Շախմատի Հայաստանի պատանեկան հավաքականի գլխավոր մարզիչ, կրկնակի օլիմպիական չեմպիոն Արտաշես Մինասյանը, մարզիչ, միջազգային գրոսմայստեր, եռակի օլիմպիական չեմպիոն Վլադիմիր Հակոբյանը և հավաքականի անդամներ Շանթ Սարգսյանը, Արթուր Դավթյանն ու Արամ Հակոբյանը Հնդկաստանում կայացած Մ-18 և Մ-20 տարեկանների աշխարհի առաջնություններից հետո «Արմենպրես» մամուլի ակումբում հանդիպեցին լրագրողներին:
Մարզիչներն ու մեր պատանի շախմատիստները նախ ամփոփեցին կայացած մրցաշարերը, նվաճումները, ապա խոսեցին նաև հետագա անելիքների ու Եվրոպայի առաջնությանը մասնակցող հավաքականի շանսերի մասին:
«Աշխարհի մինչև 18 տարեկանների առաջնության մեր պատվիրակությունը կազմված էր 8 շախմատիստից՝ 5 տղա և 3 աղջիկ: Մեդալների համար պայքարում էին 4 շախմատիստ՝ Արթուր Դավթյանը, Շանթ Սարգսյանը, մինչև 16 տարեկանների մեջ՝ Մամիկոն Ղարիբյանը, և աղջիկներից՝ մինչև 14 տարեկանների թվում Աստղիկ Մարտիրոսյանը: Ցավոք՝ 8-րդ տուրում Աստղիկը և Մամիկոնը պարտություն կրեցին, իսկ մյուս տղաներին հաջողվեց պայքարել մինչև վերջ: Շանթը նվաճեց 2-րդ մրցանակը, իսկ Արթուրը՝ 3-րդ մրցանակը: Ես իսկապես ուրախ եմ Արթուրի համար, քանի որ վերջապես նրան հաջողվեց մրցանակ նվաճել պատանեկան առաջնությունից: Իսկ Շանթի անունը վերջերս շատ ենք լսում, վերջերս այնքան հաղթանակներ ու նվաճումներ է ունեցել, որ այս հաղթանակը սպասելի էր: Երևի 6-7 մրցաշարում Շանթը նվաճում է կամ առաջին, կամ երկրորդ մրցանակ», — Մ-18 աշխարհի պատանեկան առաջնության մասին նշեց գլխավոր մարզիչը:
Մումբայում կայացած Մ-18 առաջնությունից օրեր անց, դարձյալ Հնդկաստանում՝ այս անգամ՝ Դելիում, կայացավ Մ-20 աշխարհի առաջնությունը: Այստեղ ևս մեր ընտրանու կազմը գրեթե նույնն էր:
«Թիմը 4 հոգուց էր բաղկացած՝ Շանթ Սարգսյանը, Արթուր Դավթյանը, և նրանց միացան Արամ Հակոբյանն ու Մարիամ Ավետիսյանը: Իհարկե, Շանթի և Արթուրի համար արդեն շատ դժվար էր, քանի որ Մումբայում 11 պարտիա խաղացել էին, և նույնքան էլ սպասվում էր Դելիում: Ես մտածում էի, որ նրանց համար շատ դժվար կլիներ պայքարել մրցանակների համար, բայց ապրեն նրանք. Կարողացան արդարացնել հույսերը: Շանթը այստեղ 2-րդ մրցանակ ստացավ: Արամ Հակոբյանը թարմ ուժերով էր, նա մինչև վերջ պայքարում էր առաջին տեղի համար: Նրա կարևոր պարտիան Շտամբուլյակի հետ էր, այստեղ նա պարտվեց ու բաց թողեց առաջին տեղի համար պայքարելու շանսը: Այս տղաներն արդեն, կարելի է ասել, պատանեկան շախմատի վետերաններն են: Նրանք արդեն թակում են մեծահասակների հավաքականի դռները: Մարիամ Ավետիսյանը Դելիում լրացրեց միջազգային վարպետի նորմայի կոչումը: Ուզում եմ շնորհավորել նրանց մարզիչներին, որոնք մեծ ավանդ են ունեցել այս տղաների հաղթանակների մեջ», — ամփոփումը եզրափակեց Արտաշես Մինասյանը:
Վլադիմիր Հակոբյանը նախ խոսեց պատանի շախմատիստների հետ աշխատանքի մասին, ապա խոսեց մեր շախմատիստների մրցելույթների մասին.
