Առաջնության կեսից ձևաչափից դժգոհելը ճիշտ չեմ համարում․ Վարդան Բիչախչյան

Հայկական ֆուտբոլը աստիճանաբար վերադառնում է: Ապրիլի 23-ին թույլատրվեց մարզումներ անցկացնել՝ որոշակի սահմանափակումներով: Իսկ երեկվանից թիմերն արդեն ընկերական խաղեր են անցկացնում: Հայ երկրպագուն անհամբերությամբ է սպասում հայկական ֆուտբոլի վերադարձին: Հասկանալի է, որ ֆուտբոլի վերսկսումից առաջ կան որոշակի նախապայմաններ: Ֆուտբոլիստները մոտ 2 ամիս չեն մարզվել ու որոշակի ժամանակ է անհրաժեշտ մարզավիճակ հավաքելու համար: ArmSport-ը շարունակում է զրուցել հայկական ակումբների մարզիչների հետ՝ հասկանալու թիմերում այս պահին տիրող իրավիճակը: Այս անգամ զրուցել ենք «Շիրակ« ՖԱ-ի գլխավոր մարզիչ Վարդան Բիչախչյանի հետ:

-Պարոն Բիչախչյան, կարանտինային օրերին ի՞նչ հասկացաք. հնարավո՞ր է ապրել առանց ֆուտբոլ, թե ոչ:

-Դժվարությամբ, բայց հնարավոր է ապրել։ Ամեն դեպքում, կարևորն առողջությունն է։ Հասկանում ենք, որ սա ժամանակավոր է, հնարավոր է մի փոքր ձգձգվի, բայց վստահաբար շուտով կվերադառնանք մեր բնականոն կյանքին։ Սահմանափակումները մտցնելուց հետո մենք՝ մարզիչներս, ֆուտբոլիստներին տրամադրել էինք անհատական մարզումային ծրագրեր, և նրանք մարզվում էին անհատապես։ Մարզումային ծրագրերը ներառում էին թե՛ բացօթյա, և թե՛ տնային պայմաններում մարզումներ։

-Մարզումային ծրագրերը տալուց հետո մարզիչները հետևու՞մ էին ֆուտբոլիստներին, թե՞, այսպես ասած, ամեն ինչ թողնված էր նրանց խղճին:

-Մենք տվել էինք համապատասխան ծրագրեր, ու ես կարծում եմ, որ եթե դրանից հետո էլ մարզիչները պետք է հետևեն, իսկ մարզիկը չմտածի իր մասին, ուրեմն նա պրոֆեսիոնալ կոչվելու իրավունք չունի։ Ֆուտբոլիստը պետք է կարողանա ցանկացած իրավիճակում լրջմիտ մոտեցում ցուցաբերի։ Ցանկացած արտակարգ պայմանում պետք է կարողանա որոշակի մարզավիճակ պահպանել, հետևել իր քաշին ու նաև այս պարագայում պահպանել անձնական հիգիենայի ու անվտանգության նորմերը։

-Վերադարձաք մարզումներին. քաշի հետ կապված խնդիրներ ունե՞ն ֆուտբոլիստները: Ինչքա՞ն ժամանակ է անհրաժեշտ որոշակի մարզավիճակի վերադառնալու համար:

-Քաշի հետ կապված խնդիր չունենք։ Այս պահին միայն Ուրոշ Նենադովիչն է, որ Սերբիայում է, մնացածը Գյումրիում են ու մարզվում են։ Ինչքան էլ ֆուտբոլիստները մարզվեն անհատական ծրագրով, իսկ մարզիչները նրանց հետևեն, ակնհայտ է տարբերությունը այդպիսի մարզումային պրոցեսի և թիմային աշխատանքի միջև, հետևաբար, վիճակն այս պահին կարելի է գնահատել բավարար։ Սովորաբար, նման դադարից հետո 6-8 շաբաթ է հարկավոր որոշակի մարզավիճակ հավաքելու համար, բայց կարծում են, որ ավելի շուտ կվերադառնանք։ Դա նաև իմ ցանկությունն է։ Քանի որ բոլոր թիմերն էլ այս ընթացքում չեն մարզվել, կարող ենք փաստել, որ վերադառնալուն պես բոլորը կլինեն գրեթե նույն մակարդակի վրա։ Պարզ է, որ մինչ առաջնության վերսկսումը հաշվի կառնվեն թիմերի կարծիքները, իսկ իմ կարծիքն այն է, որ եթե իրավիճակը չբարդանա, առաջնությունը կվերսկսվի մայիսի վերջ, հունիսի սկիզբ։

