Լաս Վեգասում կայանալիք UFC 329 մրցաշարին ընդառաջ տեղի է ունեցել Քոնոր Մակգրեգորի և Մաքս Հոլոուեյի մամուլի ասուլիսն ու հայացքների ավանդական մենամարտը, որն աչքի է ընկել սկանդալային միջադեպով։
37-ամյա իռլանդացին չափազանց ագրեսիվ և սադրիչ վարքագիծ է դրսևորել։ Դեմ առ դեմ կանգնելիս նախկին կրկնակի չեմպիոն Մակգրեգորը մոտեցել է 34-ամյա Հոլոուեյին, խլել նրա ակնոցն ու շպրտել երկրպագուների ուղղությամբ։ Այնուհետև նա ճակատով հպվել է մրցակցին։ Երբ Մաքսը փորձել է ձեռքսեղմում առաջարկել, Քոնորը հարվածելով հետ է մղել նրա ձեռքը՝ ասելով․
«Հեռացրու դա դեմքիցս»։
Իրավիճակը վերահսկողությունից դուրս չգալու և ծեծկռտուքը կանխելու համար անմիջապես միջամտել են անվտանգության աշխատակիցներն ու UFC-ի նախագահ Դանա Ուայթը՝ հեռացնելով մարտիկներին միմյանցից։ Լարված դրվագի ավարտին Հոլոուեյը բղավել է հանդիսատեսի ուղղությամբ, իսկ Մակգրեգորը՝ գլուխ տվել։
Սա լինելու է մարտիկների երկրորդ դիմակայությունը։ Նրանց առաջին մենամարտը կայացել է 2013 թվականի օգոստոսին՝ UFC Fight Night 26-ի շրջանակում, որտեղ Քոնորը հաղթել էր մրցավարների միաձայն որոշմամբ։
Չնայած նախկին հաջողությանը, այս անգամ իռլանդացին մենամարտին մոտենում է աութսայդերի կարգավիճակով։ Մակգրեգորն օկտագոն դուրս չի եկել 2021 թվականից ի վեր՝ ոտքի ծանր կոտրվածքի և դրան հաջորդած վիրահատության պատճառով։ UFC-ի նախկին մարտիկ և վերլուծաբան Չեյլ Սոնենն այս առիթով նշել է.
«Հոլոուեյը վատագույն տարբերակն է Մակգրեգորի համար։ Ինչո՞ւ նա պետք է մենամարտի նրա հետ»։
Հավելենք, որ կիսամիջին քաշային կարգում ընթացող այս ռևանշ-մենամարտը կգլխավորի հուլիսի լույս 12-ի գիշերը «T-Mobile» արենայում կայանալիք UFC 329 մրցաշարը։
CONOR MCGREGOR TOOK OFF MAX HOLLOWAY’S GLASSES DURING THEIR FACE OFF
OH MY GOD 😭😭😭 #UFC329 pic.twitter.com/XblfGEWHzS
— Championship Rounds (@ChampRDS) July 10, 2026