«Ինձ միշտ շատ հաճելի է աշխատել մեր տաղանդավոր, երիտասարդ շախմատիստների հետ: Եվ Շանթը, և Արթուրը, և Արամը շատ լավ են իրենց դրսևորել այս առաջնություններում: Նրանց արդյունքները շատ բարձր էին: Եթե շախմատային լեզվով ասեմ՝ +6, ինչը ցանկացած այլ մրցաշարում կարող էր բավական լինել առաջին տեղի համար: Պարզապես այստեղ հաղթողն ավելի շատ միավորներ էր հավաքել՝ 7: Ընդհանրապես այս երկու մրցաշարերում 2 և 3-րդ տեղերը վկայում են այն մասին, որ մենք այստեղ՝ Հայաստանում, այժմ ունենք շատ լավ շախմատային դպրոց: Պարզ է, որ այս երիտասարդ շախմատիստներն ապագայում շատ լավ ու արժանիորեն կներկայացնեն մեր հավաքականը», — ասաց Հակոբյանը:
«Վերջերս իմ խաղը լավ է ստացվում մրցաշարերում: Կարծում եմ՝ կապ ունի նաև այն, որ սկսել եմ մարզվել ընկեր Հակոբյանի հետ: Նա ինձ շատ մեծ օգուտ է տվել: Այս պահին դեռևս նպատակներ չունեմ: Պլանավորած մրցաշարեր չունեմ՝ մինչև Բարձրագույն խմբի մրցաշարը: Այնտեղ կփորձեմ լավ խաղալ», — համեստորեն իր մասին պատմեց Շանթ Սարգսյանը:
«Մրցաշարին լավ էի պատրաստվել, բայց 7-րդ տուրում կայացած պարտիան Եվգենի Շտամբուլյակի շատ վճռորոշ էր: Այդ պարտիայից հետո պարզ դարձավ, որ առաջին տեղի համար այլևս չեմ կարող պայքարել: Հետագա արդյունքի համար ավելին էի սպասում, բայց իմ խաղից ընդհանուր գոհ եմ: Թերևս այսքանը կարող եմ ասել: Պետք է ավելացնեմ նաև, որ տղաները՝ Շանթը և Արթուրը, Մումբայից այդքան հոգնած գալով՝ կարողացան պատվով հանդես գալ, ու Շանթը նաև մեդալ նվաճեց Դելիում, ինչը հերոսական քայլ էր», — Մ-20 աշխարհի առաջնությունում իր, ինչպես նաև թիմակիցների ելույթների մասին նշեց Արամ Հակոբյանը:
Արթուր Դավթյանը նույնպես ամփոփեց իր մասնակցությունը Մ-18 և Մ-20 առաջնություններում՝ նշելով, որ մրցաշարը հենց առաջին օրից էլ անցնում էր լարված պայքարում.
«Հենց առաջին տուրից էլ մրցաշարն անցնում էր շատ լարված ու մեծ ջանքեր էր պահանջվում մրցանակային տեղ զբաղեցնելու համար: Մինչև վերջին խաղը շատ լարված պայքար էր տիրում: Միայն վերջին 2 խաղը հաղթելուց հետո ես կարողացա բրոնզե մեդալ նվաճել: Ինչ վերաբերում է Մ-20 առաջնությանը՝ 11 լարված տուրերից հետո այստեղ չկարողացա այդքան լավ հանդես գալ: Ուզում եմ շնորհակալություն հայտնել իմ մարզիչներին, որոնք իրենց ավանդն են ունեցել իմ հաղթանակի մեջ: Առաջիկայում դեռ մրցաշարեր չունեմ»:
Արտաշես Մինասյանը խոսեց նաև շախմատում վերջին շրջանում տիրող վիճակի ու դրա՝ պատանեկան հավաքականի վրա ունեցած ազդեցության մասին։
«Ասեմ, որ այդ երևույթները ոչ մի կերպ չեն ազդում տղաների հաջողությունների վրա, քանի որ Հայաստանի Շախմատի ֆեդերացիան ամեն ինչ անում է, որ տղաները մասնակցեն բոլոր մրցաշարերին: Հակասությունների մասին այսօր չխոսենք: Այդ հարցերը միգուցե հետագայում բարձրացվի, բայց ոչ հիմա»:
Թե ինչու էր հավաքականը քիչ շախմատիստներով ներկայացել առաջնություններին, և արդյոք սա մեր հավաքականի մարտական կազմն էր, ինչպես նաև՝ ինչու էր հավաքականը Մ-18 և Մ-20 առաջնություններին մասնակցում գրեթե նույն կազմով՝ Մինասյանը բացատրեց.
