Մադրիդի «Ռեալի» մարզիչ Ալվարո Արբելոան Չեմպիոնների լիգայի քառորդ եզրափակչի՝ Մյունխենի «Բավարիայի» դեմ կայանալիք առաջին հանդիպումից առաջ կիսվել է իր սպասելիքներով՝ անդրադառնալով մրցակցին, Կիլիան Մբապեին և թիմի հոգեբանությանը:
«Բավարիայի» և սպասվող դիմակայության մասին
«Մենք հասկանում ենք, թե ինչ լուրջ մարտահրավեր է իրենից ներկայացնում «Բավարիան»: Նրանք բացառիկ մրցաշրջան են անցկացնում և այս պահին, թերևս, Եվրոպայի ամենակայուն թիմն են։ Վենսան Կոմպանին հսկայական աշխատանք է կատարում այնտեղ: Սակայն վստահ եմ, որ «Սանտիագո Բեռնաբեուն» կրկին ականատես կլինի Չեմպիոնների լիգայի հերթական մեծագույն երեկոյին»:
Ճնշման և հաղթողի հոգեբանության մասին
«Մենք նույնիսկ չենք դիտարկում պարտության սցենարը: Մեզ համար գոյություն ունի միայն մեկ տարբերակ՝ հաղթել «Բավարիային» և անցնել առաջ: «Ռեալում» ցանկացած պարտություն ցավոտ է ընդունվում, բայց մենք ժամանակ չունենք հիասթափվելու. մեր ողջ էներգիան և ուշադրությունը կենտրոնացած են վաղվա խաղի վրա»։
Մբապեի և թիմային աշխատանքի մասին
«Կիլիան Մբապեն հիանալի գիտակցում է, թե ինչ է նշանակում «Ռեալ Մադրիդը»: Նա երազել է այս ակումբում հանդես գալու մասին և եկել է այստեղ հենց այսպիսի վճռորոշ հանդիպումների համար: Մարզչի համար իսկական արտոնություն է իր տրամադրության տակ ունենալ Մբապեի, Վինիսիուսի, Բելինգհեմի ու Վալվերդեի պես խաղացողների։ Նրանք լավագույնն են մոլորակում, բայց գլխավորն այն է, որ այդ անհատական տաղանդը ծառայի թիմային նպատակներին՝ դարձնելով մեզ նաև աշխարհի լավագույն թիմը»:
Բելինգհեմի և Ալաբայի դերի մասին
«Երբ Ջուդ Բելինգհեմը խաղադաշտում է, մենք ակնհայտորեն ավելի ուժեղ ենք դառնում։ Նա ոչ միայն բացառիկ ֆուտբոլիստ է, այլև իսկական առաջնորդ: Ինչ վերաբերում է Դավիդ Ալաբային, նրա փորձն ու արժեքներն անգնահատելի են մեզ համար. նրա նման պրոֆեսիոնալի ներկայությունը մեծ հնարավորություն է ողջ թիմի համար»:
Որակազրկման վտանգի տակ գտնվող ֆուտբոլիստների մասին
«Տղաները շատ փորձառու են և գիտեն՝ ինչպես խաղալ նման իրավիճակներում: Սակայն սա եզրային հանդիպում է լինելու, և եթե հանուն թիմի պետք լինի դեղին քարտ ստանալ, նրանք դա կանեն»։
