ՖԻՖԱ-ն աննախադեպ որոշում է կայացրել 2026 թվականի աշխարհի առաջնությունում՝ կասեցնելով ԱՄՆ-ի հավաքականի հարձակվող Ֆոլարին Բալոգունի որակազրկումը Բելգիայի դեմ 1/8 եզրափակիչի հանդիպումից անմիջապես առաջ։
Բալոգունը ԱԱ-2026-ի 1/16 եզրափակիչի Բոսնիա և Հերցեգովինայի դեմ խաղում (2:0) ուղիղ կարմիր քարտ էր ստացել և, ըստ կանոնակարգի, պետք է բաց թողներ բելգիացիների դեմ հանդիպումը: Սակայն կիրակի օրը հայտնի դարձավ, որ ՖԻՖԱ-ն ավտոմատ որակազրկման որոշումը կասեցրել է՝ սահմանելով մեկ տարվա փորձաշրջան։ Այսպիսով, ամերիկացի հարձակվողը կկարողանա մասնակցել հուլիսի 6-ին կայանալիք խաղին:
Բելգիայի ազգային հավաքականի գլխավոր մարզիչ Ռուդի Գարսիան չի թաքցրել իր զարմանքը կատարվածի վերաբերյալ՝ իրավիճակը համեմատելով կատակի հետ.
«Ես չգիտեի, որ ԱՄՆ-ում հուլիսի 5-ը ապրիլի 1-ն է։ Ինձ համար սա բացահայտում էր։ Կարծում եմ՝ ՖԻՖԱ-ի պատմության մեջ սա առաջին դեպքն է, երբ նման բան է տեղի ունենում:
Բելգիայի թագավորական ֆուտբոլային ասոցիացիայի հայտարարության մեջ ամեն ինչ ասված է. նրանք պաշտպանում են ոչ միայն բելգիական, այլև համաշխարհային ֆուտբոլը: Մեզ համար, սակայն, ոչինչ չի փոխվում: Մենք, իհարկե, փոքր-ինչ զարմացած էինք, քանի որ դա տեղի ունեցավ խաղից մեկ օր առաջ, բայց մենք պետք է հաղթենք դաշտում։ Բալոգունը լավ խաղացող է, բայց մենք պետք է հաղթենք ԱՄՆ-ի հավաքականին, ոչ թե միայն նրան»,- Het Laatste Nieuws-ը մեջբերում է Գարսիայի խոսքերը:
Թիմի դարպասապահ Տիբո Կուրտուան ևս հանգիստ է արձագանքել լուրին՝ նշելով.
«Մենք պատրաստ ենք ԱՄՆ-ի բոլոր հարձակվողների դեմ խաղին։ Մեզ համար սա քիչ բան է փոխում»:
Մինչ թիմը կենտրոնացած է բուն խաղի վրա, Բելգիայի ֆուտբոլային ասոցիացիան հանդես է եկել կոշտ հայտարարությամբ՝ ՖԻՖԱ-ի որոշումը որակելով որպես սեփական կանոնակարգի կոպիտ խախտում։
«RBFA-ն իր զարմանքն է հայտնում ՖԻՖԱ-ի որոշման վերաբերյալ։ ՖԻՖԱ-ն այն հիմնավորում է կարգապահական օրենսգրքի 27-րդ հոդվածով, ըստ որի՝ կոմիտեն իրավունք ունի կասեցնել նախկինում կիրառված պատիժը։ Սակայն նույն օրենսգրքի 66.4 հոդվածը հստակ սահմանում է, որ կարմիր քարտը ավտոմատ կերպով հանգեցնում է հաջորդ խաղի որակազրկման, ինչպես դա եղել է այս առաջնության բոլոր նախորդ կարմիր քարտերի դեպքում:
Բացի այդ, այս որոշումն ուղղակիորեն հակասում է ԱԱ-2026-ի կանոնակարգի 10.5 հոդվածին։ Հանուն արդար խաղի հիմնարար սկզբունքների պահպանման և բոլոր մասնակից թիմերի օրինական իրավունքների պաշտպանության՝ մենք ուսումնասիրում ենք մեր գործողությունների բոլոր հնարավոր տարբերակները»,- ասվում է կառույցի պաշտոնական հայտարարության մեջ:
