Մեքսիկայի ազգային հավաքականի գլխավոր մարզիչ Խավիեր Ագիրեն պաշտոնապես հայտարարել է իր հրաժարականի մասին՝ ԱԱ-2026-ի 1/8 եզրափակիչում Անգլիայի ընտրանուց կրած պարտությունից (2:3) և մրցաշարը լքելուց անմիջապես հետո։
Մասնագետը նշել է, որ հպարտանում է իր սաներով և չի պատրաստվում մեղադրել նրանց Աշխարհի առաջնությունից դուրս մնալու համար.
«Ինձ մեղադրելու ոչինչ չունեմ, ֆուտբոլիստներին՝ նույնպես: Մենք արեցինք այն ամենը, ինչ կարող էինք, բայց մեզ դիմակայում էր հիանալի թիմ: Այս մակարդակում չի կարելի սխալներ թույլ տալ, դրանք շատ թանկ են արժենում: Մենք ռիսկի դիմեցինք փոխարինումներով՝ փորձելով օգտագործել քանակական առավելությունը, սակայն մեզ դա չհաջողվեց։ Ուզում եմ բոլորին շնորհակալություն հայտնել աջակցության համար»,- Ագիրեի խոսքերն է մեջբերում ՖԻՖԱ-ի պաշտոնական կայքը:
Անդրադառնալով իր հեռանալուն՝ մեքսիկացի մարզիչն անկեղծացել է, որ ցանկանում էր հաղթանակով հրաժեշտ տալ իր ժողովրդին.
«Ցավալի է այսպես ավարտելը: Մենք փորձեցինք, և տղաները պետք է հեռանան բարձր պահած գլխով: Մենք չկարողացանք իրացնել մեր պահերը, բայց ես հեռանում եմ մեծ հպարտությամբ: Այս ֆուտբոլիստներն ինձ շատ ուրախացրին: Մենք վերականգնեցինք այս թիմին պատկանելության զգացումն ու ինքնությունը»:
Ակնկալվում է, որ Մեքսիկայի հավաքականի նոր գլխավոր մարզիչ կնշանակվի «Բարսելոնայի» նախկին ֆուտբոլիստ, Աշխարհի հինգ առաջնությունների մասնակից Ռաֆայել Մարկեսը: Լեգենդար պաշտպանն ԱԱ-2026-ի ընթացքում ընդգրկված էր Ագիրեի մարզչական շտաբում:
Խոսելով իր իրավահաջորդի մասին՝ Ագիրեն հավելել է.
«Մաղթում եմ նրան ամենայն բարիք: Նա ավելի քան ունակ է կատարել այս աշխատանքը, և նրա մոտ ավելի լավ կստացվի, քան ինձ մոտ»:
Հիշեցնենք, որ Անգլիայի հավաքականը մրցաշարի քառորդ եզրափակիչում կխաղա Նորվեգիայի ընտրանու հետ: Հանդիպումը կկայանա հուլիսի 12-ին Մայամիում (ԱՄՆ):
