Ինչպես արդեն տեղեկացրել էինք, իսպանական Սեգունդայի 2026/27 թթ. մրցաշրջանի 5-րդ տուրում «Սեուտան» արտագնա խաղում 1:3 հաշվով զիջել էր «Բուրգոսին»։ Այդ հանդիպմանը նոր թիմի կազմում իր նորամուտն էր նշել Հայաստանի ազգային հավաքականի կիսապաշտպան Էդգար Սևիկյանը՝ խաղադաշտ դուրս գալով մեկնարկային րոպեներից և փոխարինվելով 71-րդ րոպեին։
Իսպանական հեղինակավոր AS պարբերականն անդրադարձել է կայացած հանդիպմանը և գնահատել «Սեուտայի» ֆուտբոլիստների, այդ թվում՝ հայ կիսապաշտպանի ելույթը նորամուտի խաղում։
Խոսելով Սևիկյանի գործողությունների մասին՝ իսպանական պարբերականը գրում է, որ նա չի կարողացել լիարժեք դրսևորել իրեն.
«Առաջին անգամ մեկնարկային կազմում և քիչ ազդեցություն խաղի վրա։ Հայ ֆուտբոլիստը հազիվ էր կարողանում ներգրավվել խաղի մեջ այն գոտիներում, որտեղ կարող էր վտանգ ստեղծել, իսկ նրա հարձակողական ներկայությունը րոպեների ընթացքում աստիճանաբար կորցրեց իր կշիռը»,- նշված է AS-ի հոդվածում։
Պարբերականը նաև ընդգծել է, որ «Սեուտայի» կազմում լավագույնն Ալեքս Կամաչոն էր, որն աչքի է ընկել իր համառությամբ, իսկ դրական է գնահատվել նաև Կուկի Սալասարի խաղը։ Ընդհանուր առմամբ, ըստ հրապարակման, «Սեուտան» շատ բաներ ճիշտ է արել դաշտում, սակայն թիմին կրկին չի բավականացրել վճռականությունը տուգանային հրապարակներում, ինչպես նաև մարզական բախտը։
Հիշեցնենք, որ Սևիկյանը իսպանական ակումբի շարքերը համալրել է վարձակալական հիմունքներով՝ հունգարական «Ֆերենցվարոշից»: Կայացած 5 տուրերից հետո «Սեուտան» դեռևս միավոր չի վաստակել և եզրափակում է Սեգունդայի մրցաշարային աղյուսակը։
