1999/00 մրցաշրջանում «Բարսելոնայի» ավագ Պեպ Գվարդիոլան թիմի հետ Իսպանիայի ֆուտբոլի ֆեդերացիայի դեմ էր դուրս եկել։ «Բարսայում» ևս մեկ մրցաշրջան խաղալով՝ կատալոնացին հայտարարեց ակումբից հեռանալու մասին։ Պեպը 30 տարեկան էր, վնասվածքները տանջում էին նրան, բայց նրանով դեռ հետաքրքրվում էին Եվրոպայի լավագույն թիմերը․ «Ինտերը», «Միլանը», «Տոտենհեմը», «Արսենալը», «Լիվերպուլը», ՄՅՈՒ-ն, ՊՍԺ-ն, «Պարման» և այլ թիմեր։
Գվարդիոլան մերժեց բոլոր թոփ-թիմերին հանուն «Յուվենտուսի», բայց այն վերջին պահին փոխեց միտքը։ Տրանսֆերային պատուհանը գրեթե փակվել էր, ընտրության հնարավորությունը՝ պակասել։ Մնացած տարբերակներից Պեպն ընտրեց համեստ «Բրեշիան»։ Փողերը նրան չէին հետաքրքրում․ Գվարդիոլան ուզում էր ապրել Լոմբարդիայում, նրան նաև դուր էր գալիս ակումբի համառությունը․ «Նրանք ինձ ավելի շատ էին ուզում, քան որևէ այլ մեկը այս շաբաթների ընթացքում»։
Բայց ամենակարևորն այն է, որ կատալոնացին հիանում էր Ռոբերտո Բաջոյով, որն այդ ժամանակ հանդես էր գալիս «Բրեշիայում»։ Մարզիչ Կառլո Մացոնեի հետ առաջին իսկ զրույցի ժամանակ Պեպը խոստովանել է, որ իրեն շատ է ոգեշնչում նման մեծագույն իտալացու հետ խաղալու հեռանկարը։
Երկու աստղերը միանգամից լեզու գտան իրար հետ։ Պեպի՝ Բաջոյի հանդեպ հարգանքի գագաթնակետը դարձավ 2002 թվականի ապրիլին կայացած «Ֆիորենտինայի» հետ խաղը։ Առաջին կեսում 24-ամյա Լուկա Տոնին առաջ մղեց «Բրեշիային»։ Լավ էր, բայց հաշիվը դեռ վստահություն չէր ներշնչում, դրա համար էլ 70-րդ րոպեին Մացոնեն երկար դադարից հետո առաջին անգամ դաշտ դուրս բերեց Բաջոյին։ Իտալացին դեռ նոր էր վերականգնվել վնասվածքից, որից ապաքինվում էր ամիսներ շարունակ։
Նա դեռ նոր էր դաշտ մտել, երբ նրա մոտ վազեց Պեպը։ Կատալոնացին հանեց ավագի թևկապն ու մեկնեց իր կուռքին։ Շփոթված Բաջոն փորձեց հրաժարվել, բայց Գվարդիոլան անձամբ նրա թևին կապեց թևկապը։ «Այդ օրն իրենց ամբողջ գեղեցկությամբ դրսևորվեցին այդ մարդու բարոյական բարձր արժեքները։ Քչերն են ունակ նման գեղեցիկ ժեստի»,- իր գրքում գրել է Կառլո Մացոնեն։
4 րոպե անց Բաջոն գոլ խփեց, իսկ հետո դուբլ ձևակերպեց․ «Բրեշիան» հաղթեց 3-0 հաշվով։ «Բաջոն իմ հիշողության մեջ ամենաանհավանական խաղացողներից է։ Նա երկու անգամ պատռեց կապանները, համարյա սողում էր, բայց միշտ հայտնվում էր այնտեղ, որտեղ փնտրում էի իրեն, միշտ ճիշտ դիրքում։ Նույնիսկ վախենում եմ պատկերացնել, թե նա ինչպիսին կդառնար, եթե 100% ֆիզիկական հնարավորություններ ունենար»,-հիշում է Պեպը։
2002 թվականին Գվարդիոլան մի քանի խաղ անցկացրեց «Ռոմայի» կազմում, կարճ ժամանակով վերադարձավ «Բրեշիա», իսկ հետո գնաց խաղալու Քաթարում ու Մեքսիկայում։Բաջոն «Բրեշիայում» խաղաց մինչև 2004 թվականը, որտեղ էլ ավարտեց կարիերան։
