Միլանի «Ինտերը» հետաքրքրված է Մադրիդի «Ռեալի» պաշտպան Դանի Կարվախալի ծառայություններով։ Այս մասին հայտնում է Fichajes-ը։ Աղբյուրի փոխանցմամբ՝ իտալական ակումբը մտադիր է 34-ամյա իսպանացու տեղափոխությունն իրականացնել անվճար հիմունքներով, քանի որ ընթացիկ մրցաշրջանի ավարտից հետո նրա պայմանագիրը մադրիդյան ակումբի հետ սպառվում է։
«Ինտերի» գլխավոր մարզիչ Քրիստիան Կիվուն Կարվախալին համարում է պաշտպանության աջ եզրն ամրապնդելու իդեալական տարբերակ՝ հաշվի առնելով նրա հարուստ փորձը, առաջնորդի որակները և վճռորոշ խաղերում բարձր մակարդակով հանդես գալու ունակությունը։
Նշվում է, որ Դենզել Դումֆրիսի հավանական հեռանալը ստիպել է «ներաձուրիների» ղեկավարությանն արագացնել նոր աջ պաշտպանի փնտրտուքները։ Միլանյան ակումբը մտադիր է կիրառել փորձառու ֆուտբոլիստների՝ առանց տրանսֆերային արժեք վճարելու ձեռքբերման իր ավանդական ռազմավարությունը։
Կարվախալի նկատմամբ հետաքրքրություն են ցուցաբերում նաև «Յուվենտուսը», «Կոմոն» ու «Միլանը», սակայն հենց «Ինտերն» է համարվում իսպանացու տեղափոխության գլխավոր հավակնորդը։ Միլանում հույս ունեն, որ Ա Սերիայի գործող չեմպիոնի կարգավիճակն ու խոշոր տիտղոսների համար պայքարելու հեռանկարները կօգնեն համոզել ֆուտբոլիստին կարիերան շարունակել հենց Իտալիայում։ Այլ ակումբների հետ մրցակցությունից խուսափելու նպատակով՝ «Ինտերի» ղեկավարությունը նախատեսում է արագացնել բանակցություններն ու գործարքն ավարտին հասցնել արդեն հունիսի սկզբին։
Հիշեցնենք, որ Դանի Կարվախալը «Ռեալի» սան է և մադրիդյան ակումբի համակարգում անցկացրել է ավելի քան 20 տարի։ «Արքայական» ակումբի կազմում պաշտպանը նվաճել է 27 տիտղոս, այդ թվում՝ Չեմպիոնների լիգայի 6 գավաթ։
