Բացարձակ առավելություն, բայց ոչ հաղթական հաշիվ. Հայաստան — Ղազախստան խաղի վիճակագրությունը

Ինչպես արդեն տեղեկացրել ենք, Հայաստանի ազգային հավաքականը Երևանում կայացած ընկերական հանդիպումն ավարտել է մարտական ոչ ոքիով՝ 1:1 հաշվով բաժանվելով Ղազախստանի ընտրանուց: Չնայած այն հանգամանքին, որ հաղթանակ չգրանցվեց, մեր հավաքականն ունեցել է բացահայտ խաղային առավելություն։

ՈւԵՖԱ-ի պաշտոնական կայքը հրապարակել է հանդիպման ընդլայնված վիճակագրությունը, որն ակնհայտորեն փաստում է դաշտի տերերի գերիշխանության մասին՝ գրեթե բոլոր առանցքային ցուցանիշներով․

Գնդակին տիրելը. Հայաստանի հավաքականը վերահսկել է գնդակը` 55%, մինչդեռ ղազախները՝ 45%:

Հարվածներ և գրոհներ. Մեր ֆուտբոլիստները կատարել են 21 հարված դեպի դարպասը՝ հյուրերի 11-ի դիմաց: Հայկական կողմն անցկացրել է նաև անհամեմատ ավելի շատ գրոհներ՝ 29 ընդդեմ 16-ի:

Անկյունայիններ. Այս ցուցանիշով մեր թիմը պարզապես ջախջախիչ առավելություն է ունեցել մրցակցի նկատմամբ՝ իրացնելով 14 անկյունային, իսկ Ղազախստանը՝ ընդամենը 1:

Փոխանցումներ. Փոխանցումների քանակով և որակով ևս առավելությունը Հայաստանի կողմն է եղել։ Մեր ընտրանին կատարել է ընդհանուր 534 փոխանցում (որից 470-ը ճշգրիտ են եղել՝ 88% ճշգրտություն): Մինչդեռ մրցակիցն ունեցել է 353 փոխանցում (304 ճշգրիտ՝ 86% ճշգրտություն):

Կարգապահություն. Խաղի ընթացքում հյուրերն ավելի հաճախ են խախտել կանոնները։ Ղազախստանի հավաքականը վաստակել է 2 դեղին քարտ, իսկ մեր ընտրանու կազմում զգուշացվել է 1 խաղացող:

Հիշեցնենք, որ այս հանդիպումից հետո Հայաստանի ազգային հավաքականը շարունակում է նախապատրաստվել հերթական ստուգողական խաղին: Հունիսի 9-ին մեր թիմը Երևանում ընկերական հանդիպում կանցկացնի Մոլդովայի ազգային հավաքականի հետ։