Վաղը՝ սեպտեմբերի 25-ին, Ազգերի լիգայի խաղարկության C2 խմբի առաջին տուրում Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում կընդունի Լատվիայի ընտրանուն։
Նախախաղային մամուլի ասուլիսի ընթացքում լրագրողների հարցերին է պատասխանել Հայաստանի ազգային հավաքականի գլխավոր մարզիչ Եղիշե Մելիքյանը։
«Համոզված եմ՝ վաղը կտեսնեք այն հավաքականը, որը տրամադրված է հաղթելու, մարտական է տրամադրված։ Դուք մեզ կտեսնենք խաղադաշտում պայքարելիս, մենք էլ ձեզ ենք ուզում տեսնել՝ լեփ-լեցուն մարզադաշտ», — ասել է Եղիշե Մելիքյանը։
Կադրային կորուստների մասին
«Հրավիրել ենք Արարատ Մոնրոյին, սակայն նա խնդիրներ ուներ, չի եկել։ Խոսել եմ Համբարձումյանի հետ, խնդրել եմ միանալ թիմին, նա մեզ պետք է, տեսնում եմ, որ նա կարող է։ Այն, ինչ նա ինձ ասել է, ինձ չբավարարեց․ այդքանով սահմանափակվել է մեր խոսակցությունը։
Բուենոն վաղը կխաղա, բայց ոչ աջից։ Մեկ գիծ չէ, որտեղ խնդիր ունենք։ Չեմ ուզում լինի տպավորություն, որ ես կենտրոնացած եմ խնդիրների վրա։ Կենտրոնացած եմ խնդիրների լուծման վրա, ու ես կարողանում եմ դա անել, գտել եմ այն բանալին՝ լուծել այդ խնդիրները։
Երբ 4 հանդիպում է առջևում, ռեսուրս է պետք։ Այդտեղ էի տեսնում խնդիր, բայց մենք այդ ուղղությամբ աշխատել ենք, կաշխատենք այդ հարցը լուծել»,- նշել է Մելիքյանը։
Վաղվա հանդիպման մասին
«Մենք հաղթանակի կարիք ունենք, շատ ենք ուզում հաղթել։ Մենք տրամադրված ենք հաղթանակի։ Առաջադրանքն է՝ հաղթել և շարժվել առաջ։ Ֆուտբոլ է, ամեն ինչ կարող է լինել։ Բայց, այն, որ մենք ունենք վստահություն, մարտական է թիմի տրամադրությունը, կարծում եմ՝ կհաղթենք։ Եթե չստացվի, մենք պրոֆեսիոնալ ենք, չենք հուսահատվելու, կվերլուծենք, կհասկանանք պատճառները, շարժվելու ենք առաջ։ Մտածում ենք հաղթանակի մասին», — ասել է Եղիշե Մելիքյանը։
Հավաքականի մասին
«Մինչ իմ գալը շատ էր խոսվել կարգապահության, նվիրվածության մասին։ Կարող եմ ասել, որ այսօր այս հավաքականը այդ հարցերը լուծել է, ունի կարգապահություն, նվիրվածություն։ Այսօր, մեկ տարի անց, շատ հարցեր են լուծվել», — ավելացրել է Մելիքյանը։
Ալբերտ Ալեքսանյանսի և Կովալենկոյի մասին
«Կովալենոկոյի հետ անձամբ խոսել եմ, հրաժարվել է Հայաստանի հավաքականում հանդես գալ։ Դա իր ցանկությունն է, խնդիր չեմ տեսնում։
Ալեքսանյանսի (հրավիրվել է Լատվիայի հավաքական) մասին․ շփվել եմ, նկատել էինք, մտածում էի, որ այս խաղերից հետո կհանդիպենք, կհրավիրենք գարնանը։ Բայց նա որոշեց ընտրել Լատվիան, դա իր որոշումն է», — ավելացրել է Մելիքյանը։
Ազգերի լիգայի խաղարկության C2 խմբի առաջին տուրի Հայաստան – Լատվիա հանդիպումը կմեկնարկի ժամը 20:00-ին։
