Կոնֆերենցիաների լիգայի որակավորման երկրորդ փուլի առաջին հանդիպումից առաջ Մոլդովայի «Զիմբրու» ակումբի գլխավոր մարզիչ Ալեքսանդր Պոկլոնսկին պատասխանել է լրագրողների հարցերին։ Մոլդովական թիմի հավաքակայանում կայացած մամուլի ասուլիսի ընթացքում մասնագետն անդրադարձել է հայկական «Նոայի» ուժեղ կողմերին, թիմի կազմի համալրումներին և հանդիպման ֆավորիտի կարգավիճակին։
«Ուսումնասիրել ենք նրանց վերջին ընկերական հանդիպումները։ Ինձ դուր եկավ, որ «Նոան» խաղում է գրեթե նույն համակարգով, ինչ մենք․ վերահսկում են գնդակը, գրոհող ֆուտբոլ են ցուցադրում։ Ոգևորիչ է, որ որակյալ ֆուտբոլ են խաղում։ Սա թիմ է, որը իսկապես խաղում է ֆուտբոլ․ դա անում էր նախորդ մրցաշրջանում, անում է նաև հիմա։ Շատ լավ թիմ է»։
Անդրադառնալով այն կարծիքին, որ ինչպես Հայաստանում, այնպես էլ Մոլդովայում «Նոային» համարում են զույգի ֆավորիտ՝ «Զիմբրուի» մարզիչն արձագանքել է բավականին հանգիստ․
«Շատ հանգիստ եմ վերաբերվում դրան․ թող մտածեն՝ ինչ ուզում են։ Գուցե ես համաձայն եմ այդ կարծիքի հետ, բայց ամեն ինչ կորոշվի խաղադաշտում։ Այս պահի դրությամբ՝ այո, համաձայն եմ այդ պնդման հետ»։
Պոկլոնսկին նաև հավելել է, որ բացի ընկերական խաղերից, դիտարկել են նաև «Նոայի» նախորդ մրցաշրջանի հանդիպումները․
«Պարզ է, որ ընկերական խաղերում թիմերը չեն բացահայտում իրենց ողջ պոտենցիալը, ինչ-որ տեղեկատվություն թաքցված է։ «Նոան» ունի բազմաթիվ նորեկներ, որոնք բարձր մակարդակի ֆուտբոլիստներ են»,- նշել է նա։
«Զիմբրուի» մարզիչն ընդգծել է, որ թիմի կազմն ամբողջությամբ համալրված չէ, և իրենք դեռ նոր ձեռքբերումների փնտրտուքի մեջ են։ Խոսելով նորեկ Եվգենի Կոչյուկի մասին, որը նախկինում հանդես է եկել Հայաստանի առաջնությունում, Պոկլոնսկին բարձր է գնահատել նրա դերը․
«Կոչյուկի մասին տեղեկություններ եմ հավաքել նաև Հայաստանում աշխատող մարզիչներից։ Բոլորն էլ շատ դրական արտահայտվեցին նրա մասին։ Կարծում եմ՝ նա հասունություն է հաղորդել մեր թիմին։ Եվգենին իսկական առաջատար է»։
