան, 19, 80, 11մ, Էրիկ Ավետիսյան, 36, 57, Արամ Խամոյան, 48, Վազգեն Սարիբեկյան, 90, Արման Պողիկյան, 90+2 («Արարատ-Արմենիա-2»), Յաո Սիլվեն Կուասի, 55 («Դիլիջան»)
Այս հաղթանակի շնորհիվ «Արարատ-Արմենիա-2»-ն Առաջին խմբի մրցաշարային աղյուսակի 4-րդ հորիզոնականն է զբաղեցնում, իսկ «Դիլիջանը», որը 11 խաղում արդեն 55 գոլ է բաց թողել, 3 միավորով նախավերջին՝ 16-րդ հորիզոնականն է զբաղեցնում:
Տուրի մյուս խաղում «Արագածը» Աշտարակում ընդունել է «Շիրակ-2»-ին և 6:1 հաշվով հաղթանակ տարել:
Այս հաղթանակն «Արագածին» թույլ է տվել բարձրանալ մրցաշարային աղյուսակի 8-րդ հորիզոնականը (17 միավոր): Գյումրիի թիմը 10 միավորով 14-րդն է:
«Արագած»-«Շիրակ-2» 6:1 (4:0)
Երևան, ՄԶՀՀԿ մարզադաշտ
Մրցավար՝ Արտուշ Քերոբյան
Գոլերը՝ Ալեն Կարապետյան, 10, 19, 46, Կիրիլ Կոչնև, 18, Չարլզ Մարկ Իկեչուկվու, 41, 51 («Արագած»), Տիգրան Բաղդասարյան, 85, 11մ («Շիրակ-2»)
Խաղային օրվա վերջին խաղում «Արարատ-2»-ը Ձորաղբյուրի մարզաբազայում ընդունել է «Փյունիկ-2»-ին և նվազագույն հաշվով հաղթանակ տարել: Տանտերերի կազմում միակ ու հաղթական գնդակը խաղի 58-րդ րոպեին հեղինակել է Իգոր Գաբրիել Ագուիարը:
«Արարատ-2»-ն այս հաղթանակի շնորհիվ իր միավորների թիվը հասցրել է 17-ի և Առաջին խմբի առաջնության մրցաշարային աղյուսակի 9-րդ հորիզոնականն է զբաղեցնում, իսկ «Փյունիկ-2»-ը 13 միավորով գտնվում է 12-րդ տեղում:
«Արարատ-2»-«Փյունիկ-2»՝ 1:0 (0:0)
Ձորաղբյուր, Ձորաղբյուրի մարզաբազա
Մրցավար՝ Էդգար Սահակյան
Գոլը՝ Իգոր Ագուիար, 58
Նշենք՝ վաղը՝ հոկտեմբերի 30-ին, Առաջին խմբի առաջնության 13-րդ տուրի շրջանակում կկայանան վերջին 2 խաղերը: «Տորպեդոն» Աբովյանի Քաղաքային մարզադաշտում կմրցի «Մասիսի» հետ, իսկ ԲԿՄԱ-ն Վաղարշապատի ֆուտբոլի ակադեմիայում կընդունի «Սևանին»:
