Հայաստանի ազգային հավաքականի դեմ կայանալիք ընկերական հանդիպումից առաջ Բելառուսի ընտրանու գլխավոր մարզիչ Վիկտոր Գոնչարենկոն հանդես է եկել նախախաղային ասուլիսով։
Մասնագետը խոսել է առաջիկա դիմակայության, ինչպես նաև հայկական ֆուտբոլի առաջատարների հետ իր ունեցած համատեղ աշխատանքի մասին։
Գնահատելով Հայաստանի հավաքականի ներկայիս վիճակը՝ բելառուսների գլխավոր մարզիչն ընդգծել է, որ սա տանտերերի առաջին հանդիպումն է տարվա ընթացքում, ինչն իր մեջ թե՛ դրական, թե՛ բացասական տարրեր է պարունակում․
«Ստեղծվել է երկակի իրավիճակ։ Մի կողմից՝ հրավիրված ֆուտբոլիստների մի մասը կարող է բավարար խաղային պրակտիկա չունենալ, բայց մյուս կողմից՝ թիմն ավելի թարմ տեսք կունենա մրցակիցների համեմատությամբ։ Քանի որ այս պատուհանի ընթացքում Հայաստանը կարող էր երկու հանդիպում անցկացնել, վստահ եմ՝ նրանք իրենց հիմնական ուշադրությունը կկենտրոնացնեն հենց այս առաջին խաղի վրա»,- նշել է մարզիչը։
Ռուսական Պրեմիեր լիգայում աշխատելու տարիներին Գոնչարենկոն հասցրել է մոտիկից ճանաչել ու աշխատել Էդուարդ Սպերցյանի և Նաիր Թիկնիզյանի հետ։
Խոսելով Սպերցյանի մասին՝ նա նշել է, որ միշտ խորհուրդ է տվել կիսապաշտպանին ուժերը փորձել ավելի ուժեղ առաջնությունում․
«Էդուարդը հիանալի ակումբում է հանդես գալիս, որտեղ նրան շատ են սիրում և բարձր են գնահատում։ Սակայն իմ մարզչական լիազորությունների շրջանակում ես նրան խորհուրդ եմ տվել տեղափոխվել ավելի բարձրակարգ լիգա։ Հաշվի առնելով նրա բացառիկ որակները՝ ես իսկապես կցանկանայի, որ նա գնար Հենրիխ Մխիթարյանի հետքերով և հարուստ եվրոպական ու միջազգային կարիերա կառուցեր։ Նա դրա համար բոլոր տվյալներն ունի»։
Թիկնիզյանի աճի և նոր տրանսֆերի մասին
Մասնագետը առանձնահատուկ ջերմությամբ է հիշել նաև Նաիր Թիկնիզյանի հետ երկարամյա աշխատանքը։
«Երիտասարդ ֆուտբոլիստները ԲԿՄԱ-ի նման ակումբում հաստատվելու համար ժամանակի կարիք ունեն։ Սովորաբար պահանջվում է մոտ երկու տարի՝ պահեստայիններից հիմնական կազմի լիարժեք խաղացող դառնալու համար, և Նաիրն անցավ այդ ճանապարհը։ Նա իր վարպետության, արագության և հիանալի ձախ ոտքի շնորհիվ կարողացավ հասնել այդ մակարդակին։ Իսկ նրա վերջին տեղափոխությունը «Լոկոմոտիվից» «Ցրվենա Զվեզդա» ակնհայտ առաջընթաց է և տեղափոխություն շատ ավելի բարձր մակարդակ»,- հավելել է Գոնչարենկոն։
Անդրադառնալով Բելառուսի և Հայաստանի հավաքականների՝ Եվրոպայի ու Աշխարհի առաջնությունների եզրափակիչ փուլեր դուրս գալու հեռանկարներին, նա ընդգծել է հավատի ու հետևողական աշխատանքի կարևորությունը. «Առանց հավատի անիմաստ է սկսել աշխատել։ Պետք է անընդհատ թակել դռները, և դրանք վաղ թե ուշ անպայման կբացվեն»։
Հիշեցնենք, որ Հայաստան — Բելառուս ընկերական հանդիպումը կկայանա վաղը՝ մարտի 29-ին, Վազգեն Սարգսյանի անվան «Հանրապետական» մարզադաշտում։ Խաղի մեկնարկը նախատեսված է Երևանի ժամանակով 18։00-ին։
