«Ֆեներբահչեի» ավագ և կիսապաշտպան Մերթ Հաքան Յանդաշը մեկ տարով որակազրկվել է խաղադրույքներ կատարելու համար։ Այս որոշումը կայացրել է Թուրքիայի Պրոֆեսիոնալ ֆուտբոլի կարգապահական կոմիտեն, հայտնում է Թուրքիայի ֆուտբոլի ֆեդերացիայի պաշտոնական կայքը։
31-ամյա ֆուտբոլիստի շուրջ ծավալված սկանդալը սկիզբ է առել դեռևս անցյալ տարեվերջին։ 2025 թվականի դեկտեմբերին Յանդաշը ձերբակալվել էր պայմանավորված խաղերի և ապօրինի խաղադրույքների հետաքննության շրջանակներում, իսկ 2026-ի փետրվարին նրան պաշտոնական մեղադրանք էր առաջադրվել։ Շրջանառվում էին լուրեր, որ ֆուտբոլիստին սպառնում է մինչև 17 տարի 10 ամիս ազատազրկում։ Այնուամենայնիվ, չորս ամիս ճաղերի հետևում անցկացնելուց հետո՝ ապրիլի սկզբին, Յանդաշն ազատ էր արձակվել։
Ստամբուլյան ակումբն անմիջապես հանդես է եկել պաշտոնական հայտարարությամբ՝ խստորեն դատապարտելով Կարգապահական կոմիտեի որոշումը.
«Մեր ավագ Մերթ Հաքան Յանդաշի նկատմամբ կիրառված 12-ամսյա որակազրկումն իր էությամբ անընդունելի է։ Դեռևս չավարտված քրեական գործի վրա հիմնված այս կարգապահական տույժը կարող է անուղղելի վնաս հասցնել մեր ֆուտբոլիստին և ակնհայտորեն հակասում է օրենքին ու արդարությանը։ Մենք հավատարիմ ենք անմեղության կանխավարկածին և անհապաղ բողոքարկելու ենք այս որոշումը Թուրքիայի ֆուտբոլի ֆեդերացիայի Արբիտրաժային խորհրդում։ «Ֆեներբահչեն» մինչև վերջ կանգնած է իր ավագի կողքին»,- նշված է ակումբի՝ X սոցիալական ցանցում արված հայտարարության մեջ։
Որոշման հրապարակումից հետո լռությունը խզել է նաև անձամբ ֆուտբոլիստը՝ նշելով, որ իր հանդեպ անարդար են վարվել.
«Փաստաբաններս ու ավագ ընկերներս խորհուրդ են տալիս սպասել արբիտրաժային գործընթացին։ Ինձ ընտրել են որպես քավության նոխազ։ Գիտեմ, որ ճակատագիրս կանխորոշված է, և չեմ հավատում, որ իմ նկատմամբ կայացված անարդար որոշումը կփոխվի։ Բայց հավատում եմ, որ կան աստվածավախ մարդիկ։ Մանրամասն հայտարարությամբ հանդես կգամ արբիտրաժից հետո… Հուսով եմ՝ հաշվի կառնեք, որ ես նույնպես ընտանիք ունեմ, և որ այս որոշմամբ դուք միայն ինձ չեք պատժում»,- գրել է Յանդաշը X-ի իր միկրոբլոգում։
Նշենք, որ Մերթ Յանդաշը «Ֆեներբահչեի» գույները պաշտպանում է 2020 թվականի ամառվանից։ Այս ընթացքում կիսապաշտպանը բոլոր մրցաշարերում մասնակցել է 149 հանդիպման՝ դառնալով 11 գոլի և 25 գոլային փոխանցման հեղինակ։ Նրա գործող պայմանագիրն ակումբի հետ նախատեսված է մինչև 2026 թվականի ամառը։