-Կա՞ն խաղացողներ, որոնք այլևս թիմի հետ չեն:

-Ո՛չ, բոլորը թիմում են, ոչ մի խաղացող չկա, որ լքել է թիմը։ Բոլորը շարունակում են մարզվել ու պատրաստվել առաջնության մեկնարկին։

-Կարելի՞ է փաստել, որ կարանտինային դադարի դրական կողմն այն է, որ վնասվածք ունեցող ֆուտբոլիստները հասցրեցին ապաքինվել:

-Ոմանք ապաքինվեցին, ոմանք մարզումների ժամանակ շտապողականություն դրսևորեցին ու կրկին վնասվածք ստացան։ Խոսքը Մալաքյան Էդգարի մասին է, նա ավելի շատ շտապողականության պատճառով կրկին վնասվածք ստացավ, բայց կարծում եմ, որ ամենաուշը մյուս շաբաթվա սկզբին կկարողանա արդեն մարզվել ընդհանուր խմբում։

-Շատ է խոսվում այն մասին, որ շատ ու շատ ակումբներ, եթե ոչ բոլորը, կանգնել են ֆինանսական խնդիրների առջև: Հայկական թիմերը նույնպես հանդիպեցին նման խնդրի: Ինչպիսի՞ իրավիճակ է «Շիրակում»:

-Այդ հարցի պատասխանը ես չէ, որ պետք է տամ։ Կարող եմ միայն ասել, որ մենք ժամանակին մեր աշխատավարձները ստացել ենք, իսկ ֆինանսական ճգնաժամ ամբողջ աշխարհի թիմերի մոտ արդեն իսկ առկա է, ու «Շիրակն» էլ բացառություն չի կարող լինել։

-Պարոն Բիչախչյան, ՀՖՖ գլխավոր քարտուղար Արթուր Ազարյանը նշել է, որ երբ առաջնությունը վերսկսվի, ամենայն հավանականությամբ, խաղերը կանցնեն դատարկ տրիբունաների ուղեկցությամբ: Հայաստանում ամենամեծ աջակցություն ունեցող թիմերից մեկը հենց «Շիրակն» է, մասնավորապես՝ տնային խաղերում: Ի՞նչ ազդեցություն կունենա այդ որոշումը թիմի խաղի վրա:

-Միանշանակ իր ազդեցությունը կունենա, քանի որ մեր երկրպագուները մեզ  համար անչափ կարևոր են։ Նրանք մեր կողքին են թե՛ դրսի խաղերում, և թե՛, առավել ևս, տնային խաղերում։ Մենք ֆուտբոլ չենք խաղում միայն մեր ու մեր ընտանիքների համար: Այսօր յուրաքանչյուր ակումբ ունի իր երկրպագուների բանակն ու պարտավոր է նրանց հետ հաշվի նստել։ Պարզ է, որ ցանկալի կլինի, որպեսզի այդ սահմանափակումը չլինի, բայց կարևորը, կրկնում են, առողջությունն է, և պետք է հաշվի նստել այդ իրողության հետ։ Պարզ է, որ սա էլ է ժամանակավոր։ Մենք մեր խաղով կփորձենք ուրախացնել մեր երկրպագուներին, որոնք «Շիրակի» խաղերը ստիպված կլինեն դիտել հեռուստացույցով։

-Ինչո՞վ էիք դուք լրացնում կարանտինի առաջացրած ազատ ժամանակը:

-Մենք՝ մարզիչներս, այս ընթացքում ևս ակտիվ աշխատել ենք։ Կարելի է ասել, որ նորմալ գրաֆիկով շարունակել ենք աշխատել, բացառությամբ պրակտիկ պարապմունքների։

