«Բարսելոնայի» հարձակվող Ֆեռան Տոռեսը զարմացած է ակումբի պահվածքից։ Բարձր մակարդակով անցկացրած երկու մրցաշրջաններից հետո կատալոնական ակումբը որևէ նախաձեռնություն չի ցուցաբերում ֆուտբոլիստի հետ պայմանագիրը երկարաձգելու հարցում։ Այս մասին հայտնում է իսպանական Sport.es պարբերականը։
Աղբյուրի փոխանցմամբ՝ հարձակվողը կարծում է, որ լիովին արդարացրել է գլխավոր մարզիչ Հանս-Դիտեր Ֆլիկի սպասելիքներն ու հիանալի է օգտագործել իրեն ընձեռված հնարավորությունները։ Տոռեսը հույս ուներ, որ վստահության նոր ժեստ կստանա «կապտանռնագույնների» կողմից։
Սակայն խնդիրն այն է, որ «Բարսելոնայի» ղեկավարությունը 26-ամյա ֆուտբոլիստին երբեք չի դիտարկել որպես թիմի հիմնական հարձակվող։ Ակումբում հստակ գիտակցում են, որ Ռոբերտ Լևանդովսկու հեռանալուց հետո ստիպված են լինելու նոր ռմբարկու փնտրել տրանսֆերային շուկայում։
Ստեղծված իրավիճակում ակտիվացել է ՊՍԺ-ն։ Ընդգծվում է, որ փարիզյան ակումբը շարունակում է առաջխաղացում գրանցել իսպանացի ֆուտբոլիստի տրանսֆերի ձեռքբերման բանակցություններում։
Նախորդ մրցաշրջանում Ֆեռան Տոռեսը բոլոր մրցաշարերում մասնակցել է 49 հանդիպման՝ դառնալով 21 գոլի և 3 արդյունավետ փոխանցման հեղինակ։ Նրա գործող պայմանագիրը «Բարսելոնայի» հետ նախատեսված է մինչև 2027 թվականի ամառը։ Transfermarkt հեղինակավոր պորտալի գնահատմամբ՝ ֆուտբոլիստի տրանսֆերային արժեքը կազմում է 50 միլիոն եվրո։
