Ֆրանսիական ՊՍԺ-ի հարձակվող Ուսման Դեմբելեն վնասվածք է ստացել Չեմպիոնների լիգայի խաղարկության լիգայի փուլի՝ «Բարսելոնայի» դեմ հանդիպմանը (4-2) և շարքից դուրս մնացել մի քանի շաբաթով։
Ֆրանսիական ակումբի մամուլի ծառայությունը հոկտեմբերի 21-ին հրապարակել է բժշկական զեկույց՝ հաստատելով, որ ֆուտբոլիստի մոտ ախտորոշվել է ձախ ազդրի հետին մկանի վնասվածք։ Առաջիկա շաբաթներին Դեմբելեն վերականգնողական կուրս կանցնի, սակայն փարիզյան ակումբը դեռևս չի հստակեցնում նրա խաղադաշտ վերադառնալու ստույգ ժամկետները։
Հիշեցնենք, որ հոկտեմբերի 20-ին կայացած խաղի 19-րդ րոպեին ֆրանսիացի ֆուտբոլիստը ցավ է զգացել ազդրի հատվածում և փոխարինում խնդրել մարզչական շտաբից՝ չկարողանալով շարունակել հանդիպումը նախկին թիմի դեմ։
Կատալոնական ակումբի նկատմամբ տարած տպավորիչ հաղթանակը, սակայն, լրջորեն ստվերվել է ՊՍԺ-ի ճամբարում գրանցված կադրային այլ կորուստներով։ Հանդիպման ընթացքում վնասվածք է ստացել նաև թիմի ավագ Մարկինյոսը։ Հիշեցնենք, որ վրացի եզրային հարձակվող Խվիչա Կվարացխելիայի վնասվածքի մասին հայտնի էր դարձել ավելի վաղ։ Նրա վնասվածքն ամենածանրն է․ ախտորոշվել է աջ ծնկի խաչաձև կապանների պատռվածք, ինչի պատճառով ֆուտբոլիստն առաջիկա օրերին կենթարկվի վիրահատության, իսկ ապաքինման համար կպահանջվի մոտ 9 ամիս։
Ինչպես հայտնում են Reuters-ը և Associated Press-ը, Մարկինյոսը, Դեմբելեի պես, բաց կթողնի առաջիկա մի քանի շաբաթը։
Ստեղծված իրավիճակը լուրջ գլխացավանք է փարիզյան թիմի մարզչական շտաբի համար։ Դեմբելեն ընթացիկ մրցաշրջանը սկսել էր լավ մարզավիճակում՝ բոլոր մրցաշարերում արդեն իսկ դառնալով 4 գոլի և 6 գոլային փոխանցման հեղինակ։ Առաջիկա խաղերում ՊՍԺ-ն ստիպված կլինի ամբողջությամբ վերադասավորել հարձակման գիծը։