-Առաջնության ձևաչափի մասին խոսենք: Մեր առաջնությունում կիրառելի՞ է այն: Երբ ձևավորվեց լավագույն վեցնյակը, դրանից դուրս մնացած թիմերը սկսեցին բարձրաձայնել, որ այս ձևաչափը սխալ է՝ ունենալով համապատասխան հիմնավորումներ: Հնարավոր է, որ այս հարցի շուրջ Ձեր կարծիքը սուբյեկտիվ հնչի, բայց փորձեք պատասխանել՝ կողքից նայելով իրավիճակին:

-Նախ, ի սկզբանե, ձևաչախի համար կարծիք հայտնելու ամենաճիշտ պահը առաջնության մեկնարկից առաջ էր։ Նման ձևաչափով խաղում են այն երկրները, որտեղ թիմերը հավասարաչափ են բաշխված։ Օրինակ, եթե մեր առաջնությունում խաղար 12 թիմ, ընդունելի կլիներ։ Առաջնության երկրորդ հատվածում առաջատար վեցնյակը կպայքարեր չեմպիոնության համար, իսկ մյուս վեցնյակը կպայքարեր առաջնությունից դուրս չմնալու համար։ Նաև, թիմերը կանցկացնեին հավասար քանակությամբ խաղեր։ Իսկ այստեղ կա անհամաչափություն։ Առաջատար վեցնյակի թիմերն ավելի շատ են խաղալու, քան վեցնյակից դուրս մնացած թիմերը։ Ամեն դեպքում, մենք սկսել ենք այս ձևաչափով խաղալ։ Ի սկզբանե, 10 թիմն էլ դեմ չի եղել այս ձևաչափով առաջնությունը սկսելուն ու հետևաբար առաջնության կեսից դժգոհել, թե ճիշտ չէ այս ձևաչափը, ճիշտ չեմ համարում, քանի որ չհամաձայնելու, քննարկելու և տարբերակներ առաջարկելու ժամանակ կար։

-Ի՞նչ փուլում է գտնվում Վահան Բիչախչյանի կարիերան: Շարունակելու՞ է ելույթները «Ժիլինայի» կազմում:

-Վահանն այս պահին Գյումրիում է։ Մինչև 2022 թ․ գործող պայմանագիր ունի «Ժիլինայի» հետ։ Իմ ունեցած տեղեկությունների համաձայն այնտեղից խաղացողներ են հեռացել, բայց պատճառներից տեղյակ չեմ։ Աշխատավարձերը կրճատել են 50 տոկոսով։ Այս ընթացքում ակումբի մարզիչները նրան անհատական ծրագրեր են ուղարկում ու այդպես նա մարզվում է, բայց «Շիրակի» հետ չի մարզվում։ Սպասում ենք Սլովակիայի Ֆուտբոլի ֆեդերացիայի որոշմանը, բայց նաև պետք է օդուղին բաց լինի, որպեսզի կարողանա վերադառնալ Սլովակիա (խմբ.-Վահան Բիչախչյան հետ՝ իր ծրագրերի մասին հարցազրույցը կարդացեք վաղը)։

Բլից հարցեր.

—Ձեր դիտած ֆուտբոլի պատմության ամենադիտարժան խաղը.

-ՉԼ-ի «Լիվերպուլ»-«Միլան» եզրափակիչը, որտեղ «Լիվերպուլը» հետ եկավ 0-3 հաշվից հետո, իսկ այնուհետև հաղթեց 11 մետրանոց հարվածաշարի ժամանակ:

—Պատմության լավագույն մարզիչը.

-Ալեքս Ֆերգյուսոն, Արիգո Սակի, Յոհան Կրույֆ։

—Պատմության լավագույն ֆուտբոլիստը.

-Լեո Մեսսի։

-Մարզչական կարիերայի երազանք, որը դեռ չի իրականացել.

-Բարդ հարց եք տալիս։ Փորձեմ այսպես պատասխանել. ինչքան հնարավոր է շատ հաղթանակներ։

Արմեն Գարամյան