Կատալոնական «Բարսելոնան» հետաքրքրված է Միլանի «Ինտերի» և Իտալիայի ազգային հավաքականի ձախ պաշտպան Ֆեդերիկո Դիմարկոյի ծառայություններով։ Ինչպես հաղորդում է Diario SPORT-ը, կատալոնական ակումբը մտադիր է հաջորդ ամռանը ձեռք բերել ֆուտբոլիստին ազատ գործակալի կարգավիճակով։
Դիմարկոյի գործող պայմանագրի ժամկետը «ներաձուրիի» հետ նախատեսված է մինչև 2027 թվականի ամառ։ Եթե կողմերը չգան համաձայնության պայմանագրի երկարաձգման շուրջ, 28-ամյա պաշտպանը կկարողանա հեռանալ միլանյան ակումբից անվճար։
Նշվում է, որ կատալոնացիներն արդեն իսկ ակտիվորեն դիտարկում են իտալացուն առանց տրանսֆերային փոխհատուցման հրավիրելու տարբերակը։ Ընդ որում, ըստ աղբյուրի, անձամբ Դիմարկոն ևս շահագրգռված է «Կամպ Նոու» տեղափոխությամբ։
Ավելի վաղ տեղեկություններ կային, որ «Ինտերը» մերժել է «Բարսելոնայի» առաջարկը՝ նպատակ ունենալով պահպանել թիմի առանցքային խաղացողներից մեկին։ Միլանյան ակումբն այժմ աշխատում է պաշտպանի պայմանագրի ժամկետը երկարաձգելու ուղղությամբ։
Հեղինակավոր Transfermarkt պորտալի գնահատմամբ՝ Դիմարկոյի տրանսֆերային արժեքը կազմում է 50 միլիոն եվրո։ Չնայած դրան՝ «Բարսելոնան» պոտենցիալ հնարավորություն ունի անվճար ձեռք բերելու «ներաձուրիների» առաջատարներից մեկին, եթե վերջինս հրաժարվի նոր պայմանագիր ստորագրել ակումբի հետ։
