Գերմանիայի հավաքականի և Մադրիդի «Ռեալի» նախկին կիսապաշտպան Տոնի Կրոսն իր մեկնաբանությունն է տվել Չեմպիոնների լիգայի խաղարկության քառորդ եզրափակչի՝ Մադրիդի «Ատլետիկոյի» և կատալոնական «Բարսելոնայի» միջև կայացած պատասխան հանդիպման վերաբերյալ։
Հիշեցնենք, որ մադրիդյան թիմը նվաճեց կիսաեզրափակչի ուղեգիր՝ երկու խաղերի ընդհանուր արդյունքով առավելության հասնելով կատալոնացիների նկատմամբ (2-0, 1-2):
««Ռեալում» անցկացրած 10 տարիներից հետո ես կնախընտրեի, որ այս թիմերից ոչ մեկը չհաղթեր։ Բայց եթե ստիպված լինեի ընտրել, կընտրեի «Ատլետիկոյին», քանի որ հաջորդ տարի նրանք, ամենայն հավանականությամբ, նման հնարավորություն էլ չեն ունենա»,- նշել է Կրոսը Luppen TV յութուբյան ալիքում ունեցած ելույթի ժամանակ։
Գերմանացի նախկին ֆուտբոլիստը, միևնույն ժամանակ, կասկած է հայտնել մադրիդյան ակումբի վերջնական հաջողության հարցում․ «Չեմ կարծում, թե «Ատլետիկոն» կնվաճի տիտղոսը։ Կան թիմեր, որոնք ավելի որակյալ ֆուտբոլ են խաղում։ Ընդհանուր առմամբ, «Բարսան» ավելի ուժեղ տեսք ուներ։ Պարզապես «Ատլետիկոն» առավելությունը պահպանելու վարպետ է, և նրանք առավելագույնս օգտվեցին դրանից»։
Նշենք, որ Չեմպիոնների լիգայի կիսաեզրափակչում Մադրիդի «Ատլետիկոն» ուժերը կչափի Լոնդոնի «Արսենալի» հետ։
