ՈւԵՖԱ Եվրոպա լիգայի փլեյ օֆֆ փուլի պատասխան խաղում Հայաստանի չեմպիոն «Արարատ-Արմենիան» Վազգեն Սարգսյանի անվան «Հանրապետական» ստադիոնում կընդունի ռումինական «Ունիվերսիտատյա Կրայովային»։
Նախախաղային ասուլիսի ժամանակ լրագրողների հարցերին է պատասխանել թիմի կիսապաշտպան Միշել Այվազյանը։
— Միշել, քո նախկին մարզիչն «Արարատ-Արմենիայում» Վարդան Մինասյանն էր: Ի՞նչ փոփոխություններ ես տեսնում Վարդան Մինասյանի ժամանակվա Միշել Այվազյանի և այսօրվա Միշել Այվազյանի մեջ:
— Կասեմ, որ երկու տարի առաջ չունեի այդքան փորձ, ինչ որ հիմա։ Իմ կարիերայում մեծ դեր ունեցավ ԲԿՄԱ-ն, այնտեղ շատ խաղային ժամանակ ստացա: Կարծում եմ՝ հիմա ավելի ֆիզիկապես եմ պատրաստ, ավելի հոգեբանորեն եմ պատրաստ, մնացածը դուք արդեն տեսնում եք դաշտում:
— Միշել, սա երևի քո կարիերայի ամենակարևոր խաղերից մեկն է, որը նոր ապագա է բացում ինչպես քո, այնպես էլ թիմի առջև: Նախ խնդրեմ վիճակի մասին խոսես, թիմային տրամադրության, և ինքդ ինչպե՞ս ես պատրաստ:
— Կասեմ, որ թիմը շատ լավ է պատրաստված՝ թե՛ ֆիզիկապես, թե՛ հոգեբանորեն: Բոլորս էլ գիտակցում ենք, թե ինչ կարևոր խաղ է մեր թիմի համար, մեր ազգի համար: Բոլորս, նաև ես, անելու ենք ամեն ինչ դաշտում, որպեսզի կարողանանք բոլորով կերտել պատմություն:
— Միշել, ձեզ հաջողություն եմ մաղթում վաղվա խաղում: Արդեն մի քանի հանդիպում եք անցկացրել Տուլիպայի գլխավորությամբ և, իհարկե, շատ մարզումներ: Կա՞ այնպիսի բան, որը հենց նրանից եք սովորել:
— Շնորհակալ եմ շատ: Կան լիքը բաներ, որ սովորել եմ միստերից: Շատ խաղային դրվագներ կան, որ առաջ չէի անում (կոպիտ ասած), բայց հիմա շատ բաներ կա դաշտում, որ միստերի շնորհիվ և բոլոր մնացած մարզիչների շնորհիվ ավելի վստահ եմ սկսել անել: Անում էի այն ժամանակ, բայց չէի անում այնպես, ոնց որ հիմա, ու գնալով ավելի եմ կատարելագործվում: Կարծում եմ՝ դեռ շատ տեղ ունեմ կատարելագործվելու:
— Միշել, նկատած կլինես, որ «Արարատ-Արմենիայի» գրեթե յուրաքանչյուր խաղից հետո և՛ սպորտային մեդիայի ներկայացուցիչները, և՛ մարզիչը միմիայն դրական խոսքեր են քո մասին ասում: Նման պայմաններում այդքան ականջին հաճելի խոսքեր լսելուց, ի՞նչն է ստիպում դեռ շարունակել պայքարել, չտրվել այդ հաճելի խոսքերին ու գնալ այն նպատակի հետևից: Եվ եթե այդ նպատակը կամ երազանքը ֆուտբոլում, սպորտում կա՝ ո՞րն է:
— Կարծում եմ՝ այդ խոսքերը շատ հաճելի են, շատ գնահատում եմ ու շատ շնորհակալ եմ, որ ինձ հավատում են, որ ինձ այդքան սիրում են: Բայց դրանով վերցնել ու հաջորդ օրը չգալ պարապմունքի, չանել քո մաքսիմումը՝ կարծում եմ դա շատ սխալ կլինի իմ կողմից: Որովհետև ես ունեմ մեծ նպատակներ, մեծ երազանքներ, որի հետևից ես գնում եմ: Ոչ թե ուղղակի գնում եմ, այլ դրա համար տանում եմ աշխատանք: Ամեն օր նվիրվում եմ մաքսիմում, աշխատում եմ առանձին, և նպատակն է՝ խաղալ ազգային հավաքականում և գնալ Եվրոպա:
— Առաջին հանդիպումից բավականին նմանություններ կան խաղային առումով ձեր և Արմեն Համբարձումյանի միջև՝ դիրքային տեսանկյունից, որոշումներ կայացնելու և այլն: Արդյո՞ք մարզումներին առանձնահատուկ իրեն ուշադրություն դարձնում եք՝ ինչպես են աշխատում կամ այլ բան, իր հետ կապված:
— Ես երբ նոր էի շանս ստանում, բարձրանում էի Բարձրագույն լիգա, խաղում էի «Արարատ-Արմենիայում», պարապում էի իրենց հետ՝ Արմենը շատ է իմ կողքին եղել, շատ է ինձ օգնել, ու ես ամեն պարապմունքին, ամեն խաղին իրենից շատ բան եմ սովորել: Իրենից շատ բան եմ տեսել: Ինձ թվում է՝ դրա համար էլ կան նմանություններ:
Մրցող թիմերի միջև կայացած առաջին հանդիպումն ավարտվել է ոչ-ոքի՝ 1:1: Հանդիպումը կկայանա վաղը՝ հոկտեմբերի 27-ին, 20:00-ին։