«Իհարկե, մենք մեծ հույսեր ունենք մեր Մ-18 հավաքականից: Բայց ունենք շատ լավ պատանիներ: Մրցաշարում քիչ շախմատիստներով էինք ներկայացված, քանի որ մրցավայրը հեռու էր: Շատ տաղանդավոր երեխաներ, հուսով եմ, հետագայում կնվաճեն արդյունքներ:Եթե Հայկը չմասնակցեր Եվրոպայի առաջնությանը, ներկա կլիներ Մ-20 տարեկանների աշխարհի առաջնությանը: Կարելի է ասել, որ հավաքականի հիմնական կորիզը մասնակցում էր այս երկու առաջնություններին:
Դե 20 տարեկանների առաջնությունը մի քիչ սպեցիֆիկ առաջնություն է, այնտեղ մասնակցում են ավելի մեծերը: Իհարկե, հասկանում էինք, որ տղաները հոգնած կլինեին Մ-18 առաջնությունից հետո: Բայց եթե ուզում էինք մեդալների համար պայքարել, պետք է այս կազմը ներկայացնեինք: Մենք երեխաներին հարցնում ենք՝ պատրա՞ստ են խաղալու: Նրանք դեռ երիտասարդ են, դեռ պատրաստ են շատ խաղալու: Տեսեք, թե Արոնյանն արդեն քանի պարտիա է խաղում»:
Վլադիմիր Հակոբյանը խոսեց շախմատային աճի խնդիրների, ինչպես նաև իր խաղային ու մարզչական կարիերայի մասին.
«Աճի խնդիրն ամբողջ աշխարհում կա: Ես դժվարանում եմ ասել, ինչու է նման բան լինում, բայց դա նորմալ է: Գուցե կատարված աշխատանքի հետ է կապված: Համակարգչի հետ աշխատանքը, հնարավորությունները, ընդհանրապես աշխատանքը: Շախմատը յուրահատուկ մարզաձև է, ու այստեղ խնդիրները շատ են:
Ես շախմատից արդեն հոգնել էի ու որոշեցի ինձ երկարատև հանգիստ տալ: Տարեկան մեկ անգամ եմ խաղում: Բայց հիմնականում՝ կարճ, ռապիդ կամ բլից շախմատ: Մարզչական աշխատանքն ինձ շատ է դուր գալիս, դուր է գալիս երիտասարդների հետ աշխատելը: Տաղանդավոր շախմատիստների հետ աշխատանքը շատ հետաքրքիր է: Ես էլ եմ փորձ ձեռք բերում որպես մարզիչ»:
Արտաշես Մինասյանն ու Վլադիմիր Հակոբյանը՝ որպես փորձառու շախմատիստներ, խոսեցին նաև Եվրոպայի առաջնությունում արդեն կայացած 4 տուրերից հետո մեր հավաքականի շանսերի մասին.
«Հայաստանը հզոր շախմատային երկիր է ու միշտ ֆավորիտ է համարվում: Այդ առաջնություններին միասնական մոտեցումը շատ կարևոր է, նրանք ամեն ինչ անում են: Թե ինչ կլինի հետո, ժամանակը ցույց կտա», — ասաց Մինասյանը:
«Այսօր ամենակարևոր խաղային օրն է: Ամեն ինչ գրեթե կախված է այսօրվանից: Ռուսների հետ մրցախաղում պարտվելու դեպքում շանսերը շատ կնվազեն», — իր տեսակետը նշեց Վլադիմիր Հակոբյանը:
